Sääʹmteeʹǧǧ saaǥǥjååʹđteei õõʹni saakkvuâr Sääʹm õllškooul ääʹveempooddâst da vuässõõđi Čoarvemátta-raajâlm ääʹveempoʹdde
Snimldõõǥǥâst Kautokeino kåʹddhalltõõzz saaǥǥjååʹđteei Anders Samuelsen Buljo (čiʹǯspeäʹlnn), Taarr Sääʹmteeʹǧǧ halltõõzz vuäzzlaž Mikkel Eskil Mikkelsen, Sääʹm õllškooul rehtor Liv Inger Somby, Lääʹdd sääʹmteeʹǧǧ saaǥǥjååʹđteei Pirita Näkkäläjärvi, Sääʹmrääʹđđ saaǥǥjååʹđteei Áslat Holmberg, Sääʹm õllškooul väärr-rehtor Samuel Valkeapää, Taarr aarktlaž universiteeʹtt väärr-rehtor Bente Haug da Sääʹm õllškooul jååʹđteei Anne-Marie Gaino.
Sääʹmteeʹǧǧ saaǥǥjååʹđteei Pirita Näkkäläjärvi vuässõõđi Sääʹm õllškooul (Sámi allaskuvla) lookkâmeeʹjj 2024–2025 ääʹveempoʹdde seärad 21.8. Kautokeinost Taarr peäʹlnn.
Näkkäläjärvi piti õõʹni ääʹveempooddâst saakkvuâr Lääʹdd Sääʹmteeʹǧǧ da Sääʹm parlamentaarlaž suåvtõõzz saaǥǥjååʹđteeʹjen. Saaǥǥstes Näkkäläjärvi kaaggi Sääʹm õllškooul jõnn miârktõõzz Sääʹmjânnma.
– Âânam samai tääʹrǩes äʹššen, što meeʹst lij jiiʹjjen õllškooul, kååʹtt nåårr õʹhtte nuõrid pirr jõnn Sääʹmjânnam. Âânam tääʹrǩes äʹššen, što meeʹst lij õllškooul, kååʹtt ravsmâtt pukin jiiʹjjes tooiʹmivuiʹm sääʹmǩiõlid, da veekk õõudâs mättʼtõõzz da tuʹtǩǩummuž, kooi tueʹǩǩen lij sääʹm juʹrddemnääʹll. Sääʹm õllškooul ravsmâtt saaʹmid pâʹjjel raaji, säärnai Näkkäläjärvi saakkvuârstes.
Näkkäläjärvi säärnai saakkvuârstes Lääʹdd Sääʹmteeʹǧǧ tuärjjeem Sääʹm õllškooul tääʹvtõõzzid šõddâd universiteʹtten puäʹđlvest.
– Tät nââneʹče jiiʹjjes peäʹlest še säʹmmlai jiõččmeärrummuž.
Ääʹveempooddâst saakkvuâraid õʹnne Sääʹm õllškooul jååʹđteei Anne-Marie Gaino, rehtor Liv Inger Somby, Taarr Sääʹmteeʹǧǧ saaǥǥjååʹđteei Silje Karine Muotka, Sääʹmrääʹđđ saaǥǥjååʹđteei Áslat Holmberg, Kautokeino kåʹddhalltõõzz saaǥǥjååʹđteei Anders Samuelsen Buljo da Taarr aarktlaž universiteeʹtt väärr-rehtor Bente Haug.
Saaǥǥjååʹđteei Näkkäläjärvi vuässõõđi Kautokeinost še Čoarvemátta-raajâlm äävummša. Čoarvemátta lij säʹmmlai meersažteatter Beaivváš Sámi Našunálateáhter di Sääʹm kõskktääʹzz škooul da puäʒʒhåiddškooul ođđ raajâlm.
Čoarvemátta miârkkšââvv čueʹrv maddi, da puõccu čuäʹrvvmaadd-i lij tueʹǩǩen nuʹtt ođđ raajâlm nõõmâst ǥu arkkitehtuurâst.
Lââʹssteâđ:
Pirita Näkkäläjärvi
Saaǥǥjååʹđteei
044 753 3766
pirita.nakkalajarvi@samediggi.fi
