Sääʹmnuõr tuäivva õõutsââʹjest åårrmõõžž da sääʹmǩiõllsaž toiʹmmjummuž – De! 2 -haʹŋǩǩõõzz kõõjjõõllmõõžžin kaartʼtum nuõri tuõivvjid âsttääiʹjtoiʹmmjummšin  

De! 2 -haʹŋǩǩõõzzâst kaartʼteš nuõri tuõivvjid kuuleeʹl sääʹmǩiõllsa âsttääiʹjtoiʹmmjumša.  Kõõjjõõllmõõžž vuâđald nuõr tuäivva jäänmõsân sääʹmǩiõllsaid nuõri jeäʹǩǩääid da õõutsââʹjest åårrmõõžž jeärrsi sääʹmnuõrivuiʹm. Sääʹmnuõrid ǩieʹssi ääʹšš kõõjjõõllmõõžž vuâđald leʹjje liikkummuš, äʹrbbvuõđlaž tääid da ålgganåårrmõš.  Kõõjjõõllma vaʹsttääm jäänmõs tuäivv toiʹmmjummuž jäʹrjstum jiiʹjjes dommsiidâst.  

– Kõõjjõõllmõõžž vuâđald nuõr tuäivva õõutsââʹjest åårrmõõžž jeärrsi sääʹmnuõrivuiʹm di pääiʹǩ, koʹst vuäitt pâi åårrad. Haʹŋǩǩõõzz kõõjjõõllma pueʹtte 97 vaʹsttõsâd da leäʹp vaʹsttõõzzi meärra čuuʹt toođvaž. Põrggâp vaʹstteed haʹŋǩǩõõzzâst nuõri tuõivvjid, nuʹt što nuõrin lij hiâlpp vuässõõttâd toiʹmmjummša, mainstââll haʹŋǩǩõõzz projeʹktt-tuâjjlaž Anni Saara Aikio.  

De!2-haʹŋǩǩõõzzâst lij jottum čõõuč ääiʹj uuʹccab siidin da toiʹmmjummuž lij jäʹrjstum tän räjja Vuâččast, Karesâvvnest da Čeʹvetjääuʹrest.   

– Kålgg-skamm-mannu ääiʹj toiʹmmjummuž jäʹrjstet veiddsanji pirr sääʹmvuuʹd. Pueʹttmen lij jeeʹrab mieʹldd tolstõõllmõš, speâlljeäʹǩǩää da ålgganåårrmõš. Õhttsažtuâjast Jutaava Duodji haʹŋǩǩõõzzin jäʹrjstet Âʹvvlest reeʹppiǩčuõlmmeemkuurs. Lââʹssen plaanân lij reiss Karasjooǥǥ da Kautokeino ǩiõtt-tuâjjmarkknid, särnn Aikio.  

Nuõrisuåvtõs õlmstâtt nuõrituâjj–seiddõõzz haʹŋǩǩõõzz tuärjjan neʹttseeidaines. Seiddõõzzâst čuäjtõõlât nuõrisuåvtõõzz toiʹmmjemnaaʹlid, koivuiʹm tõt pârgg  raaveed sääʹmǩiõllsaž nuõritååim. Seiddõõzzâst lij jm. ideabokss, koozz nuõr vuäiʹtte piijjâd ideaid, tuõivvjid da eʹtǩǩõõzzid toiʹmmjummšest. Lââʹssen seiddõõzzâst lij šõddmõõžžid jiiʹjjes vueʹss, koozz noorât nuõrisuåvtõõzz haʹŋǩǩõõzz pueʹtti tååimaid.  

Sääʹmteeʹǧǧ vaalpââʹj toiʹmmjemprograammâst nuõrid kuõskki täävtõõzzid lij kaggum sääʹmǩiõllsa da –kulttuur meâldlaž nuõri âsttääiʹj tååim raavummuš. Sääʹmteeʹǧǧ nuõrisuåvtõs lij vuäǯǯam nuõrituâj õõuʹdeemhaʹŋǩǩõʹsse 46 500 € teäggtõõzz Lappi vuʹvddvaaldâšmkonttrest. Haʹŋǩǩõõzz tuejjeet 1.1.2024–31.12.2025 kõõsk õhttsažtuâjast Sääʹmvuuʹd kooʹddivuiʹm, Sääʹm škooultemkõõskõõzzin da nuõrikõõskõs Vasatokkain. 

Haʹŋǩǩõõzz toiʹmmjummuž vuäitt seuʹrrjed sosiaalʼlaž mediast haʹŋǩǩõõzz Instagram-seeidain @de_astoaiggedoaibma. 

Lââʹssteâđ: 

Anni Saara Aikio
De! 2-haʹŋǩǩõõzz projeʹktt-tuâjjlaž
anni-saara.aikio(at)samediggi.fi
teʹlf. 044 9013500                                                  

Elli-Marja Hetta
Nuõripiisar
elli-marja.hetta(at)samediggi.fi
teʹlf. 050 3825179