Sääʹmteʹǧǧvaali ođđ neʹttseeid lie õlmstõttum
Sääʹmteeʹǧǧ vaalid lie ääʹvuum jiijjâz neʹttseeid. Seeidain kaaunak vuâđđteâđaid sääʹmteʹǧǧvaalin da mõõntõõllâm vuäʹppõõzzid nuʹtt võboršiiʹǩǩid ko še jiõnsteeʹjid.
Oođuum seiddõʹsse piâzzak tobdstõõttâd addrõõzzâst vaalit.samediggi.fi/vaal/. Vaalseeidaid piâzzak Sääʹmteeʹǧǧ neʹttseeidai pääiʹǩ še.
Vaalid õhttneei teâtt lij norrum ođđ seiddõõzz mieʹldd õõutsâjja čiõlggsubun da veiddsubun ko ouddâl. Seeidai mieʹrren lij hiâlpted teâđ kaunnmõõžž di taʹrjjeet kaʹtti obbvuõđ pukid, kook åʹcce teâđaid vaalin. Seeidain kaaunak vuäʹppõõzzid jeäʹrbi mieʹldd
- vaal-loǥstõʹǩǩe ooʒʒõõttmest
- võboršeʹǩǩen äʹlǧǧmest
- da jiõnstummšest.
Täʹst ooudårra sääʹmteʹǧǧvaalid õhttneei teâtt, vuäʹppõõzz da lomaakk käunnʼje vaali seiddõõzzâst.
Ooʒʒõõttâmlomaakk eeʹjj 2027 sääʹmteʹǧǧvaali vaal-loǥstõʹǩǩe õlmstââʹttet seeidain ǩieʹzz ääiʹj. Tän tuejjeet tõn mâŋŋa, ko vuõiggâdvuõttministeria ođsmam asetõs sääʹmteeʹǧǧ vaalmõõntõõllmest lij puättam viõʹǩǩe. Ooʒʒõõttmõõžž äʹlǧǧmest teâđtet jeeʹrab.
Lââʹssteâđ:
vaal-luʹvddkååʹdd koontâr
vaalit@samediggi.fi
