Sääʹmteeʹǧǧ saaǥǥjååʹđteei sâjjsaž Juuso kaaunõõđi Kanada alggmeerai kääzzkõõzzin vaʹstteei ministeeʹrin Aanrest
Kanada alggmeerai kääzzkõõzzin vaʹstteei minister Patty Hajdu kuõʹssji delegaatioines Aanrest täʹlvvmannu 20.–21. peeiʹv. Kueʹssjem ääiʹj delegaatio kaaunõõđi jm. Sääʹmteeʹǧǧ saaǥǥjååʹđteei sâjjsain Tuomas Aslak Juusoin da nuõrisuåvtõõzz väärrsaaǥǥjååʹđteeʹjin Niila-Juhán Valkeapääin.
Ministeri Hajdu delegaatio da Sääʹmteeʹǧǧ kaaunõõttmõš Aanrest täʹlvvmannu 20.peeiʹv. Snimldõk: Johanna Alatorvinen / Saamelaiskäräjät.
– Miõlstan lij fiin, što Sääʹmteʹǧǧ ǩeäss globaal tääʹzzest da mij mõõnniääiʹj õhttsažtuâjj Kanadain kuâsttai ååʹn še tän kueʹssjummšest, särnn Sääʹmteeʹǧǧ saaǥǥjååʹđteei sâjjsaž Juuso.
Vuõssmõs peeiʹv kaaunõõttmõõžžâst tobdstõʹtteš Sääʹmteeʹǧǧ toiʹmmjummša, äʹrbbvuõđlaž jieʹllemvuõʹjjid, nuõrisuåvtõõzz toiʹmmjummša, Sääʹmteeʹǧǧ meeraikõskksaž tuõjju di ǩeâllʼjeei sääʹmturiʹsmme. Sääʹmteeʹǧǧest kaaunõõttmõʹšše vuässõʹtte saaǥǥjååʹđteei sâjjsaž Tuomas Aslak Juuso, meeraikõskksaž aaʹšši piisar Inka Saara Arttijeff, plaanni Kirsi Suomi, saaǥǥtõspiisar Johanna Alatorvinen, saaǥǥjååʹđteei vieʹǩǩteei Niina Siivikko di nuõrisuåvtõõzz väärrsaaǥǥjååʹđteei Niila-Juhán Valkeapää da vuäzzlaž Sárá-Márjá Keskitalo.
– Meeʹst leʹjje miõllǩieʹssi saǥstõõllmõõžž jm. alggmeerai eeʹttkâsttmõõžžâst. Leäm samai räämmast tõn diõtt, što delegaatiost leʹjje mieʹldd še alggmeerai eeʹttkõʹstti da piâzzim jueʹǩǩed jiiʹjjen ǩiõččlâsttmõõžžid, särnn Juuso.
Piâtnâc täʹlvvmannu 21. peeiʹv minister Hajdu delegaatio kueʹssji väärrsaaǥǥjååʹđteei Leo Aikio åʹrnn da tobdstõõđi ââʹldben puäʒʒhåiddma. Lââʹssen saaǥǥjååʹđteei sâjjsaž Juuso vuässõõđi ministeeʹr kååččast stuällõõttmõʹšše, koʹst saǥstõʹlleš säʹmmlai sosiaal- da tiõrvâsvuõttsueʹrjest da psykososiaalʼlaž tueʹrjest. Sääʹmteeʹǧǧest kaaunõõttmõʹšše vuässõʹtte še sosiaal- da tiõrvâsvuõttpiisar Riitta Lehtola-Kosonen di vs. sosiaal- da tiõrvâsvuõttpiisar Anni Koivisto.
Porrmõškaaunõõttmõš Aanrest täʹlvvmannu 21. peeiʹv.
Minister Hajdu delegaatiost mieʹldd ministeeʹr konttrest leʹjje õuddkåʹddšurr (Chief of Staff) Randi Anderson di tåimmjååʹđteei (Director of Operations) Christi Barasaba, kuõʹhtt alggmeereeʹttkõʹstti: Michelle Kovacevic, Associate Deputy Minister (Indigenous Services Canada) di Harold Calla, Executive Chair (First Nations Financial Management Board) da business-maailm eeʹttkõʹstti Dayna Griffiths. Lââʹssen kaaunõõttmõõžžid vuässõʹtte Kanada ambassaad ambassneǩ Janette Stovel, raʹvvjeei Thomas Laith Gagnon da ålggpolitiikk- da diplomattvaʹstteei Helmi Rantala.
Lââʹssteâđ:
Tuomas Aslak Juuso
Saaǥǥjååʹđteei sâjjsaž
040 687 3394
tuomas.juuso@samediggi.fi
Inka Saara Arttijeff
Meeraikõskksaž aaʹšši piisar
050 574 7629 / 010 839 3198
inka-saara.arttijeff@samediggi.fi
