Sääʹmteʹǧǧ peʹcclõõvvâm tuʹmmstõõǥǥâst piijjâd Uccjooǥǥ puõccisââʹj ǩidd
Lappi pueʹrrvââjjamvuuʹd vuʹvddväʹlddõskåʹdd tuʹmmii vuõssaarǥ 28.10.2024 såbbreʹstes piijjâd ǩidd mäŋgg puõccisââʹj Lappi pueʹrrvââjjamvuuʹdest. Ǩidd piijjâd aiggum puõccisõõʹjid kool še Uccjooǥǥ puõccisââʹjj. Lappi pueʹrrvââjjamvuʹvdd äigg jäʹrjsted koʹrvveei kääzzkõõzzid dommpuõccipõõrt, dommhååid di vuõsshååid kääzzkõõzzid õhtteeʹl. Puõccisõõʹji ǩidd piijjmõš kooll Lappi pueʹrrvââjjamvuuʹd sosiaal- da tiõrvâsvuõtthuâl kääzzkõs-säimmõõzz muttsid.
Sääʹmteʹǧǧ lij välddam ǩiõldliʹžžen Uccjooǥǥ puõccisââʹj ǩidd piijjmõõžž juʹn ǩiiđ rääʹjest ääʹljeeʹl da pohttam vuäinnmõõžžâs õuʹdde nuʹt ceälkkmõõžžines ǥu sääʹmteʹǧǧlääʹjj 9 § meâldlaž saǥstõõllmõõžžin.
– Peʹcclâʹsttep kääzzkõstääʹzz huânnʼnummuž Uccjooǥǥâst. Täk muttâz jie vuäǯǯči viikkâd tõõzz, što oummid šâdd staanteʹmesvuõtt. Vueiʹnnep, što âʹlddkääzzkõõzz tuärjjee peäʹlstes vuuʹd jieʹllemviõǥǥ da vueiʹtlvâʹstte oummui jälstummuž jiiʹjjes dommvuuʹdin jiiʹjjes õutstõõzzi da sooǥǥi seʹst. Ǩiddpiijjâmtuʹmmstõõǥǥ da päiʹǩǩmieʹrrtaʹrǩstõõllmõõžži õhttvuõđâst õõlǥči ainsmâʹtted, što mäʹtǩǩ puõccisââʹjjhoiddu ij šõõdd ni ǩeäzz toolkteʹmen, Sääʹmteeʹǧǧ II väärrsaaǥǥjååʹđteei Tuomas Aslak Juuso tuâtt.
Sääʹmǩiõllsain soti-kääzzkõõzzin ij leäkku šiõttlâʹttemväärr
Sääʹmteʹǧǧ saǥstõõli Lappi pueʹrrvââjjamvuuʹdin kääzzkõs-säimmõõzz muttsi diõtt nuʹt ääiʹjab valmštõõllmõõžž ääiʹj ǩeâđđa 2024 ǥu kuõʹhttešt čâhčča 2024. Čõõuč saǥstõõllmõõžžid õʹnneš 2.10.2024 di 15.10.2024. Saǥstõõllmõõžž puʹtte Uccjooǥǥ puõccisââʹj loopptummuž kuõskeeʹl jeeʹresmiõʹlle.
Sääʹmteʹǧǧ âânn täʹrǩǩen, što Lappi pueʹrrvââjjamvuuʹdest tobdstet sääʹmǩiõllsai kääzzkõõzzi juʹn valmmša hueʹnes vueʹjj, koʹst ij leäkku šiõttlâʹttemväärr. Sääʹmteeʹǧǧ vuäinnmõõžž mieʹldd Uccjooǥǥ puõccisââʹj kuõskeeʹl leäi õlggâm tääʹvtõõttâd jäänab toiʹmmjem õõuʹdummša, mâʹte sääʹmǩiõllsa da kulttuurmeâldla kääzzkõõzz pueʹrummša ǥu vuâlasvuejjma. Sääʹmteʹǧǧ vaaʹldi vuäinnmõõžžâst lokku pääiklaž vuäinnmõõžžid, õuddmiârkkân puõccisââʹj peäʹlest norrum meeraddreeʹss, koʹst ännõʹtteš puõccisââʹj seeiltem peäʹlest.
– Uccjooǥǥâst âlgg staanâd juätkast še suutk pirrsaž kääzzkõõzzid puõccisââʹjnalšmen da puõccihååid vaalmâšvuõđin. Kääzzkõõzzid jeät vuõittu vuejjad vuâlas teâđtaa tõʹst, što taarbšum, koʹrvveei kääzzkõs lij pueʹttmen da što päiʹǩǩmeäʹr riʹjttje vuuʹd taarbid lokku vääʹldeeʹl. Puõccistaanvuõtt âlgg tuõʹllʼjed lokku vääʹldeeʹl tõn, što lie vueʹjj, koin ââʹldben kääzzkõõzzid vuäitči piʹrǧǧeed pääiʹǩest õuddmiârkkân dommpuõccipõõrt tuärjain, leša kuʹǩes kõõski diõtt lij staanvuõđ peäʹlnn pueʹrmõs, što puõcci vuäitt leeʹd jiiʹjjes pääiʹǩ sâjja soti-huâl tåimmpääiʹǩest âʹlddkääzzkõsvuâđđjurddi meâldlânji, särnn Juuso.
Toiʹmmjeei kääzzkõõzzid âlgg viikkâd čõõđ õõutverddsen
Sääʹmteʹǧǧ lij saǥstõõllmõõžžines da ceälkkmõõžžines pohttam õuʹdde še jeeʹres kääzzkõs-säimmõõzz muttsid kuõskki vuâmmšõõzzid.
Sääʹmteʹǧǧ âânn samai õõuʹdmõs äʹššen, što nuʹt Uccjooǥǥâst ǥu jeeʹresåʹrnn säʹmmlai dommvuuʹdest aainâs vuâmmšet sääʹmǩiõllsai da kulttuurmeâldlai kääzzkõõzzi õõuʹdummuž, što sääʹmäʹššniiʹǩǩi vuõiggâdvuõđ soti-kääzzkõõzzin teâuddje. Toiʹmmjeei sosiaal- da tiõrvâsvuõtthuâl kääzzkõõzzid âlgg čõõđted õõutverddsen nuʹtt što puk nuʹtt ǩiõlʼlaž, kulttuursaž ǥu vooudlaž vuällamvuõtt teâuddje.
Lââʹssteâđ:
Tuomas Aslak Juuso
II väärrsaaǥǥjååʹđteei, Sääʹmteeʹǧǧ sosiaal- da tiõrvâsvuõttsektoor vaʹstteeisaaǥǥjååʹđteei
040 687 3394
tuomas.juuso@samediggi.fi
