Oođeed mie'rruum sää'mtee'ǧǧvaal 3.6.–1.7.2024
Vaaläʹššǩiiʹrjid pååʹštʼtet ǩeʹrjjuum vuõlttõsân juõʹǩǩ jiõnnvuõiggâdvuõttnekka 3.6.2024 ääʹljeeʹl.
Jiõnnvuõiggâdvuõttneǩ vuäitt jiõnsted maaccteeʹl vaaläʹššǩiiʹrjid pååʹšt mieʹldd leʹbe maaccteeʹl vaaläʹššǩiiʹrjid jooʹtti vaalauʹtte leʹbe vuõiʹǧǧest vaal-luʹvddkååʹdd konttra. Tääʹrǩab teâđ käunnʼje vaaläʹššǩiiʹrjin da Sääʹmteeʹǧǧ neʹttseeidain. Vaalpeeiʹv jiõnstummuž jeät jäʹrjstuku eeʹjj 2024. Pååʹšt mieʹldd vuõlttuum äʹššǩeeʹrj âʹlǧǧe leeʹd vaal-luʹvddkååʹdd konttrest Aanrest mââimõõzzâst 1.7.2024 jiõnnlaʹsǩǩeem altteem räjja mõõneeʹst čiâss 18.
Säʹmmlai dommvuuʹd stroiʹttlin håiddamnalla åårrai oummu, di tõk dååma håiddamnalla åårrai oummu, kook jie muđoi vuäitči jiõnsted toolkteʹmes vaiggâdvuõđitaa, vuäǯǯa jiõnsted håiddpääiʹǩstes. Ääʹšš diõtt âlgg väʹldded õhttvuõtt 13.6. mõõneeʹst vaal-luʹvddkååʹdd konttra.
Addrõs Menesjärventie 2A, 99870 Aanar, teʹlfoon 044 720 3106, 044 700 4150 leʹbe vaalit@samediggi.fi.
Aanrest 14.5.2024
Vaal-luʹvddkåʹdd
