Lääʹddjânnam da Sääʹmteʹǧǧ ǩeässâʹtte Bareeʹnts euroaarktlaž suåvtõõzzâst – Sääʹmteʹǧǧ ǩeäčč EU årra
Vuõssmõs Bareeʹnts vuuʹd alggmeerai jõnnsåbbar, The Sámi Summit, jäʹrjsteš Brysslest pâʹsslâšttam-mannust 2023. Jõnnsåbbar jäʹrjste Lääʹdd Sääʹmteʹǧǧ da Lääʹdd Bareents euroaarktlaž suåvtõõzz saaǥǥjååʹđteemvuõtt õhttsažtuâjast Euroopp parlameeʹntin. Snimldõk: European Union 2023 – Source : EP
Lääʹddjânnam ǩeässââtt Bareeʹnts euroaarktlaž suåvtõõzzâst da Lääʹdd Sääʹmteʹǧǧ še ǩeässââtt õhttsažtuâjast.
Ålggminister Elina Valtonen (kok.) tuâtt ålggministeria teâđtõõzzâst, što õhttsažtuâjjmall ij teänab vaʹstted tän peeiʹv taarbid, peʹce tõʹst šâʹdde pâjjlõs raajõõzz. Valtonen mieʹldd Barents-õhttsažtuâjj leäi toiʹmmjeei kanaal tâʹvv vuârrvaaiktõʹsse ooudbeäʹl Ruõšš võʹlltummuž Ukraina.
Sääʹmteeʹǧǧ vuäzzlaž Janne Hirvasvuopio jååʹđat saaǥǥ Bareeʹnts euroaarktlaž suåvtõõzz alggmeertuâjj-joouk, koʹst lij leämmaž jiijjâsnallšem rââst raaʹji vuällai rool Tâʹvvjânnmi da Ruõššjânnam alggmeerai seʹst.
– Gååran mâânn, ǥo Lääʹddjânnam ânnʼjõž halltõs ij teänab vueiʹn Aarktlaž vuuʹd da alggmeerai taʹrjjeem vueiʹttemvuõđid vääžnʼjen. Säʹmmlain lij jiânnai taʹrjjeed porrmõš-staaʹne, biodiversitetta da äimmõsmuttsa kuulli kõõččmõõžžin. Säʹmmlai âlgg ååʹn ǩiõččâd nânnsubun Euroopp õđđma, Hirvasvuopio tuâtt.
Suåvtõõzz alggmeertuâjj-joukk lij oʹnstam tuâjstes
Bareeʹnts euroaarktlaž suåvtõõzz alggmeertuâjj-joukk lij tuejjääm looʹjid iiʹjjid oʹnstam tuâj alggmeerai õuʹdde.
Aainâs vaaikteei tuâjj leäi mõõnni pââʹjj Bareeʹnts euroaarktlaž suåvtõõzz tuâjj-joouk õõuʹdab saaǥǥjååʹđteei da ânnʼjõõžž väärrneeʹǩǩ Anni Koivisto jååʹđteʹmen. Pâʹsslâšttam-mannust 2023 jäʹrjste vuõssmõs Bareeʹnts vuuʹd alggmeerai jõnnsåbbar, The Sámi Summit, Brysslest õhttsažtuâjast Euroopp parlameeʹntin. Šõddmõõžž ääʹvii Euroopp parlameeʹnt saakkooumaž Roberta Metsola.
– Šõddmõš uuʹdi miʹjjid vueiʹttemvuõđ viikkâd säʹmmlaid õõuʹdmõs aaʹššid, mâʹte äimmõsmuttâz vaaiktõõzzid, vuõiʹǧǧest Euroopp Unioon tuʹmmstõktuâj õđđma. Leʹčči tääʹrǩes äʹšš, što ååʹn tuejjuum tuʹmmstõõǥǥâst huõlǩâni Lääʹddjânnam da jeärraz Tâʹvvjânnam tuärjjeʹče juätkast še vaʹstteei paaiʹǩid da ooudče alggmeerai jiõn kollʼjed veiddsânji tõin pooʹrdin, koʹst miʹjjid kuõskki aaʹššid tuʹmmeet, Koivisto tuâtt.
Neuʹrr, što Ruõššjânnam kaggâm vääin ǩeeʹjjest Bareeʹnts euroaarktlaž suåvtõõzz rool lij occnam.
EU-ääʹšš Sääʹmteeʹǧǧ meeraikõskksaž tååimast õõuʹdmõsân
Lääʹdd sääʹmteeʹǧǧ saaǥǥjååʹđteei Pirita Näkkäläjärvi särnn, što Sääʹmteʹǧǧ lij kaggâm EU-aaʹššid meeraikõskksaž aaʹšši õõuʹdmõs teeʹmmen toiʹmmjemprograammâst 2024–27.
– Õhttân tääʹvtõsân lij čuõlmmâd säʹmmlai da Euroopp parlameeʹnt kõskksaž kueiʹmmvuõttsuåppmõõžž, koin peäʹlstes nââneʹčeš säʹmmlai vuässadvuõđ EU-tuʹmmstõktuõjju Brysslest da Lääʹddjânnmest še, Näkkäläjärvi särnn.
Lââʹssen Lääʹdd Sääʹmteʹǧǧ juätkk tâʹvvjânnmallaš õhttsažtuâj säʹmmlai juʹn viõǥǥâst åårrai õhttsažtuâjjraajõõzzi pääiʹǩ, mâʹte Lääʹdd, Taarr da Ruõcc Sääʹmtiiʹǧǧi õhttsaž parlamentaarlaž suåvtõõzzâst.
Tuâǥǥaž:
Sääʹmteʹǧǧ saǥstõõli sääʹmteʹǧǧlääʹjj 9 § meâldlaž saǥstõõllmõõžžâst ålggministeriain. Saǥstõõllmõõžžin ij käunnʼjam nåkam čåuddmõš, koʹst Lääʹdd Sääʹmteʹǧǧ vuäitči juäʹtǩǩed õhttsažtuâj Bareeʹnts euroaarktlaž suåvtõõzz alggmeertuâjj-jooukâst teäggtõõzz puuđeen.
Bareeʹnts euroaarktlaž suåvtõõzz alggmeertuâjj-joukk juätkk toimmjummšes normaalân eeʹjj 2025 loopp räjja, mâŋŋa tõʹst Lääʹdd Sääʹmteʹǧǧ čåuddââtt tuâjj-jooukâst.
Lââʹssteâđ:
Janne Hirvasvuopio
Sääʹmteeʹǧǧ vuäzzlaž
Bareeʹnts euroaarktlaž suåvtõõzz alggmeertuâjj-joouk saaǥǥjååʹđteei
janne.k.hirvasvuopio@gmail.com
050 533 7016
Anni Koivisto
Sääʹmteeʹǧǧ vuäzzlaž
Bareeʹnts euroaarktlaž suåvtõõzz alggmeertuâjj-joouk saaǥǥjååʹđteei
koivisto.anni@gmail.com
Pirita Näkkäläjärvi
Sääʹmteeʹǧǧ saaǥǥjååʹđteei
pirita.nakkalajarvi@samediggi.fi
044 7533766
