Sääʹmteʹǧǧ vuässââtt äimmõsmuttsa šiõttlõõvvmõõžž tååimaid valmštõõlli haʹŋǩǩõʹsse

KISS LIFE SIP 2030-haʹŋǩǩõs lij riikksuåvtõõzz meersaž äimmõsmuttsa šiõttlõõvvâmplaaʹne (KISS2030) vuâđđõõvvi äimmõsmuttsa šiõttlõõvvmõõžž tååimaid čõõđteei haʼnǩǩõsobbvuõtt.  Haʹŋǩǩõõzz valmštõõllmõõžž tuejjeet veiddsânji õhttsažtuâjast da tõõzz ooʒʒât teäggtõõzz EU LIFE-prograammâst. Haʹŋǩǩõõzz čõõđ viikkmõš lij ǩidd tõʹst, miõđât-jeät tõõzz teäggtõõzz.

– Äimmõsmuuttâs tuõđi lij vueʹssen mij jieʹllmest da jieʹllemvuõʹjjin, tõn čuäʹjte še tän tääʹlv šõŋŋtuejjeei.  Taarbšep mij ââʹnnma puk vueiʹtlvaž teâđ da silttummuž äimmõsmuttsa šiõttlõõvvmõõžžâst, što pâʹsttep pueʹrmõõzz mieʹldd šiõttlõõvvâd ođđnallšem šõŋŋtuejjeeʹjid. Âânam samai pueʹrren, što Sääʹmteʹǧǧ tuʹmmii vueʹlǧǧed haʹŋǩǩõʹsse mieʹldd, särnn I väärrsaaǥǥjååʹđteei Leo Aikio.

Haʹŋǩǩõõzz jurddi tueʹǩǩen lij muʹtstõõlli, vuäinnmõõžžid da raajõõzzid muʹtti šiõttlõõvvmõš.  Kõskksâjjsaž neävvan lie mõõntõõllâm tääʹzz šiõttlõõvvâmčåuddmõõžž di silttummuž õõudâsviikkmõš. Haʹŋǩǩõõzz peäʹlnn kõskksâjjsaž teeʹmmen lie jm. tiõrvâsvuõtt, luâttreeʹǧǧesvuõđ, rajjum pirrõs, staanvuõtt di aarktlaž vuʹvdd da säʹmmla.

Säʹmmlai šiõttlõõvvmõõžž äimmõsmuttsa kuõskki tuâjjpaʹǩeeʹtt valmštõõllmõõžž jååʹđat Lappi universiteeʹtt tuʹtǩǩeemprofessor Rauna Kuokkanen. Lappi universiteeʹtt lââʹssen tuâjjpaʹǩeeʹtest 7 mieʹldd lie Luke, Syke, pirrõsministeria da Äimmtiõđ strooiʹtel. Haʹŋǩǩõõzz teäggtõõzzâst 60 % puäʹđči EU LIFE-teäggtõõzzâst da haʹŋǩǩõõzzâst lij 40 % jiõččteäggtemvuässõs.  Sääʹmteeʹǧǧ obb-budjeʹtten haʹŋǩǩõõzzâst lij plaanum 440 840 euʹrred, kuäʹss jiõččteäggtemvuässõõzz mieʹrr lij 176 335 euʹrred. Sääʹmteʹǧǧ lij vuäǯǯam ravvõõzz åålǥpeällsaž jiõččteäggtemvuässõõzzâst mädd- da meäʹcctäällministeriast da pirrõsministeriast.

Säʹmmlai äimmõsmuttsa šiõttlõõvvâmplaan valmštõõllmõš kooll Sääʹmteeʹǧǧ jieʹllemvueʹǩǩ-, vuõiggâdvuõtt- da pirrõs-sektoor vaalpââʹj 2024–2027 õõuʹdmõs täävtõõzzid.

Sääʹmteʹǧǧ kaaunõõđi mädd- da meäʹcctäällminister Essayahin

Sääʹmteeʹǧǧ I väärrsaaǥǥjååʹđteei Leo Aikio kaaunõõđi ääiʹjben täʹlvvmannust mädd- da meäʹcctäällministeriain da pirrõsministeriain Heʹlssnest. Kaaunõõttmõõžžin saǥstõʹlleš säʹmmlai äimmõsmuttsa šiõttlõõvvmõõžž õõudummšest da KISS LIFE SIP 2030-haʹŋǩǩõõzz jiõččteäggtemvuässõõzzâst. Lââʹssen saǥstõʹlleš päʹǩǩluõssvueʹjjest Teänjooǥǥâst da Njauddâmjooǥǥâst. Kaaunõõttmõʹšše vuässõʹtte I väärrsaaǥǥjååʹđteei lââʹssen Sääʹmteeʹǧǧ jieʹllemvueʹǩǩ- da pirrõslääʹǩǩpiisar Sarita Kämäräinen di vs. pirrõspiisar Leena Niska.

Sääʹmteeʹǧǧ kaaunõõttmõš mädd- da meäʹcctäällministeriain 13.2.2025. Snimldõõǥǥâst čiʹǯǯpeäʹlnn: vs. pirrõspiisar Leena Niska, mädd- da meäʹcctäällminister Sari Essayah, I väärrsaaǥǥjååʹđteei Leo Aikio, jieʹllemvueʹǩǩ- da pirrõslääʹǩǩpiisar Sarita Kämäräinen di kansliajååʹđteei Pekka Pesonen.

– Vieʹlttʼtem lij, što säʹmmla lie jiõčč mieʹldd valmštõõllmen haʹŋǩǩõõzzid, kookk siʹjjid kõskksânji kueʹsǩǩe. Späʹssbõõššâp mädd- da meäʹcctäällministeria ärvvsaž saǥstõõllmõõžžin da aainâs tõʹst, što meeʹst lij õhttsaž vuäinnmõš KISS LIFE SIP-haʹŋǩǩõõzz jiõččteäggtemvuässõõzzâst, särnn väärrsaaǥǥjååʹđteei Aikio.

Lââʹssteâđ:

Leo Aikio
I väärrsaaǥǥjååʹđteei
040 621 6505
leo.aikio@samediggi.fi

Leena Niska
vs. pirrõspiisar
044 901 3900
leena.niska@samediggi.fi