Legal terminology of administrative laws in the Northern Sámi in Finland and Norway -prošeakta
Sámediggi lea ožžon EU:a Interreg Aurora prošeaktaruhtadeami juridihka terminologiija ovddideami várás davvisámegillii. Prošeavtta dárkkuhussan lea ovddidit davvisámegiela juridihkalaš hálddahusterminologiija sámiid vuoigatvuođadorvvu buorideami dihte. Prošeavtta mihttomearrin lea maiddái sihkkarastit hálddahuslágaid jorgalusaid kvalitehta ja ovttaiduhttit sámi juridihkalaš giela badjel rájáid. Prošeavtta bokte geahččaluvvojit ovddiduvvot hálddahuslaš juridihkatearpmat nu, ahte jorgaluvvojit Norgga ja Suoma deháleamos hálddahuslágat davvisámegillii. Prošeavtta áigge kártejuvvojit maiddái Norgga ja Suoma juridihkalaš instánssaid davvisámegiela juridihkaterminologiija dárbbut.
Juridihkaterminologiija ovddideapmi lea dehálaš, daningo dat ovddida ee. dárkilvuođa, čielggasvuođa, riektesuoji, diehtojuohkima beaktilvuođa, lága čuovvuma, juridihkalaš vuoigatvuođaid seailuma ja riektegeavada systemáhtalašvuođa. Ipmirdemiin ja geavahemiin juridihkaterminologiija beaktilit, ovttaskas olbmot ja institušuvnnat sáhttet ovddidit riektevuogádaga čavddisvuođa ja vuoiggalašvuođa.
Prošeaktaáigi lea 1.5.-31.12.2024. Prošeaktabargin prošektii lea válljejuvvon ODM ja jorgaleaddji Anne Nuorgam. Prošeavttas vástida Suoma Sámediggi ovttas Sámi ealáhus- ja guorahallanguovddáš SEG:in.
Davvisámegiela geavaheamis hástalusat vuoigatvuođalaš organisašuvnnain Suomas ja Norggas
Sámedikkit ja Sámi ealáhus- ja guorahallanguovddáš (SEG) leat dahkan jearahallama, man mihttomearrin lei gártet virgeoapmahaččaid ja vuoigatvuođasuorggi organisašuvnnaid dárbbuid davvisámegiela geavaheami ektui Suomas ja Norggas. Jearahallan lei 1.5.-31.12.2024 ollašuhtton Interreg Aurora bakte ruhtaduvvon Legal terminology of administrative laws in the Northern Sámi in Finland and Norway – prošeavtta oassi. Prošeavtta mihttomearrin lea leamaš ovddidit sámegielat juridihkkaterminologiija ja buoridit sámegiela sajádaga virgeoapmahaččaid diehtojuohkimis.
Jearahallama bohtosat čájehit, ahte vaikke muhtin organisašuvnnat geavahit davvisámegiela áššebáhpáriin ja neahttasisdoaluin, de jorgalan- ja dulkondárbbut leat ain mearkkašahttit. Erenomáš dárbu lea hálddahuslaš mearrádusaid, skoviid ja diehtojuohkinmateriálaid oažžumis davvisámegillii. Organisašuvnnain leat maiddái viidát fuobmán skuvlendárbbuid sámegiela ja kultuvrra áddema ektui. Jorgalandárbbuide vástideapmi eaktuda, ahte sierra hálddahuslaš láhkaásaheapmi boahtá jorgaluvvot davvisámegillii, mii fas eaktuda suorggi terminologiija ovddideami davviriikkalaš ovttasbarggu bakte.
Jearahallama vuođul lea čielga ášši, ahte bálvalusat mat fállojuvvojit sámegillii, eai vel ollašuva ovttaveardásaččat. Prošeakta čájeha viiddes beroštumi ovddideami joatkimii ja vejolaš boahtte davviriikkalaš sámi juridihkkaterminologiijaprošektii.
Jearahallama eaŋgalsgielat raportta sáhttá lohkat dáppe.
Prošeakta lea nohkan 31.12.2024.
Lassidieđut:
Anne Kirste Aikio, gielladorvočálli
+358 (0)40 707 5626 / 010 839 3124
anne-kirste.aikio@samediggi.fi
