Sääʹmteeʹǧǧ saaǥǥjååʹđteei kaaunõʹtte väʹlddminister Petteri Orpoin

Sääʹmteeʹǧǧ saaǥǥjååʹđteei (vuäʹljspeäʹlnn), I väärrsaaǥǥjååʹđteei Leo Aikio (kâskka) da II väärrsaaǥǥjååʹđteei Tuomas Aslak Juuso (čiʹǯspeäʹlnn) kaaunõʹtte väʹlddminister Petteri Orpoin (kok) Riikksuåvtõõzz lââʹnnest. Snimldõk: Niina Siivikko / Sääʹmteʹǧǧ

Sääʹmteʹǧǧ da väʹlddminister Petteri Orpo kaaunõʹtte vuõssmõs vuâra tän vaalpââʹjest. Sääʹmteeʹǧǧ eeʹttkõʹstte saaǥǥjååʹđteei Pirita Näkkäläjärvi, I väärrsaaǥǥjååʹđteei Leo Aikio, II väärrsaaǥǥjååʹđteei Tuomas Aslak Juuso, lääʹǩǩpiisar Kalle Varis da saaǥǥjååʹđteei vieʹǩǩteei Niina Siivikko.

Kaaunõõttmõõžžâst saǥstõʹlleš Sääʹmteeʹǧǧ budjeeʹtt, sääʹmteʹǧǧlääʹǩǩeʹtǩǩõõzz da sääʹmvuuʹd jieʹllemviõǥǥ õõudâsviikkâm pirr.

Vuõssmõs saǥstõõllmõš kuõski tõn, što riikkvääraiministeria budjeʹtteʹtǩǩõõzzâst eʹtǩǩeed Sääʹmtegga 568 000 eeuʹr čuõppmõõžžid.

– Puuʹtim väʹlddministeeʹr õuʹdde huõl tõʹst, što eʹtǩǩuum budjeʹttčuõppmõõžž kueʹsǩǩe Sääʹmteeʹǧǧ jiõččvaaldâšm teäggtõõzz da Sääʹmteeʹǧǧ lääʹjjest šiõttuum tuâjaid. Fiʹttjep, što puk âʹlǧǧe vuässõõttâd šeäʹšttma, leša raaukim veâl smiõttâd, vuäitči-a Sääʹmteeʹǧǧ kuõskki čuõppmõõžžid ǩieʹppeed, särnn saaǥǥjååʹđteei Näkkäläjärvi.

Nuʹbben äʹššen leäi sääʹmteʹǧǧlääʹǩǩeʹtǩǩõs, kååʹtt lij vueʹssen väʹlddminister Orpo halltõsprograammâst.

– Saǥstõõlim pueʹrr miõʹlle sääʹmteʹǧǧlääʹǩǩeʹtǩǩõõzz õuddnem pirr. Tuäivaim, što sääʹmteʹǧǧlääʹǩǩeʹtǩǩõõzz ǩiõttʼtõõllmõš eeʹttiǩ-kååʹddest vuäitči juätkkjed vuõiʹǧǧest ååʹn, ǥu oođuum vaal lie õnnum, da što lääʹjj sääʹttet viõʹǩǩe sõõrǥmõõzz mieʹldd. Mušttʼtim še tõn, što äiʹǧǧtaull ij ǩiõllu mâŋŋned, särnn I väärrsaaǥǥjååʹđteei Leo Aikio.

Looppâst saǥstõõlim säʹmmlai dommvuuʹd jieʹllemviõǥǥ õõudâsviikkmõõžžâst.

– Mainstim väʹlddministeera, što Sääʹmteʹǧǧ haaʹlad väʹldded aktiivlab rool sääʹmvuuʹd jieʹllemviõǥǥ õõudâsviikkmõõžžâst. Meeʹst ideaid vaʹldde puârast vuâstta tõn pirr, mõõn nalla õõuʹdeed õuddmiârkkân älššjummšid, maallid da tuâjjneävvaid säʹmmlai põõrǥâsvuõđ tuärjjummša, särnn II väärrsaaǥǥjååʹđteei Tuomas Aslak Juuso.

Lââʹssteâđ:
Pirita Näkkäläjärvi
Saaǥǥjååʹđteei
044 753 3766
pirita.nakkalajarvi@samediggi.fi