Sääʹmteʹǧǧ ååcc meeraikõskksažaaʹšši sueʹrǧǧäʹšštoobdi veeʹrjsâjjsa
Sääʹmteʹǧǧ iʹlmmat ooccâmnalla meeraikõskksažaaʹšši sueʹrǧǧäʹšštoobdi veeʹrjsâjjsažvuõđ.
Sääʹmteeʹǧǧ meeraikõskksažaaʹšši sueʹrǧǧäʹšštoobdi tuâj liâ looǥǥtõllum Sääʹmteeʹǧǧ tuâjjriâššmõõžžâst pääiʹǩest 51 §. Sueʹrǧǧäʹšštoobdi tuâjjan lij jm. valmštõõllâd säʹmmlai meeraikõskksaž tåimmʼmõõžž kuõskki aaʹššid, tåimmad meeraikõskksaž alggmeer da EU-aaʹšši luʹvddkååʹdd čiõʹlǧǧeeʹjen da piisren, âʹlnn ââʹnned, koordinâʹstted, plaaneed di viikkâd ooudâs teeʹǧǧ meeraikõskksaž tåimmʼmõõžž, mieʹldd looǥǥeeʹl teeʹǧǧ meeraikõskksaž tåimmʼmõõžž kuõskki strategia tiuʹddepiijjmõš, håiddad Sääʹm parlamentaarlaž suåvtõõzz kuõskki tåimmʼmõõžž, vieʹǩǩted teeʹǧǧ tuâjjlažkååʹdd da saaǥǥjååʹđteeʹjid meeraikõskksaž tuâjain da õhttvuõđin.
Kääzzkõskõskkvuõđ teâđ
Veeʹrjsâjjsažvuõtt älgg suåppmõõžž mieʹldd kålggmannust 2026 da peštt aalǥâst eeʹjj 2026 loʹppe, vueiʹtlvânji kuuʹǩǩab. Vueiʹtlvaž juätkast suåvât jeeʹrab.
Tuâj teâuddmõõžžâst jääʹǩǩtet määnpââʹj ǩiččlõddâmääiʹj.
Meeraikõskksaž aaʹšši sueʹrǧǧäʹšštoobdi tuâjj sâjjdâtt Sääʹmteeʹǧǧest takai konttra. Sääʹmteeʹǧǧ tåimmpäiʹǩǩ lij Sääʹmkulttuurkõõskõs Sajoozzâst, Aanrest. Tuâj lij vueiʹtlvaž tuejjeed vuäzzas ougglõstuâjjan.
Ooʒʒjest vueʹrddep
Šiõttõsvuâđlaž ââʹntemõõlǥtõssân lij veeʹrj õõlǥtem škooultõs da lââʹssen õõlǥtet sääʹmǩiõl tääid (Sääʹmteeʹǧǧ tuâjjriâššmõš 71 §). Tuâj oʹnnsteeʹjes håidd õõudldad pueʹrr sääʹmkulttuur ga meeraikõskksaž alggmeeraaʹšši tobddmõõžž, njueʹbǯǯlõs ǩeerjlaž da njäälmlaž õlmmummuž di pueʹrr õhttsažtuâjj- da vuârrvaaiktõstääidaid. Vueʹrddep še vaalmâšvuõđ jiõččnaž tuâj tuejjummša, pueʹrr organisâʹsttem- da teäddǩiõrddâmpâstlvažvuõđ. Ruõccǩiõl da eŋgglõsǩiõl täidd (ǩeerjlaž da njäälmlaž) di tuâjjǩiõččlâsttmõš meeraikõskksaž tuâjain ǩiõččât pueʹrren.
Päʹlǩǩvuõtt
Paʹlǩǩvuõtt meäʹrtââvv Sääʹmteeʹǧǧ paʹlǩǩvuõttriâžldõõǥǥ väʹǯǯelvuõtt-tääʹzz IV/II mieʹldd, vuâđđpäʹlǩǩ 2998,97 euʹrred/mp). Vuâđđpääʹlǩ lââʹssen määuʹset sääʹm dommvuuʹdest tuâj tuejjeen 24 % sääʹmvuuʹd lââʹss da tuâjjǩiõččlâsttmõõžž mieʹldd meäʹrtõõvvi ǩiõččlâʹsttemlââʹzz.
Ooccmõš
Ooccâmlomakk, di jiijjâs maall meâldlaž ooccmõšǩeʹrjj di vueiʹtlvaž tuâjjpäiʹǩǩloǥstõk da jeeʹres meâlddõõzz âʹlǧǧe tååimted Sääʹmteeʹǧǧ piisarkådda 30.9.2026 mõõneeʹst tän liâdǥlaž ooccâmlomaakk pääiʹǩ (ävvan ođđ ikkna).
Lââʹssteâđaid tuâjast oudd vaaldâšmjååʹđteeʹjj Pia Ruotsala-Kangasniemi teʹl. 010 839 3106.
Sääʹmteeʹǧǧ tåimmʼmõʹšše vuäitt tobdstõõttâd addrõõzzâst www.samediggi.fi.
Aanrest 11.9.2026
Sääʹmteʹǧǧ
