Puärrsijeäʹǩǩää: ǩiõl serddmõš da ǩiõlljeälltummuš
Sääʹmteʹǧǧ jääʹrjast sääʹmǩiõllsaž päärnai puärrsid jurddum puärrsijeäʹǩǩääid ǩiõl serddmõõžžâst da ǩiõlljeälltummšest. Puärrsijeäʹǩǩääin lij täävtõssân saǥstõõllâd õõutsââʹjest ǩiõl serddmõʹšše, ǩiõljeälltummša da sääʹmǩiõl ouddnummuž tuärjjummša õhttneei aaʹššin da tåbddjin.
Jeäʹǩǩää liâ jurddum pukid sääʹmǩiõllsaž päärnai puärrsid tõʹst soorčǩani, mõõn ǩiõl piârrjest mainstet. Juõʹǩǩ pooddâst lij mieʹldd še säʹmmlai psykososiaalʼlaž tueʹrj juâǥǥas Uuvj eeʹttkâsttmõš. Saǥstõõllmõõžžin jääʹǩǩtet tuõrvlab sââʹj vuâđđjurddjid, koid mõõnât čõõđ juõʹǩǩ jeäʹǩǩää aalǥâst.
Tarbb näkäm puärrsijeäʹǩǩääid lij kaggõõttâm mieʹrrkõõski ouʹdde, da måtam iiʹjji mââiårra leät jäʹrjstum kueʹhtt vaʹstteei jeäʹǩǩää päärnai puärrsid. Lââʹssen mõõnni eeʹjjest Sääʹmteʹǧǧ da Nuõrttsääʹmkultturfondd jäʹrjste õõutsââʹjest nuõrttsääʹmǩiõl vuâkka kõõsktõõvvâm saǥstõõllâmrääid, koin peäggteš še ǩiõlljeälltummuž da tõõzz õhttneei tåbddjid. Kuhttuin ooudâst peäggtum pooddin kuâđđje pueʹr toobdâlm.
Sääʹmteʹǧǧ lij ääiʹjab leämmaž mieʹldd še Ǩiõllvuäpstõõǥǥâst, koon jäʹrjsteš kueiʹt jeeʹres haʹŋǩǩõõzz õhttvuõđâst. Håʹt-i täin puärrsijeäʹǩǩääin ij leäkku kõõččmõš ǩiõllvuäpstõõǥǥ juätkkmõõžžâst, peäggtet še toʹben takai tobddâz aaʹššid saǥstõõllmõõžžin.
Puärrsijeäʹǩǩääid jäʹrjstet vueʹssmannust Uccjooǥǥâst, Aanrest da Âʹvvlest, da tõk juätkkje čâhčča. Tän teâđtõʹsse peeiʹvtet ođđ pooddin.
Suåppum puärrsijeäʹǩǩää:
Uccjokk, mââibargg 12.5. čiâss 18-20
Sijddpõrtt Giisá
Aanar, mââibargg 19.5. čiâss 18-20
Âʹvvel, seärad 20.5. čiâss 18-20
Lââʹssteâđaid oudd:
Niina Aikio-Siltala
Ǩiõllpieʹssohjjeei
040 487 5414 / 010 839 3115
niina.aikio-siltala@samediggi.fi
