Sääʹm puäʒʒhååid tuärjjummuš ǩeeʹrjuum Euroopp komissio tuʹmmstõʹǩǩe - ”Historiaalʼlaž podd”

Euroopp komissio uuʹdi 9.12.2025 ođđ tiuʹddepiijjâmtuʹmmstõõǥǥ kuõskeeʹl puõccui da puäʒʒouddsi puuʹtʼtõʹsse di kaaup tuõʹllʼjummša Lääʹddjânnmest miõttâmnalla åårrai meersaž tuärj miõttmõõžž (C(2 025) 8 458 final). Šõŋŋtuejjeeʹji da jieʹllikõõvi puäʒʒhoiddu šõõddtem skääđai koʹrvvummuž di sääʹm puäʒʒhååid tuärjjeei tååimaid kuõskki tåimmklaʹsse lij vaʹrrjum õhttsiʹžže 10 miljoon eeuʹr eeǥǥlaž mieʹrrteäʹǧǧlaakk.

– Tät lij historiaalʼlaž podd sääʹm puäʒʒhoiddu. Tät ǩeeʹrjummuš oudd miʹjjid tuäiv tõʹst, što Lääʹdd riikk haaʹlad še õõuʹdeed ođđ tuärjjmaallid sääʹm puäʒʒhååid jieʹllemviõǥǥ seeiltem õuʹdde. Nuʹtt-ba haaʹlääm späʹssbõõššâd mädd- da meäʹcctäällministeria tõʹst, što sij lie õõuʹdääm mij ääʹšš Euroopp komissio årra da nääiʹt piijjâm toimmu še puäʒʒtääl puäʹđlvažtuâjj-joouk lopprapoort siâzztõõzzid, tuâtt Sääʹmteeʹǧǧ saaǥǥjååʹđteei sâjjsaž Tuomas Aslak Juuso.

Sääʹmteʹǧǧ kägg, što riikk âlgg staanâd riʹjttjeei teäggtõõzz, što Euroopp komissio tiuʹddepiijjâmtuʹmmstõõǥǥ ǩeeʹrjummuž vueiʹtet ååʹn tuõđi viǥškueʹtted čõõđ sääʹm puäʒʒhååidast. Tiuʹddepiijjâmtuʹmmstõk lij Lääʹddjânnam čõõnni äʹššǩeʹrjj da tõn diõtt riikk âlgg tâʹlles altteed aktiivlaž vuârrsaǥstõõllmõõžž da õhttsažtuâj Säʹmmlai dommvuuʹd paalǥâskooʹddi, Sääʹmpalggâz rõ:in da Sääʹmteeʹǧǧin tõʹst, mäʹhtt tuʹmmstõõǥǥ vuäitčet pueʹrmõõzz mieʹldd piijjâd toimmu.

– Håʹt sääʹm puäʒʒhååid tuärjjtååimaid kuõskki ǩeeʹrjummuš lij ååʹn vuåǯǯum Euroopp komissio tiuʹddepiijjâmtuʹmmstõʹǩǩe, tuâjj tõn čõõđ viikkma tuõđi älgg eman ååʹn. Ääʹšš õõudummuš tuärjjad vuõiʹǧǧest še eman õlmstõttum säʹmmlai tuõttvuõtt- da suåvâdvuõttkomissio rapoort toiʹmmeʹtǩǩõõzzid puäʒʒhååid kuõskeeʹl,  juätkk Juuso.

Seämma tiuʹddepiijjâmtuʹmmstõõǥǥâst Euroopp komissio kaaggi jõnn-naauʹdi šõõđđtem skääđai koʹrvvõslaaǥǥ 10 miljoonâst 12 miljooʹne, di äʹrbbvuõđlaž puäʒʒtäällriâšldõõǥǥi investâʹsttemtuärjjõʹsse da tuõʹllʼjummša vaʹrrjum meersaž mieʹrrtieʹǧǧ jäänmõsmeäʹr 2,4 miljooʹne eurra. Sääʹmteeʹǧǧ vuäinnmõõžž mieʹldd pââjõõzz meersaž mieʹrrtieʹǧǧi jäänmõsmieʹrid mâʹnne ååʹn jurddum årra, leša jie riʹjtte juuʹrdeeʹl õuddmiârkkân mââimõs iiʹjji õuddnummša jõnn-naauʹdi tuejjeem puäʒʒskääđaid kuõskeeʹl.

Lââʹssteâđ:

Tuomas Aslak Juuso
saaǥǥjååʹđteei sâjjsaž
040 687 3394
tuomas.juuso@samediggi.fi

Laura Olsén-Ljetoff
jieʹllemvueʹǩǩpiisar
040 617 5113 / 010 839 3 123
laura.olsen-ljetoff@samediggi.fi