Jiânnai säʹmmla Lââʹnn juuhlin
Snimldõk: Matti Porre / Tääʹssvääʹld presideeʹnt kanslia
Tääʹssvääʹld presideʹntt Alexander Stubb kååččai vuõssmõs Lââʹnn johllses 6.12.2024 jiânnai säʹmmlaid. Tueʹǩǩen lij aainâs presideʹntt Stubb tuejjeem mäddkåʹddmäʹtǩǩ Nuorgam, Uccjooǥǥ, Aanar da Âʹvvel siidid vueʹssmannust 2024.
Sääʹmteeʹǧǧ saaǥǥjååʹđteei Pirita Näkkäläjärvi särnn, što lij šurr cistt, što presideʹntt Alexander Stubb da suu pieʹllkueiʹmm Suzanne Innes-Stubb haaʹlee kåččad Lââʹnn juuhlid nääiʹt jiânnai säʹmmlaid.
– Lââʹnn juuhl lie Lääʹddjânnmest õhtt jäänmõsân seuʹrrjum šõddmõõžžin, da tõn mieʹldd šâdd koovv tõʹst , mii Lääʹddjânnam lij. Mõõn jäänab mij säʹmmla juuhlin kuâsttjep, tõn pueʹrben šâdd tuõtt koovv Lääʹddjânnmest.
– Tuäivam, što pâʹsttep kueʹđđed positiivlaž koov Sääʹmjânnmest da sääʹmvuõđâst puuʹteeʹl õuʹdde sääʹm kulttuur määŋgpeällsažvuõđ, jieʹllemviõkksažvuõđ da ååsk pueʹttiäigga, särnn Sääʹmteeʹǧǧ saaǥǥjååʹđteei Pirita Näkkäläjärvi.
Lââʹnn juuhli teeʹmmen lij tän eeʹjj Õõutsââʹjest (Yhdessä). Presideʹnttlânna lie koččum nuʹt 1 700 kueʹssed jeeʹres åʹrnn Lääʹddjânnmest. Koččum kueʹssen lie aainâs oummu, kook lie õõuʹdääm õhttsallažvuõđ da noorrâm jeeʹres tuâǥǥain pueʹtti oummuid õʹhtte.
Lââʹnn juuhlid lie koččum tän eeʹjj jiânnai sääʹm puäʒʒhåiddai. Lââʹssen Lââʹnn juuhli smäkkmaaiʹlm puätt tââʹvest da stuäʹlest lie jeeʹrab mieʹldd puõccuvueʹǯǯ, repp da mueʹrj.
– Fiin, što tääʹssvääʹld presideʹntt lij tän eeʹjj välddam lokku jieʹllemvuõʹjjeen kååččeeʹl Uccjooǥǥâst da Aanrest kaaunõttum puäʒʒhåiddjid mieʹldd jiõččvuõttpeeiʹv johlla. Puäʒʒtääll lij õhtt sääʹmvuuʹd õõuʹdmõs jieʹllemvuõʹjjin da tõn mieʹldd sääʹmõõutstõõzzi seʹst sääʹmǩiõl da kulttuur seilla jieʹllemviõkksiʹžžen, särnn puäʒʒooumaž Asko Länsman Kaldoaivi palggsest.
Sääʹm-museo Siida eeʹttkõõʹsti lie koččum vuõssmõs vuâra tääʹssvääʹld presideeʹnt jiõččnažvuõttpeeiʹv vuâsttaväʹlddma. Sääʹm-museo paʹlǩǩeeš tän eeʹjj Eeʹjj euroopplaž museo da Eeʹjj museo -päʹlǩǩõõzzivuiʹm.
– Leäʹp räämmast, što presideʹntt Alexander Stubb haaʹlii tobdstõõttâd Siida Sääʹm-museo da luâttkõõskõʹsse da sääʹm kulttuurärbba Aanrest kueʹssjeʹmen vueʹssmannust, särnna Sääʹm-museofoond halltõõzz saaǥǥjååʹđteei Veikko Feodoroff da museojååʹđteei Taina Máret Pieski.
