Uccjooǥǥ kåʹdd da Sääʹmteʹǧǧ õõuʹdee õhttsažtuâjas
Uccjooǥǥ kåʹdd da Sääʹmteʹǧǧ kaaunõʹtte õhttsažtuâj miârkin Uccjooǥǥâst pâʹsslâšttam-mannu 20. peeiʹv 2025. Kaaunõõttmõõžž jurddjen leäi lââʹzzted õhttsaž õuddõsǩiõččmõõžž da õõuʹdeed õhttsažtuâj.
Uccjooǥǥ kåʹdd da Sääʹmteʹǧǧ kaaunõʹtte õhttsažtuâj miârkin Uccjooǥǥâst. Snimldõk: Uccjooǥǥ kåʹdd / Suvi Spoof.
Sääʹmteʹǧǧ lij juätkkam õhttsažtuâjjsåbbri jäʹrjstummuž õõutsââʹjest säʹmmlai dommvuuʹd kooʹddivuiʹm. Nelljdpeeiʹv 20.3.2025 Uccjooǥǥ kååʹdd da Sääʹmteeʹǧǧ eeʹttkõõʹsti kaaunõʹtte Uccjooǥǥâst. Kaaunõõttmõõžž jurddjen leäi õhttsaž õuddõsǩiõččmõõžž di õhttsažtuâj õõudâsviikkmõš. Õhttsaž õuddõsǩiõččmõõžž päiʹǩǩen tobdsteš jm. ougglõsmättʼtõshaʹŋǩǩõõzz põõžžtummuž, Kevo tuʹtǩǩeemsâjldõõǥǥ õõudâsviikkmõõžž da sääʹmǩiõllsa nuõrituâj õõudâsviikkmõõžž.
Kaaunõõttmõõžžâst mõʹnneš čõõđ še jeeʹresnallšem Uccjooǥǥ kådda da Sääʹmtegga ääiʹjpoddsaž aaʹššid. Õõutsââʹjest saǥstõʹlleš jm. ääiʹjpoddsaž mäddââʹnnma, turiʹsmme da jieʹllemvuõʹjjid kuulli aaʹššin di sääʹm ǩiõll-lääʹjj toimmupiijjmest da sääʹmǩiõllsaž nuõrituâjast. Lââʹssen plaaʹneš, mõõnn nalla pueʹreed kõskknaž õhttvuõđ âânnmõõžž puäʹđlvest.
–Tuäivam, što saǥstõõllâmõhttvuõtt sääʹmtiiʹǧǧin seill nânnsen, tõn diõtt ǥu meeʹst lie jiânnai õhttsaž intreeʹss jeeʹrab mieʹldd õuddõsǩiõččmõõžžâst, särnn Uccjooǥǥ kåʹddjååʹđteei Päivi Kontio.
–Späʹssbõõžžam Uccjooǥǥ kååʹdd šiõǥǥ kaaunõõttmõõžžâst. Õhttsažtuâjjkaaunõõttmõõžž säʹmmlai dommvuuʹd kooʹddivuiʹm lie leämmaž tuõđi šiõǥǥ, tõn diõtt ǥu meeʹst lie jiânnai õhttsaž ääʹšš õõudâsviikkâmnalla, särnn Sääʹmteeʹǧǧ vuõssmõs väärrsaaǥǥjååʹđteei Leo Aikio.
Såbbra vuässõʹtte Uccjooǥǥ kååʹddest väʹlddõõzz saaǥǥjååʹđteei Arto Pohjanrinne, halltõõzz saaǥǥjååʹđteei Väinö Guttorm, kåʹddjååʹđteei Päivi Kontio, pueʹrrvââjjamjååʹđteei Pirjo Seurujärvi, âsttäiʹǧǧpiisar Kaisa Tapiola-Länsman da saaǥǥtõs- da turismmkoordinaattor Suvi Spoof di ougglõsõhttvuõđin jieʹllemviõkkjååʹđteei Tanja Lepistö. Sääʹmteeʹǧǧest pääiʹǩ âʹlnn såbbra vuässõʹtte I väärrsaaǥǥjååʹđteei Leo Aikio, halltõõzz vuäzzlaž Asko Länsman, vaaldâšmjååʹđteei Pia Ruotsala-Kangasniemi, jieʹllemvueʹǩǩ- da pirrõslääʹǩǩpiisar Sarita Kämäräinen, ǩiõllstaanpiisar Anne Kirste Aikio da plaanni Kirsi Suomi. Ougglõsõhttvuõđin vuässõʹtte saaǥǥjååʹđteei sâjjsaž Tuomas Aslak Juuso, lääʹǩǩpiisar Kalle Varis, nuõripiisar Elli-Marja Hetta, vs. jieʹllemvueʹǩǩpiisar Maria Valkeapää da saaǥǥtõspiisar Johanna Alatorvinen.
Lââʹssteâđ:
Uccjooǥǥ kåʹdd
Päivi Kontio
kåʹddjååʹđteei
040 744 7630
ouddnõmm.sokknõmm@utsjoki.fi
Sääʹmteʹǧǧ
Leo Aikio
I väärrsaaǥǥjååʹđteei
040 621 6505
leo.aikio@samediggi.fi
