Sääʹmteeʹǧǧ halltõs saǥstõõli šiõttlâʹttemtååimain da tuʹmmii õhttsažtoiʹmmjemorgaan šiõttummšest

Sääʹmteeʹǧǧ halltõs jueʹtǩi valmštõõttmõõžž pueʹtti riikktällõõzz šiõttlâʹttemtååimaid. Påʹrǧǧmannu aalǥâst õlmstõttum riikkvääraiministeria budjeʹtteʹtǩǩõõzzâst eʹtǩǩeet Sääʹmtegga 568 000 eeuʹr čuõppmõõžžid.

– Peʹcclõõššâp tõn, što eʹtǩǩuum budjeʹttčuõppmõõžž kueʹsǩǩe Sääʹmteeʹǧǧ jiõččvaaldâšm teäggtõõzz da Sääʹmteeʹǧǧ lääʹjjest šiõttuum tuâjaid. Fiʹttjep, što puk âʹlǧǧe vuässõõttâd šeäʹšttma, leša tuäivvap, što halltõs da eeʹttiǩ-kåʹdd ǩieʹppee Sääʹmteeʹǧǧ kuõskki čuõppmõõžžid, särnn saaǥǥjååʹđteei Näkkäläjärvi.

Sääʹmteeʹǧǧ halltõs saǥstõõli vuâđđeei šiõttlâʹttemplaan siiskõõzz pirr.

– Vueiʹtlvaž teäʹǧǧšeäšt pueʹtti eeǥǥas põõrǥât ooccâd jeeʹrab mieʹldd sååbbarkoolain, õhttsažtâʹvvjânnmallaš sääʹmǩiõli äʹšštobddiorgaan Ǩiõllkaʹlddi koolain di vaaldâšmkoolain, särnn saaǥǥjååʹđteei Näkkäläjärvi.

Sääʹmteeʹǧǧ halltõs šiõttii såbbreʹstes õhttmažtoimmjummšest riikk veʹrǧǧpaaiʹǩin da stroiʹttlin uvddum lääʹjj 7 §:st jurddum õhttsažtoiʹmmjemorgaan. Tõn tåimmanouddmõšân lij ǩiõttʼtõõllâd õhttsažtoiʹmmjemlääʹjj meâldlânji Sääʹmtegga riikk tällõsärvvlõseʹtǩǩõõzzâst čuäʹjtum teäggtõõzz čuõppmõõžžid. Halltõs raauki tuâjjlažkååʹdd nõõmeed eeʹttkõʹsttjes õhttsažtoiʹmmjemorgaaʹne.

– Õhttsažtoiʹmmjemorgaan šiõttummšin valmštõõttâp vueiʹtlvaž šeäštt-tååimai plaanma da čõõđ viikkma õhttmažtoimmjummšin tuâjjlažkooʹddin, särnn saaǥǥjååʹđteei Näkkäläjärvi.

Halltõs priimi še såbbreʹstes sääʹmǩiõllsaid sosiaal- da tiõrvâsvuõttkääzzkõõzzid kuulli eʹtǩǩõõzzid da alttõõzzid, nõõmii Maarit Kiprianooff Sääʹmteeʹǧǧ eeʹttkõʹsttjen Sääʹmkulttuurfoond halltõʹsse pââjas 2025–28 da ǩiõttʼtõõli škooultõs- da mättmateriaalkonttâr vueʹjj.

Lââʹssteâđ:
Pirita Näkkäläjärvi
Saaǥǥjååʹđteei
044 7533 766
pirita.nakkalajarvi@samediggi.fi