Sääʹm ǩiõllneäʹttel äävmättčiâss puäʹtte âʹpet– teeʹmmen argg

Mättčiâssi teeʹmmen lij argg. Juõʹǩǩ Lääʹddjânnmest mainstem sääʹmǩiõʹlle, mâta tâʹvvsääʹmǩiõʹlle, aanarsääʹmǩiõʹlle da nuõrttsääʹmǩiõʹlle liâ jiijjâs mättčiâss. Aanarsääʹm čiâss poodd mainstet jiijjâs peeiʹvest, tâʹvvsääʹm čiâss poodd mättʼtõõđât arggpeeiʹv särnnamvuõʹjjid da nuõrttsääʹm čiâss poodd saǥstõõlât arggpeeiʹv ǩiõtt-tuâjain.

Mättčiâssi jurddjen lij lââʹzzted teâttmõõžž sääʹmǩiõlin da seämmanalla še sääʹmkulttuurâst. Mättčiâssi täävtõsjoukkân liâ oudd- da vuâđđmättʼtõõzz škooulneeʹǩǩ da nuuʹbb tääʹzz mättʼtõõđi, leša mättčiâssid vuäǯǯa vuässõõttâd puk koid sääʹmǩiõl ǩeäʹsse. Jõs haaʹlääk vuässõõttâd čiâssid, ij tuʹst taarbâž tõid siltteed ooudbeäʹlnn. Čiâssid vuäitt vuässõõttâd mättjeei jiõččines leʹbe klass obbnes vuäitt vuässõõttâd õhttsaž aparaattâst. Haaʹleen vuäitt vuässõõttâd še juõʹǩǩ mättčieʹsse. Mättčiâssid ij taarbâž iʹlmmtõõttâd.

Mättčiâssid ââʹnet ougglõsõhttvuõđivuiʹm Microsoft Teamsist.

Čiâssi äiʹǧǧtaaul:

Mââibargg 21.10. čiâss 9–9.45
Muu arggpeiʹvv
Uʹčteeʹlen Tuuli Paadar da Laura Ylinampa
Täävtõsjoukk: 0.–3.klaass
Ǩiõll: Aanarsääʹmm
Õhtteemliŋkk: Puäʹđ såbbra teäʹddleeʹl täʹst 

Seärad 22.10. čiâss 9–9.45
Arggpeeiʹv särnnamvueʹjj
Uʹčteeʹlen Joni Saijets, Laura Njunnas da Ida-Maria Helander
Täävtõsjoukk: Pââibužškooul da nuʹbb tääʹss
Ǩiõll: Tâʹvvsääʹmm
Õhtteemliŋkk: Puäʹđ såbbra teäʹddleeʹl täʹst

Neljdpeiʹvv 23.10. čiâss 9–9.45
Arggpeeiʹv ǩiõtt-tuâj
Uʹčteeʹlen Kia Olin da Sirkka Sanila
Täävtõsjoukk: 4.–6. klaass
Ǩiõll: Nuõrttsääʹmm
Õhtteemliŋkk: Puäʹđ såbbra teäʹddleeʹl täʹst

Čiâssin lij še vueiʹtlvažvuõtt kõõččâd kõõččmõõžžid da saǥstõõllâd chaatâst. Mättčiâssid jeät ruõkku.

Õhttvuõttoummu:

Hanna Helander projeʹkttjååʹđteei
hanna.helander@edu.utsjoki.fi
040 701 2094

Anne Olli, projeʹkttkoordinaattor
anne.olli@samediggi.fi
040 687 5989

Lââʹssteâđ Sääʹmǩiõli ougglõsmättʼtõshaʹŋǩǩõõzzâst:

Sääʹmǩiõl ougglõsõhttvuõđid äuʹǩǩeei mättʼtõõzz piʹlotthaʹŋǩǩõs lij Uccjooǥǥ kååʹdd jååʹđtem da Sääʹmteeʹǧǧ koordinâʹsttem haʹŋǩǩõs. Haʹŋǩǩõõzz teäggat mättʼtõs- da kulttuurministeria. Haʹŋǩǩõõzz täävtõssân lij taʹrjjeed sääʹmǩiõli ougglõsõhttvuõđid äuʹǩǩeei mättʼtõõzz vuâđđškooul škooulniiʹǩǩid da nuuʹbb tääʹzz mättʼtõõđjid sääʹmvuuʹd kooʹddi åålǥbeäʹlnn kueʹhtt neäʹttelčiâss da viikkâd ooudâs sääʹmǩiõli ougglõsmättʼtõõzz pedagogiikk. Ougglõsmättʼtõshaʹŋǩǩõõzz mättʼtõs lij tuõttäiggsaž (synkroonlaž) mättʼtõs. Täʹl uʹčteeʹl da ougglõsmättʼtõʹsse vuässõõđi škooulneeʹǩǩ da mättʼtõõđi vuässâʹtte seämma-ääiʹj mättčiâssid jijjjâs ǩieʹččaparaattin, leša fyyslânji jeeʹres paaiʹǩin.

https://www.saamenetaopetus.com/

Lââʹssteâđ sääʹmǩiõli neäʹttlest:

Sääʹm ǩiõli neäʹttel mieʹrren lij kaggâd säʹmmlai ǩiõli statuuzz, da lââʹzzted sääʹm ǩiõli da kulttuur tobddmõõžž ceelai õhttsažkååʹddest. Jeäʹrben tän neäʹttel poodd sääʹm ǩiõl kollʼje da kuâsttje juõʹǩǩsââʹjest.

Sääʹm ǩiõli neäʹttel lij õhttsažhaʹŋǩǩõs, koin puuʹtet tiõttu sääʹm ǩiõlid da lââʹzzted tõi tobddmõõžž ceelai õhttsažkååʹddest. Privatt da õõlmâs stroiʹttlid, põrggsid, organisaatioid da jeeʹres toiʹmmjeeʹjid kååččat puʹhtted tiõttu sääʹm ǩiõlid jeäʹrben tän neäʹttel poodd. Õõutâst väʹlddep šuurab vaʹsttõõzz tõʹst, što sääʹm ǩiõl kollʼje da kuâsttje da tõk lie ââʹnnmest juõʹǩǩsââʹjest õhttsažkååʹdd jeeʹres sueʹrjin.

Sääʹm ǩiõli neäʹttel lij Taar Sääʹmteeʹǧǧ vuõlttõs, kåått lij vueʹssen sij altteem Giellalokten (Ǩiõllkaggâm) ǩiõllstrategia.

https://giellavahkku.org/sms