Sääʹmteʹǧǧ ååcc restrantt-tuâjjla Restrantt Čaijuuʹje

Sääʹmkulttuurkõõskõs Sajoozzâst Aanrest sâjjdâtt Restrantt Čaiju, kååʹtt tåimm kulttuurkõõskõõzz restranttân da Sajoozz šõddmõõžži da såbbri resttranttkääzzkõõzzin vaʹstteei puuʹtʼteeʹjen. Resttrantt Čaiju lij äävai arggpeeiʹvi peiʹvvporrmõš- ja kååʹffpäiʹǩǩen, leša pieʹǩǩ resttrantt Čaiju juõʹǩǩpeivvsaž tuâjain nårrai såbbri da jeeʹresnallšem kulttuurkõõskõõzzâst ââʹnnem šõddmõõžži kååʹff da porrmõõžži taʹrjjummšest. Restraantâst reâugga ååʹn põõšši juõʹǩǩpeivvsaž tåimmjummšest vaʹstteei restrantt-tuâjjlaž da kokk.

Restrantt-tuâjjla määŋgpeällsaž tuâjaid koʹlle peiʹvvporrmõõžž da kååʹffhääʹrči raajjmõš, sååbbar- da noorõõttmõõžžin taʹrjjeem porrmõõžž, äʹššneǩ-kääzzkõs da jeeʹres restraant takai juõʹǩǩpeivvsaž tuâj.

Kääzzkõskõskkvuõđ teâđ

Tuâjj älgg suåppmõõžž mieʹldd 1.1.2026 da tõt lij mieʹrteʹmes ääiʹj viõǥǥâst åårrai.

Tuâj teâuddmõõžžâst jääʹǩǩtet kuuđ määnpââʹj ǩiččlõddâmääiʹj.

Tuâj tueʹjjeet Sääʹmkulttuurkõõskõs Sajoozzâst, Aanrest. Tuâjjäiʹǧǧ lij tääuʹjmõsân arggpeeiʹvi 8–16.

Ooʒʒjest vueʹrddep

Šiõttõsvuâđlaž ââʹntemkaiʹbbjõssân lij tuâj õõlǥtem suåppi škooultõs da lââʹssen õõlǥtet sääʹmǩiõl täidd (asetõs 1727/95). Tuâj oʹnnsteeʹjes håiddmõš õõlǥat restranttsueʹrj škooultõstuâǥǥa, tuâjjǩiõččlâsttmõõžž vaʹstteei tuâjain, hygienia- da alkoholpaass di njueʹbǯǯlõsvuõđ di pueʹrr äʹššneǩ-kääzzkõstääidaid. Riʹjttjeei eŋgglõsǩiõl täidd ǩiõččât pueʹrren.

Päʹlǩǩ

Päʹlǩǩ mieʹrrââvv Sääʹmteeʹǧǧ paʹlǩǩ-klassriâžldõõǥǥ väʹǯǯelvuõtt-tääʹzz VI/II mieʹldd (vuâđđpäʹlǩǩ obbtuâjjaaiʹjin 2192,12 euʹrred/mp). Vuâđđpääʹlǩ lââʹssen määuʹset säʹmmlai dommvuuʹdest tuâj tuejjeen 24 % sääʹmvuuʹd lââʹss da tuâjjǩiõččlâsttmõõžž mieʹldd mieʹrrõõvi ǩiõččlâʹsttemlââʹzz.

Ooccmõš

Ooccmõšlomakk, di jiijjâs maall meâldlaž ooccmõšǩeʹrjj di vueiʹtlvaž tuâjjpäiʹǩǩloǥstõk da jeeʹres meâlddõõzz âʹlǧǧe tååimted Sääʹmteeʹǧǧ piisarkådda 7.12.2025 mõõneeʹst tän liâdǥlaž ooccâmlomaakk pääiʹǩ (ävvan ođđ ikkna). Ooccmõšlomakk

Lââʹssteâđaid tuâjast ouʹdde vaaldâšmjååʹđteeʹjj Pia Ruotsala-Kangasniemi, pia.ruotsala(at)samediggi.fi, teʹl. 040 726 2688 di markknâʹsttemjååʹđteei Oula Guttorm, oula.guttorm(at)samediggi.fi, teʹl. 040 575 5332

Sääʹmteeʹǧǧ tåimmjummša vuäitt tobdstõõttâd neʹttaddrõõzzâst www.samediggi.fi

Aanrest 7.11.2025
Sääʹmteʹǧǧ