Sääʹmteʹǧǧ da Lappi pueʹrrvââjjamvuʹvdd saǥstõʹlle sääʹmǩiõllsaž da kulttuurmeâldlaž soti-kääzzkõõzzin juõʹǩǩekksaž saǥstõõllmõõžžstes
Sääʹmteeʹǧǧ da Lappi pueʹrrvââjjamvuuʹd eeʹttǩeei vueiʹnnlõʹtte Ruäʹvnjaarǥâst 9.6.2026 juõʹǩǩekksaž saǥstõõllmõõžž diõtt. Lappi pueʹrrvââjjamvuuʹd vaaldšemvuâkkõõzz mieʹldd pueʹrrvââjjamvuʹvdd saǥstââll Sääʹmteeʹǧǧin piiri-iiʹjji pueʹrrvââjjamvuuʹd riâššâm sääʹmǩiõllsaž da kulttuurmeâldlaž kääzzkõõzzi riâššmõõžžâst, ooudâsviikkmõõžžâst di tõid õhttneei õhttsažtuâjast, täävtõõzzin da tuâjj-juâǥǥast.
Tän eeʹjj saǥstõõllmõõžžâst ǩiõttʼtõʹlleš ouddmiârkkân sääʹmǩiõllsaž kääzzkõõzzi ooudâsviikkmõõžž teäddceäkldõõzzid ekka 2027, vueʹǩǩ-ǩičldõõǥǥ pueʹrrvââjjamvuuʹd tällõõzz šiõttlâʹttemtååimain di õhttsažtåimm- da saǥstõõllâmproseezz ooudâsviikkmõõžž.
– Šiõǥǥ da vuõiggäiggsaž õhttsažtuâjj nuʹtt valmštõõllmõõžžâst ko tuʹmmstõktuâjast lij kõskksaž, što vueiʹttep staaneed sääʹmǩiõllsaž da kulttuurmeâldlaž kääzzkõõzz õõutverddsânji. Äävai saǥstõõllmõš vieʹǩǩat še nââneed naʹddjõõzz da reagâʹstted muttsid ääiʹjbeäʹlnn, tuâtt Sääʹmteeʹǧǧ II väärrsaaǥǥjååʹđteei Tuomas Aslak Juuso.
Juõʹǩǩekksaž saǥstõõllmõõžžâst mõʹnneš čõõđ še õhttsaž ouddõsǩiõččmõõžž täävtõõzzid. Kuhttu Sääʹmteʹǧǧ da Lappi pueʹrrvââjjamvuʹvdd teäddee, što kääzzkõõzzi kuʹǩesäiggsaž ooudâsviikkmõš ouddlâstt tååimaid še riikktääʹzzest, jeäʹrben sääʹmǩiõllsaž kääzzkõõzzi teäggtõõzz nâânummuž diõtt di tuâjjlažkååʹdd vuäǯǯmõõžž pueʹrummuž diõtt.
– Lappi pueʹrrvââjjamvuuʹd lääʹjjest mieʹrruum tuâjj lij tueʹrjjeed sääʹmǩiõllsaž sosiaal- da tiõrvâsvuõtthuâl kääzzkõõzzi ooudâsviikkmõõžž obb jânnmest. Riʹjttjeei da snäätnai teäggtõs tän tuâj håiddmõʹšše lij vääžnai õhttsaž ouddõsǩiõččâmtäävtõs, tuâtt pueʹrrvââjjamvuʹvddjååʹđteei Jari Jokela.
Lappi pueʹrrvââjjamvuuʹdest saǥstõõllmõʹšše vuässõʹtte pueʹrrvââjjamvuʹvddjååʹđteei Jari Jokela, peälštemjååʹđteei Markus Aarto, tuäʹrjjkääzzkõõzzi tåimmsueʹrǧǧjååʹđteei Mikko Häikiö, sosiaal- da tiõrvâsvuõttkääzzkõõzzi tåimmsueʹrǧǧjååʹđteei Miia Palo, sotikõõskõskääzzkõõzzi vasttõsvuʹvddjååʹđteei Antti Alaräisänen, sääʹmǩiõllsaž da kulttuurmeâldlaž kääzzkõõzzi vaʹsttõsjuâǥǥasjååʹđteei Tuuli Miettunen da sääʹmǩiõllsaž da kulttuurmeâldlaž kääzzkõõzzi kääzzkõs-šurr Kati Mikkola. Sääʹmteeʹǧǧ eeʹttǩeeʹjen saǥstõõllmõõžžâst leʹjje II väärrsaaǥǥjååʹđteei Tuomas Aslak Juuso, sosiaal- da tiõrvâsvuõttluʹvddkååʹdd väärrsaaǥǥjååʹđteei Ulla Maarit Magga, vs. sosiaal- da tiõrvâsvuõttaaʹšši spesiaaläʹšštobddi Anni Koivisto di II väärrsaaǥǥjååʹđteei spesiaalvieʹǩǩteei Minna Näkkäläjärvi.
Lââʹssteâđ:
Tuomas Aslak Juuso
II väärrsaaǥǥjååʹđteei
+35840 687 3394
Jari Jokela
pueʹrrvââjjamvuʹvddjååʹđteei
+35840 532 3998
jari.jokela@lapha.fi
