Sääʹmteʹǧǧ nõõmii vuäzzlaid Lappi pueʹrrvââjjamvuuʹd sääʹmǩiõl luʹvddkådda vaalpâjja 2025-2029

Sääʹmteʹǧǧ nõõmii såbbrest Lappi pueʹrrvââjjamvuuʹd sääʹmǩiõl luʹvddkådda täid vuäzzlaid da siʹjjid jiijjâs-i väärrniiʹǩǩid.

• Iiris Kangas, väärrneǩ Saammâl Morottaja
• Inga Äärelä, väärrneǩ Marjo Magga
• Aslak Pieski, väärrneǩ Markku Porsanger
• Anne-Maria Näkkäläjärvi, väärrneǩ Tuomas Aslak Juuso
• Tinja Semenoff, väärrneǩ Tauno Ljetoff.

Sääʹmteeʹǧǧ sååbbar vaaʹldi lokku nõõmtummšest säʹmmlai ǩiõlʼlaž da vooudlaž joouk di Lappi pueʹrrvââjjamvuuʹd raukkmõõžž meâldlânji pueʹrrvââjjamvuuʹd 76 § meâldla vaalââʹntemvuõđ di tääʹssärvvlääʹjj 4 a §.

Sääʹmǩiõl luʹvddkååʹdd tuâjjan lij:

1) čiõlǥeed, ärvvtõõllâd da ceäʹlǩǩed tõʹst, mäʹhtt vuʹvddvälddõõzz tuʹmmstõõǥǥ vaaikte ǩiõlʼlaž vuõiggâdvuõđi vueʹjj teâuddjummša;

2) čiõlǥeed, ärvvtõõllâd da meäʹrted pueʹrrvââjjamvuuʹd uuʹccbõs joouk-ǩiõlin taʹrjjeem kääzzkõõzzi taarb di seuʹrrjed täi kääzzkõõzzi vuäǯǯamvuõđ da kvaliteeʹtt;

3) čiõlǥtõõzzi, ärvvtõõllmõõžž da seuʹrrjummuž vuâđald tuejjeed vuʹvddhalltõʹsse ehdtõõzzid tåimman ǩiõlluuʹccbõs joouk kääzzkõõzzi da kääzzkõskuällsi ooudâsviikkmõššân di tuâjjlažkååʹdd ǩiõlltäiddõõlǥtõssân da ǩiõlltääid ooudâsviikkmõššân.

Säʹmmla ceerkvest –haʹŋǩǩõõzz ääiʹjpoddsaž teâttan såbbrest

Sääʹmteeʹǧǧ sååbbar kuuli äʹšštobddjid Mari Valjakka da Erva Niittyvuopio Säʹmmla ceerkvest -haʹŋǩǩõõzzâst. Säʹmmla ceerkvest -haʹŋǩǩõs viʹǩǩeš čõõđ Lääʹdd evaŋkeel-luteerlaž ceerkvest iiʹjjin 2023-2024. Haʹŋǩǩõõzz juäʹtǩǩe vueʹssmannu 2025 loʹppe, što haʹŋǩǩõõzzâst valmštõllum antologia, loopptõs-seminaar di juʹhllmessu vuäitčeš viikkâd čõõđ. Haʹŋǩǩõõzz loopptõspooddid jäʹrjsteš Hettast 23.3.2025 da Aanrest 24.3.2025. Juʹhllmessu čõõđviikkâmnallšem suåvâdvuõđ likstõs ââʹnet Turku duõmmceerkvest 8.5.2025.

Sääʹmteeʹǧǧ sååbbar tuʹmmji lââʹssen Sääʹmteeʹǧǧ takaiveäʹǩǩtieʹǧǧ täällarvvlõseʹtǩǩõõzzâst eeʹjj poʹdde 2026, taʹrǩsti Sääʹmteeʹǧǧ paʹlǩǩõsvuâkkõõzz da õõʹni vuõlttõs-saǥstõõllmõõžž kääʹvvtummšest da mäddââʹnnemhaʹŋǩǩõõzzin säʹmmlai kulttuuʹre šõddi vaaiktõõzzi ärvvtõõllmõõžž ooudâsviikkmõõžžâst.

Sääʹmteeʹǧǧ såbbri påʹrddǩeeʹrj õlmstââʹttet dokumeʹnttbaaŋkâst.

Lââʹssteâđ:

Tuomas Aslak Juuso
Saaǥǥjååʹđteeʹj sâjjsaž
040 687 3394
tuomas.juuso@samediggi.fi

Leo Aikio
I väärrsaaǥǥjååʹđteeʹjj
040 621 6505
leo.aikio@samediggi.fi