Tuomas Aslak Juuso tåimm saaǥǥjååʹđteeʹjj Pirita Näkkäläjärvi sâʹjjsiʹžžen tän puärssiluõvâsvuõđ poodd

Sääʹmteeʹǧǧ saaǥǥjååʹđteeʹjj-joukk lij suåppâm saaǥǥjååʹđteeʹjj Pirita Näkkäläjärvi puärssiluõvâsvuõđ äiggsaž sâʹjjsažriâššmõõžžâst.

Näkkäläjärvi sâʹjjsiʹžžen puärssiluõvâsvuõđ poodd tåimm II väärrsaaǥǥjååʹđteeʹjj Tuomas Aslak Juuso. Saaǥǥjååʹđteeʹjj Näkkäläjärvi sektorvasttõõzz liâ juõkkum I väärrsaaǥǥjååʹđteeʹjj Leo Aikiooʹje da II väärrsaaǥǥjååʹđteeʹjj Tuomas Aslak Juusooʹje. Skamm-mannust suåppum väärrsaaǥǥjååʹđteeʹji jiijjâs sektorvasttõõzz di saaǥǥjååʹđteeʹjj-joouk õhttsaž vasttõsvuuʹd pâʹšše lââʹssen nuʹt mâta ååʹn liâ.

Listt saaǥǥjååʹđteeʹjj-joouk vasttõsjuâǥǥast käunnai tän teâđtõõzz looppâst.

Sâʹjjsažriâššmõõžž šâʹdde viõʹǩǩe ođđeeʹjjmannust 2025, tâʹl saaǥǥjååʹđteeʹjj Näkkäläjärvi kuâđđai puärssiluõvâsvuõʹtte. Sâʹjjsažriâššmõõžž jääʹǩǩtet taarbšeen juʹn ääiʹjab, jõs saaǥǥjååʹđteeʹjj lij veʹrǧǧluõvâsvuõđâst.

– Leäʹp saaǥǥjååʹđteeʹjj-joukkân tååđva sâʹjjsažriâššmõõžžid da ouddâl puki tõõzz, što piâssâp plaaneed puõʹtti eeʹjj vueiʹtlva ääiʹjeld. Tät täʹǩǩad juätkkjemvuõđ da čiõlggvuõđ, ǥu äʹlǧǧep viikkâd čõõđ tåimmamplaan väʹlddteäddaid puõʹtti eeʹjj aalǥâst, särnn Sääʹmteeʹǧǧ saaǥǥjååʹđteeʹjj Pirita Näkkäläjärvi.

Juõʹǩǩ saaǥǥjååʹđteeʹjj-joouk vuäzzla vasttõzzin liâ jiijjâs vasttõs-sektooʹres ciâlkâlm, eʹtǩǩõõzz, aalǥtõõzz da peäʹlestvälddmõõžž di jeeʹres vaʹstteei äʹššǩeeʹrj.

Vueʹlnn listt vasttõsvuuʹdin puärssiluõvâsvuõđ poodd:

Tuomas Aslak Juuso: 

• obbvasttõs da šoorab proseeʹss
• budjeʹttääʹšš
• meeraikõskksaž tåimmjummuš
• EU-ääʹšš
• sääʹmǩiõl
• ouddpeâmm
• škooultõsääʹšš
• sosiaal- da tiõrvâsvuõtthuâll
• õhttsažtuâjj Lappi pueʹrrvââjjamvuuʹdin
• jeeʹres sosiaalstaan
• parlameʹnttjoouki õhttsažtuâjjorgaan saaǥǥjååʹđteeʹj tuâj
• nuõriääʹšš
• gååradsäʹmmlai ääʹšš
• âʹbrrsuõjjääʹšš

Leo Aikio:

• jieʹllemvueʹǩǩ-, vuõiggâdvuõtt- da pirrõsääʹšš
• sääʹmturismm
• aanarsäʹmmlaiääʹšš
• jieʹllemvueʹǩǩniiʹǩǩi sosiaalstaan
• Teän kuõskki ääʹšš
• Lappi-suåppâmproseʹss
• kåʹddõhttsažtuâjj
• kulttuurääʹšš
• pärnaikulttuur-, jieʹllikartt- ja musikk-kõõskõståimmʼmõš, Duodji-akatemia
• kulttuuräʹrbb

Saaǥǥjååʹđteeʹjj-joukk õõutsââʹjest:

• sääʹmteʹǧǧlääʹǩǩoođummuš
• äimmõsmuuttâs, luâttjaauk
• tuõttvuõtt- da suåvâdvuõttproseʹss
• tâʹvvjânnmallaš sääʹmsuåppmõš

Lââʹssteâđaid ouʹdde:

Pirita Näkkäläjärvi
saaǥǥjååʹđteeʹjj
044 7533 766
pirita.nakkalajarvi@samediggi.fi

Leo Aikio
I väärrsaaǥǥjååʹđteeʹjj
040 621 6505
leo.aikio@samediggi.fi

Tuomas Aslak Juuso
II väärrsaaǥǥjååʹđteeʹjj
040 687 3394
tuomas.juuso@samediggi.fi