Kela ođđ sääʹmǩiõl da kulttuur lokku vaʹlddi miõltiõrvâsvuõttsäursmâttmõš lij jåʹttʼjam – Sääʹmteʹǧǧ mieʹldd ooudâsviikkâmtuâjast
Meerjeältõkstrooiʹtel lij jåʹttʼtam ođđ sääʹmǩiõl da sääʹmkulttuur lokku vaʹlddi miõltiõrvâsvuõttsäursmâttmõõžž ǩiõččlõddmõõžž. Njuhččmannust 2026 älggam kääzzkõs lij jurddum tuâjjâkksaž sääʹmǩiõllsaid di tõid, kook taarbše säursmâttmõõžž sääʹmkulttuur vueʹlǧǧemsõõʹjin.
– Oouʹduum säursmâʹttemkääzzkõs lij õhtt ouddmiârkk konkreettlaž lääuʹǩest Kela da Sääʹmteeʹǧǧ kuuʹǩǩ juätkkjam õhttsažtuâjast. Ââʹnnep vääžnʼjen, što kääzzkõõzzid raajât sääʹmõutstõõzz taarbid da nääiʹt oouʹdeet õõutverddsažvuõđ sosiaal- da tiõrvâsvuõttkääzzkõõzzin, särnn Sääʹmteeʹǧǧ 2. väärrsaaǥǥjååʹđteeʹjj Tuomas Aslak Juuso.
Säursmâttmõõžž täävtõssân lij jm. lââʹzzted teâđaid puârastvââjjmõʹšše da tåimmamoʹdde vaaiktem aaʹššin, tueʹrjjeed viõkkväärai raavšummuž di taʹrjjeed spraavdõõttâmkuånstid jiijjâz jieʹllempoʹdde. Sääʹmǩiõllsaž miõltiõrvâsvuõttsäursmâttmõš lij määustem da peštt nuʹt õõut eeʹjj. Tõt âânn seʹst õhttjõõzzlaž vueiʹnnlõttmõõžžid, joukksäursmâttmõõžž di õhttsažtuâj äʹššneeʹǩǩ âʹlddoummui da aarǥ säimmõõzzivuiʹm. Kääzzkõõzz vueiʹtet viikkâd čõõđ njueʹbǯǯlânji äʹššneeʹǩǩ arggpirrõõzzâst, ougglõsõhttvuõđin leʹbe kääzzkõspuuʹtʼteeʹj sõõʹjin.
– Leäʹp tååđvaž tõõzz, što Kela lij čõnnõõttâm sääʹm-meer spesiaaltaarbi lokku välddmõʹšše. Säursmâʹttemkääzzkõs vaʹsttad taʹrbbe ooudâs viikkâd sotikääzzkõõzzid, koin säʹmmlai ǩiõlʼlaž da kulttuursaž vuõiggâdvuõđ tuõrvât, juätkk väärrsaaǥǥjååʹđteeʹjj Juuso.
Säursmâttmõš lij čõõđ vikkum Kela Säursmâttmõš sääʹmǩiõllsaid -ooudâsviikkâmprojeeʹkt da Sääʹmteʹǧǧ lij vuässõõttâm ooudâsviikkâmtuõjju. Sääʹmteʹǧǧ smeʹllkâtt säursmâttmõõžžâst ääuʹǩ vuäǯǯjid ooʒʒõõttâd mieʹldd.
Lââʹssteâđ da raʹvvjõs säursmâttmõʹšše ooʒʒõõttmõõžžâst käunnʼje Kela neʹttseeidain:
- Sääʹmǩiõllsaž miõltiõrvâsvuõttsäursmâttmõš (personäʹššniiʹǩǩid, kela.fi)
- Infolõõstaž: Sääʹmǩiõllsaž miõltiõrvâsvuõttsäursmâttmõš (pdf)
