Sääʹmteʹǧǧ vuässõõđi vuâđđškooul visiorapoort õlmstâʹttempoʹdde Heʹlssnest 11. täʹlvvmannust
Vuâđđškooul 2045: Jieʹllem vääras -visio luõvteš mättʼtõsminister Anders Adlercreutza Heʹlssnest 11.2.2026. Sääʹmteeʹǧǧ pooddâst eeʹttkõõʹsti Maarit Kiprianoff. Visio mieʹldd vuâđđškooul tuâjjan lij šõddeed da täätt ââʹnned äuʹǩǩen teâđ õhttsaž pueʹr ooudâsviikkmõʹšše.
Sääʹmteeʹǧǧest poʹdde vuässõʹtte škooultõs- da mättmateriaal-luʹvddkååʹdd väärrvuäzzlaž Maarit Kiprianoff da škooultõspiisar Bigga-Helena Magga.
Visio kõskksaž juurd lij, što ravvâz vuâđđteâđ da -tääid õhttne eettlaž, sosiaalʼlaž da soojjlõs jorddmõõžž tääidaid di oʹdde ohjjeed jiijjâz mättjummuž. Teknologia jåʹttlõs ouddnummuš, ekolooglaž kriis da õhttsažkååddlaž jerrâttmõš ǩeâšttjâʹtte škooultõõzz vuâđđtuâj. Škooul roolân ij leäkku valmšted nuõrid pueʹttiääiʹj muttsid, pâi valmšted jieʹllem vääras da uʹvdded oddvuõđ muʹtted maaiʹlm.
Sääʹmǩiõl da kulttuur liâ pieʹǩǩ lopprapoort da rapoortâst tuõđât: ”Sääʹmǩiõl da kulttuur liâ miârkteei pieʹǩǩ meersaž määŋgnallšemvuõđ da reeʹǧǧes kulttuursa historia da ânnʼjõžpeeiʹv. Sääʹmǩiõli beäʹlnn teäddââvv pueʹttiääiʹjest oouʹdab jeänab tõt, što veâl šõddi jäänbõsmieʹrr sääʹmpäärnain jäälast säʹmmlai dommvuuʹd åålǥbeäʹlnn. Sääʹmǩiõli jieʹllemviõkksažvuõđ tuõrvvmõš õõlǥat kuʹǩesäiggsaž räʹtǩǩummšid, kook väʹldde lokku mottjeei jieʹllemjååttmõõžž da škooulniiʹǩǩi taarbid.”
Saǥstõõllâmkååʹdd saaǥǥjååʹđteeʹjj luõvat rapoort mättʼtõsministeriaaʹje. Snimldõk: OKM / Elviira Säkkinen
Vuâđđškooul pueʹttiääiʹjtuâjj kõõsktõõvi iiʹjjid 2023−2025. Sääʹmteeʹǧǧ eeʹttǩeeʹjen saǥstõõllâmkååʹddest leäi škooultõspiisar Bigga-Helena Magga. Saǥstõõllâmkååʹdd lââʹssen leʹjje jurddjid raajjmen, kommentâʹsttmen da raajjmen visio jeeʹresnallšem kuullmõõžži pääiʹǩ samai jõnn ooumažmieʹrr.
Visiotuâj kuõʹddi jurddjen liâ leämmaž vuâđđškooul raavâsvuõđ:
- pukid õhttsaž määusteʹmes da õõlmâsteäggtemvuâlaž vuâđđškooul,
- rehtor da uʹčteeʹl, kook vaʹsttee škooultåimmjummšest,
- tuʹtǩǩummša vuâđđõõvvi uʹčteeʹlškooultõs da škooul ooudâsviikkmõš, di
- uʹčteeʹl autonomia da pedagooglaž väʹlddvuõtt.
Visio teäddad eeʹjj 2045 vuâđđškooulâst täidd- da čeäppõsaunnsid, liikkummuž da varddaivuõđ, škooul määŋgpeällsaž tåimmjummuž, kååʹtt âânn seʹst mättʼtõõzz da šõddummuž lââʹssen ouddmiârkkân škooulporrmõõžž, mättʼtõõttihuâl da jeeʹres tääʹssäärv oouʹdeei tåimmjummšid di âʹlddškooul da škooulraajâlm, koʹst vueiʹtet vueiʹnned nuuʹbbid muâtt muâttja di škooul, kååʹtt oudd tueʹrj ooumžen ravsmed.
Lââʹssteâđ:
Bigga-Helena Magga
Škooultõspiisar
040 570 2786 / 010 839 3121
bigga-helena.magga@samediggi.fi
