Sääʹmteʹǧǧ valmštõõđi veerǥlaž saǥstõõllmõõžžid säʹmmlai tuõttvuõtt- da suåvâdvuõttkomissio tåimmeʹtǩǩõõzzin

Sääʹmteeʹǧǧ sååbbar ǩiõttʼtõõli såbbreʹstes 2.11. säʹmmlai tuõttvuõtt- da suåvâdvuõttkomissio tåimmeʹtǩǩõõzzid kuulli obbvuõđ: sååbbar priimi Sääʹmteeʹǧǧ vuâđđeei pieʹllvälddmõõžžid, õõʹni vuõlttõs-saǥstõõllmõõžž ILO õõlmâs-suåppmõš jiõččnaž jânnmi algg- da rooddmeerain nr 169 ratifiâsttmõõžžâst (tåimmeʹtǩǩõs 6), uuʹdi vääʹld Sääʹmteeʹǧǧ halltõʹsse da saaǥǥjååʹđteeikådda häämeed äävai åårrai pieʹllvälddmõõžžid loopp räjja (meädda looǥǥeeʹl pieʹllvälddmõš 6) di uuʹdi saǥstõõllâmvääʹld saaǥǥjååʹđteeikådda da halltõʹsse tuõttvuõtt- da suåvâdvuõttkomissio eʹtǩǩõõzzi tåimmapiijjmest da tõi õõudâsviikkmõõžžâst.

Sääʹmteʹǧǧlääʹjj 9 § meâldlaž saǥstõõllmõõžž parlamentaarlaž tuâjj-jooukin äʹlǧǧe jooulmannu aalǥâst.

– Såbbar tuʹmmstõõǥǥ räʹjje vuâđ Lääʹdd riikkin saǥstõõllmõõžžid. Âânam tääʹrǩes äʹššen, što tåimmeʹtǩǩõõzzi tåimmapiijjmõõžž viiǥǥât ooudårra plaan mieʹldd, kookkas ǩiõččeeʹl da tuõtt õhttsažtuâjast säʹmmlaivuiʹm. Suåvâdvuõđ raajjmõš kaiʹbbai konkreettlaž tuâjaid, särnn sääʹmteeʹǧǧ saaǥǥjååʹđteei Pirita Näkkäläjärvi.

Sääʹmteʹǧǧ ǩiõttʼtõõli pieʹllvälddmõõžžid tåimmeʹtǩǩõõzzin da vaʹsttõõzzid parlamentaarlaž jouʹǩǩe

Säʹmmlai tuõttvuõtt- da suåvâdvuõttkomissio siâzztõõzzid ärvvtõõlli parlamentaarlaž tuâjj-joukk lij tååimtam Sääʹmtegga vuâđđeei pieʹllväʹlddmid tuõttvuõtt- da suåvâdvuõttkomissio tåimmeʹtǩǩõõzzin lokku vääʹldǩâni eʹtǩǩõõzz 16 (sääʹm puäʒʒhåidd) di 62–66 (ceerkvallaž ääʹšš).

Sääʹmteʹǧǧ lij valmštõõllâm jiiʹjjes pieʹllvälddmõõžžid tåimmeʹtǩǩõõzzid da vasttõõzzid parlamentaarlaž tuâjj-joouk vuâđđeei pieʹllvälddmõõžžid, mõõn diõtt ääʹšš ǩiõttʼtõʹlleš 2.11. Sääʹmteeʹǧǧ såbbrest.

Sååbbar priimi Sääʹmteeʹǧǧ pieʹllvälddmõõžžid ǩeâđđa priorisõsttum pieʹllvälddmõõžžid. Täk lie tåimmeʹtǩǩõõzz 1 (sääʹmaaʹšši raavummuš riikkvaaldšmest), 11–13 (äimmõstååim da mieʹcci suõjjlummuš), 19 (kueʹllšeeʹllemvuõiggâdvuõđ), 25 (Tenon kueʹllšeeʹllemǩiõlddi koʹrvvõõzz), 34–35 (psykososiaalʼlaž tuärjj da sosiaal- da tiõrvâsvuõttkääzzkõõzz), 43 (ǩiõl mättjemvuõiggâdvuõtt) da 50–52 (ougglõsõhttvuõđid äuʹǩǩeei mättʼtõs da škooultõsteäggtummuš) di Sääʹmteeʹǧǧ jiiʹjjes, sääʹmvuuʹd jieʹllemviõǥǥ kuõskki eʹtǩǩõs. Lââʹssen sååbbar ǩiõttʼtõõli vuâđđeei pieʹllvälddmõõžžid tåimmeʹtǩǩõõzzid 46 (õuddpeâmm teäggtõs) da 47 (ǩiõllpieʹzzi staanmõš) tõn diõtt, što tõk čårrne čõhččmannust 2026 primmum raammeʹtǩǩõõzzâst iiʹjjid 2028–2031.

