Lij-a riikkraajin häiʹtt õhttsažtuõjju?
Lij-a tij stroiʹttlest jurddum, što riikkraaj tuejjte vaʹǯǯtõõzzid da probleeʹmid? Sääʹm raajjhäiʹttluʹvddkåʹdd haaʹleʹče vuäǯǯad teâđaid tij vaʹǯǯtõõzzin da raukkâd eʹtǩǩõõzzid tuâjjses.
Sääʹm raajjhäiʹttluʹvddkååʹdd lij nõõmääm Sääʹm parlamentaarlaž suåvtõs (SPN) da tõt lij koolm sääʹmteeʹǧǧ õhttsažtuâjjorgaan. Luʹvddkååʹdd tuâjjan lij identifiâʹstted nuʹtt sarnnum raajjhääitaid, kook vaigsmâʹtte õhttsažtuâj da õhttvuõđ säʹmmlai kõõsk riikk raaji puõtt di tuejjte vaʹǯǯtõõzzid oummid õhttu, piârrjid, organisaatioid, stroiʹttlid leʹbe jieʹllemvueʹǩǩharjjteeʹjid.
Lie-ǥo tij organisaatiost puättam ouʹdde vaʹǯǯtõõzz, koi pirr luʹvddkååʹdd leʹčči pueʹrr tieʹtted? Mij taarbšep tij vieʹǩǩ!
Vääʹld õhttvuõđ miʹjjid da ǩeeʹrjet addrõʹsse samediggi@samediggi.no da miârk neʹttpååšta “sámi rádjahehttehuslávdegoddi”. Miõlsteen väʹlddep vuâstta ǩeeʹrjtõõzzid vaʹǯǯtõõzzi pirr. Luʹvddkåʹdd haaʹlad vuäǯǯad veiddsõs fiʹttjõõzz vaʹǯǯtõõzzin, koid raaj sääʹmvuuʹdest tuejjte. Luʹvddkåʹdd haaʹlad eʹtǩǩõõzzid 15.4.2020 mõõneeʹst.
Ouddmiârk aaʹššin, koin lij miârktõs luʹvddkådda:
- Reâugg – rââst raaj reâuǥast jååttmõš
- Meersažvuõtt– oummu õhttu da piârrji vaʹǯǯtõõzz “kuõiʹt jânnmest jälsteeʹn”
- Škooul – vuâđđškooul õhttsažtuâjj raajjvuuʹdin
- Õllʼjab škooultõs– õhttsaž sääʹm škooultõõzz da mättʼtõõttijieʹllem
- Tiõrvâsvuõtt – taʹrjjummuš raajjvuuʹdin da õhttsaž taʹrjjummuš
- Ǩiõtt-tuâj, kaaupšummuš da kulttuur – kulttuurtuâjj da kaaupšummuš nuuʹbb beälla raaj
- Puäʒʒjieʹllemvueʹǩǩ raajjvuuʹdin– näuʹddpolitikk, koʹrvvõsääʹšš mieʹldd looǥǥeeʹl, žeevaidåhttarääʹšš dno. (luʹvddkååʹddest ij leäkku juurd ärvvtõõllâd palggâmaaʹššid).
- Projeʹkttvaaldšummuš– tuärjjriâšldõõǥǥ da õhttsaž projeeʹkt
Luʹvddkååʹdd vuäzzla:
Runar Myrnes Balto, luʹvddkååʹdd saaǥǥjååʹđteei (Taarrjânnam beäʹlnn)
Anders Kråik, vuäzzlaž (Ruõccjânnam beäʹlnn)
Ulla Magga, vuäzzlaž (Lääʹddjânnam beäʹlnn)
Snimldõk: Åse M.P. Pulk/Sámediggi