Presideʹnttlââʹnnest vueiʹnet Lââʹnn juuhli ääiʹj še Suomen valokuvataiteen museo kuratâʹsttem snimldõkčuäjtõõzz Õõutsââʹjest (Yhdessä). Õhtt čuäjtõõzz tuejjõõzzi sniimmjin lij sääʹmčeäppõsneǩ Lada Suomenrinne.
– Sääʹmčeäppõs lij čuuʹt määŋghämmsaž da kuâʹsttjeei maaiʹlmest. Muʹnne jiõccsan sääʹmčeäppõõzz raajjmõš miârkkšââvv vääʹld da vueiʹttemvuõđid raajjâd vaajtõsmääinlaid maaiʹlmid. Lij šiõǥǥ čuäʹjted, što čeäppõõzzâst da kulttuurâst lij miârktõs, särnn čeäppõsneǩ Lada Suomenrinne.
Tääʹssvääʹld presideʹntt lij miõttâm sääʹmteeʹǧǧ saaǥǥjååʹđteei Pirita Näkkäläjärvi Lääʹdd Leijoon I klaass ritarmiârk peiʹvvmieʹrin jooulmannu 6. peeiʹv 2024. Lääʹdd meerlaid jiõččnažvuõttpeeiʹv miõttum cisttmiârki vuäǯǯjid õlmstõʹtteš jooulmannu 3. peeiʹv.
Lââʹnn juuhlid lie koččum jeeʹrab mieʹldd:
Pirita Näkkäläjärvi, saaǥǥjååʹđteei, Lääʹdd Sääʹmteʹǧǧ, Aanar
Vesa Länsman, puäʒʒeeʹžžed, Kaldoaivi paalǥâs ja pieʹllkueiʹmm Marja Länsman, Uccjokk
Asko Länsman, puäʒʒooumaž, Kaldoaivi paalǥâs da pieʹllkueiʹmm Anna Näkkäläjärvi-Länsman, Nuorgam
Niila Laiti, puäʒʒooumaž, Kaldoaivi paalǥâs da pieʹllkueiʹmm Kati Eriksen, Uccjokk
Tiina Salonen, põõrǥâsneǩ, Aurora Holidays, da pieʹllkueiʹmm Mika Länsman, põõrǥâsneǩ, Aurora Holidays Uccjokk
Leo Aikio, väärrpuäʒʒeeʹžžed, Muddusjääuʹr paalǥâs da pieʹllkueiʹmm Tiina Sanila-Aikio, Aanar
Wille Feodoroff, puäʒʒeeʹžžed, Njauddâm paalǥâs da pieʹllkueiʹmm Anni Koivisto, Čeʹvetjäuʹrr
Laura Niittyvuopio-Valle, rehtor da pieʹllkueiʹmm Tuomas Valle, Karigasnjargg
Veikko Feodoroff, Sääʹm-museofoond halltõõzz saaǥǥjååʹđteei, Sääʹm-museo Siida da pieʹllkueiʹmm Satu Tuominen, Čeʹvetjäuʹrr
Taina Máret Pieski, museojååʹđteei, tooimtõsjååʹđteei, Sääʹm-museo Siida, Aanar
Teija Kaartokallio, saaǥǥjååʹđteei, Lääʹdd Sääʹmnuõr rõ (SSN), Ruäʹvnjargg
Gáddjá Haarla Pieski, tanssčeäppõsneǩ, Uccjokk
Biret Haarla Pieski, tanssčeäppõsneǩ, Uccjokk
Suvi West, jieʹllikarttohjjeei da pieʹllkueiʹmm Anssi Kömi, Karigasnjargg
Lââʹssteâđ:
Pirita Näkkäläjärvi, saaǥǥjååʹđteei, Sääʹmteʹǧǧ, 044 753 3766, pirita.nakkalajarvi@samediggi.fi
Asko Länsman, puäʒʒhåiddai, Kaldoaivi paalǥâs, +358400385898, asko@lumiporo.fi
Veikko Feodoroff, halltõõzz saaǥǥjååʹđteei, Sääʹm-museofondd, 044 753 3766
Taina Máret Pieski, museojååʹđteei, Sääʹm-museo Siida, 050 535 1574 taina.pieski@samimuseum.fi
Lada Suomenrinne, čeäppõsneǩ, lada.suomenrinne@gmail.com