ILO 169 -õõlmâs-suåppmõõžž ratifiâsttmõõžž kuõskki tåimmeʹtǩǩõõzz 6 puuʹtet Sääʹmteeʹǧǧ såbbar tuʹmmeemnalla eeʹjj mââimõs såbbrest 17.12.2026.

Tueʹǩǩen tuõttvuõtt- da suåvâdvuõttkomissio loppraportt

Säʹmmlai tuõttvuõtt- da suåvâdvuõttkomissio uuʹdi lopprapoortâs rosttovmannust komissio riikksuåvtõʹsse, Sääʹmtegga da Saaʹmi siidsåbbra. Loppraportt âânn seʹst siâzztõõzzid da tåimmeʹtǩǩõõzzid, koivuiʹm põõrǥât õõuʹdeed suåvâdvuõđ di pueʹreed säʹmmlai tobddâm historiallaš da ânnʼjõž vieʹrrvuõđid.

Sääʹmteʹǧǧ priimi täʹlvvmannust 2026 lopprapoort kuõskki pieʹllvälddmõõžž da meäʹrtõõli tõʹst vuõss-sââʹjest õõudâsviikkâmnalla åårrai eʹtǩǩõõzzid. Looǥǥ Sääʹmteeʹǧǧ peäʹlvälddmõõžž tuõttvuõtt- da suåvâdvuõttkomissio lopprapoortâst (ävvan ođđ kõskklõʹstte).

Sääʹmteeʹǧǧ ođđ vuäzzlaž alttii tuâjstes

Såbbar aalǥâst saaǥǥjååʹđteei tuõđi riikksuåvtõõzz 14.10.2026 uʹvddem tuʹmmstõõǥǥ, koin Anni Koivisto lij miõttum čåuddmõš Sääʹmteeʹǧǧ vuäzzla tuâjast da Paavo Riihitammela mieʹrreeš suu sâjja vuäzzliʹžžen lopp tåimmpââjas leʹbe 30.11.2027 räjja. Koivisto leäi vaʹlljuum Sääʹmteeʹǧǧ vuäzzliʹžžen Aanrest da Riihitammela lij vaʹlljuum Kirkkonummist.

Oula-Antti Labba eʹtǩǩeet muuttâsooccâmluʹvddkååʹdd saaǥǥjååʹđteei vergga

Sääʹmteeʹǧǧ sååbbar tuʹmmii eʹtǩǩeed riikksuåvtõʹsse, što vaal-loǥstõkaaʹšši muuttâsooccâmluʹvddkååʹdd saaǥǥjååʹđteei vergga meäʹrreʹče meäʹrteʹmes ääiǥas vuõiǥâstiõđ maister Oula-Antti Labba. Labba õhttu leäi ooccâm veeʹrj.

Riikksuåvtõs šiõttad muuttâsooccâmluʹvddkååʹdd kuuđ eeǥǥas vuârstes Sääʹmteeʹǧǧ eʹtǩǩõõzzâst. Sääʹmteeʹǧǧ õhttvuõđâst toiʹmmjeei luʹvddkåʹdd âlgg oođuum sääʹmteʹǧǧlääʹjj nuäjja šiõtteed jiõččnaž da čõõnõõđteʹmes tåimmorgaan. Muuttâsooccâmluʹvddkåʹdd toiʹmmai vuõssmõs muuttâsooccâmtääʹssen Sääʹmteeʹǧǧ vaal-loǥstõʹǩǩe välddmõõžž da tõʹst meädda välddmõõžž kuõskki aaʹššin.

Lââʹssteâđ:

Pirita Näkkäläjärvi
Saaǥǥjååʹđteei
044 753 3766
pirita.nakkalajarvi@samediggi.fi