Ođđ Bálggis-mättmateriaal tuärjjad tâʹvvsääʹmǩiõl mättjummuž 2. klaassâst

Bálggis -čõõuč mättʼtõõttâmǩeʹrjj lij ođđ 2. klaass tâʹvvsääʹmǩiõl jieʹnnǩiõl mättʼtõʹsse jurddum mättmateriaal, kååʹtt tuärjjad lookkmõõžž, ǩeeʹrjtummuž, sääʹnnreeʹǧǧesvuõđ da ǩiõlʼlaž tieʹttemvuõđ ouddnummuž. Ǩeeʹrj vueiʹtet äuʹǩǩeed pââʹjab klaassin še. Sääʹmteeʹǧǧ õlmstâʹttem ǩeeʹrj tuejjeei lij spesiaalklassuʹčtel Aura Pieski. Kaartʼtõõzz tuejjeei lij Nora Bäck.

Škooulneeʹǩǩ tåʹbdde juʹn ǩeeʹrj persoonid ääiʹjab Árdna-mättmateriaalâst, da Bálggis-mättʼtõõttâmǩeeʹrj tuâj juäʹtǩǩe luândlânji alggmättʼtõõzzâst alttuum mättjempälggaz. Mättʼtõõttâmǩeeʹrj määŋgpeällsa tuâj smeʹllkâʹtte ââʹnned ǩiõl aktiivlânji. Mättǩeeʹrj siiskõs vuäǯǯ jurddjees sääʹm jieʹllempirrõõzzâst, luâđast, õutstõõzzâst da kulttuurâst. Täävtõssân lij nââneed škooulniiʹǩǩi tâʹvvsääʹmǩiõl silttummuž di tuärjjeed sij kulttuursaž identiteeʹtt. Jiijjâsärvvtõõllmõʹšše da verddsažmaacctõʹsse še käunnʼje ǩeeʹrjest vueʹzzez.

Bálggis-obbvuõđ viiǥǥât ooudâs pooddi pooddi. Čõõuč mättʼtõõttâmǩeeʹrj lââʹssen tuâj vueʹlnn lie ǩiiđ mättʼtõõttâmǩeʹrjj di lookkâmǩeʹrjj, kook tiuddee mättmateriaalrääid pueʹtti iiʹjji. Čõõuč mättʼtõõttâmǩerjja kuulli lookkâmǩeeʹrj teeʹkstid lij vueiʹtlvaž tiʹllʼjed digitaalʼlaž häämast ǩiččlõddâmâânnmõõžž vääras ouddâl ko õlmm lookkâmǩeʹrjj lij vaalmâš.

Lââʹssteâđ da ǩiõččlõddâm-materiaal

Aura Pieski
Mättmateriaalplaaneei
aura.pieski@samediggi.fi