Energiakriisin da puuʹtʼtemkuuli pâjjnummšin liâ jõnn vaaiktõõzz saaʹmi puäʒʒhoiddu
Sääʹmteʹǧǧ vueiʹnnlõõđi mädd- da meäʹcctäälministeria kansliajååʹđteei Husu-Kallioin seärad 28.9.2022 Heʹlssnest. Vueiʹnnlõttmõõžž äššan leʹjje energiakriis da inflaatio vaaiktõõzz saaʹmi puäʒʒhoiddu. Puäʒʒtallu šõddâm kuuli pâjjnummuš peejj jieʹllemvueʹǩǩniiʹǩǩid samai väʹǯǯlõs ekonoomlaž vuâkka.
Puäʒʒtääl puuʹtʼtemkuulid lij kaggâm jm. liâdǥ, puälddemaunnsi da vuäʹsttemrehu hõõʹddi jõnn pâjjnummuš. Pâjjnam kuul kuâsttje jeäʹrben sääʹm dommvuuʹd paalǥâskooʹddin, koin puäʒʒhåidd vuâđđââvv puõccui juätkkjeei puõcci ǩiõččma da kõõsk liâ kuuʹǩǩ.
– Puäʒʒjieʹllemvueʹǩǩ ij leäkku veâl jällʼjam õõuʹdab čoʹrstemtaaʹlvi šõddeem ekonoomlaž hääʹvjummšin da ååʹn leäʹp âʹpet ođđ kriis ooudâst. Puäʒʒtääl puuʹtʼtemkuuli pâjjnummuž vueiʹtet oudlkâʹstted miârkkšõõvvâm sääʹm puäʒʒhoiʹddjeeʹjid samai jõnn ekonoomlaž hääʹvjummšid da jo-ba tuʹmmstõõǥǥid puäʒʒjieʹllemvueʹjj loopptummšest, särnn Sääʹmteeʹǧǧ 2. väärrsaaǥǥjååʹđeei Leo Aikio.
Sääʹmteʹǧǧ âânn vääžnʼjen tõn, što mädd- da meäʹcctäälministeriast ääʹljet tâʹlles čiõlǥeed, mäʹhtt jeäʹrben sääʹm puäʒʒhoiddu pââʹstet puõʹtti tälvva uʹvdded tuärjjõõzz vuõiggäiggsânji. Vueʹjjest, koʹst puäʒʒhoiʹddjeeʹji ekonoomlaž viõǥǥ uʹvddi lij õnnum loʹppe juʹn õõuʹdab taaʹlvi poodd, mâʹŋŋlest mäʹhssem koʹrvvõõzz jiâ teänab peälašt tõid puäʒʒhoiʹddjeeʹjid, kook tuõđi jouʹdde smiõttâd jieʹllemvueʹjj jõskkmõõžž tõn tuejjeen ekonoomlaž hääʹvjummšid.
Leäm samai piâkkõõttâm saaʹmi puäʒʒhååid pueʹttiääiʹjest. Pâjjnam puuʹtʼtemkuulid jeäʹt pââʹst riʹjttjeeinalla kompensâʹstted kaaggeeʹl puõccuvueʹǯǯ hââʹdd, aainâs tuärjjeemtååimid taarbšet še riikkâst, što jieʹllemvueʹjji juätkkjemvuõtt pââʹstet tuõrvvâd, juätkk Aikio.
Väʹlddminister Marin halltõõzz õhttân täävtõssân lij oouʹdeed puäʒʒtääl ouddnummuž kaʹnnteeʹjen da kulttuursânji miârkteeʹjen jieʹllemvueʹǩǩen. Puäʒʒhååidain lij vääžnai rool jeäʹrben tâʹvv Lääʹddjânnam porrmõš-staanvuõđ ǩiõččâmvueʹjjest da jieʹllemvueʹjj âlgg taʹrǩstõõllâd da tõõzz âlgg uʹvdded še äärv miârkteeʹjen Lääʹddjânnam huâllainsmâttmõõžž vaaikteei tuejjeeʹjen ânnʼjõž maailmanpoliittlaž vueʹjjest.
Tuâǥǥažmooštas energiakriis da kuuli pâjjnummuž vaaiktõõzzin saaʹmi puäʒʒhoiddu
Lââʹssteâđaid:
Leo Aikio
II väärrsaaǥǥjååʹđeei
040 621 6505
leo.aikio@samediggi.fi
Sarita Kämäräinen
jieʹllemvueʹǩǩ- da pirrõslääʹǩǩpiisar
040 186 7258
sarita.kamarainen@samediggi.fi
Taustamuistio energiakriisin ja kustannusten nousun vaikutuksista saamelaiseen poronhoitoon.
