Sääʹmteeʹǧǧ halltõs eʹtǩǩad jooulsǩiâŋkktieʹǧǧ sääʹmpäärnai da -nuõri ǩiõllpirrõõzz raaveem vääras

Sääʹmteeʹǧǧ halltõs tuʹmmii såbbreʹstes eʹtǩǩeed riikk tällõsarvvlõʹsse eeǥǥas 2025 lââʹssmieʹrrtieʹǧǧ, leʹbe nuʹt sarnnum jooulsǩiâŋkktieʹǧǧ sääʹmpäärnai da -nuõri ǩiõllpirrõõzz raaveem vääras da õhttsallašvuõđ õõuʹdummša.

– Vaʹlljiim jooulsǩiâŋkkteäʹǧǧeʹtǩǩõsân äʹššvuuʹd, kååʹtt õõuʹdeʹči pukid koolm Lääʹddjânnmest jieʹlli sääʹmǩiõl puäđlva pirr Lääʹddjânnam.

– Õhttân konkreettlaž tåimman sääʹmpäärnai da -nuõri ǩiõllpirrõõzz da õhttsallašvuõđ raaveem diõtt lij sääʹmnuõri čeäppõspeeiʹv õõudâsviikkmõš, što vueiʹtlva mäŋggaz sääʹmpäärna da -nuõr pirr Lääʹddjânnam piâzzči vuässõõttâd eeǥǥlaž noorõõttmõʹšše, särnn sääʹmteeʹǧǧ saaǥǥjååʹđteei Pirita Näkkäläjärvi.

Sääʹmteʹǧǧ lij eeǥǥlanji tuejjääm skamm-mannust eʹtǩǩõõzz jooulsǩiâŋkktieʹǧǧest.

Eeǥǥas 2024 Sääʹmteʹǧǧ eʹtǩǩii jooulsǩiâŋkktieʹǧǧ sääʹmpäärnai da -nuõri čeäppõspeeiʹvi jäʹrjstem vääras di Sääʹmteeʹǧǧ sääʹm-musikk-, päärnaikulttuur- da jieʹllikarttkõõskõõzzi toiʹmmjummša, leša lââʹssmieʹrrtieʹǧǧ jeät teʹl vuåǯǯum.

Sääʹmteʹǧǧ mieʹldd rasiism vuâsttsaž kampaʹnjje

Sääʹmteeʹǧǧ halltõs tuʹmmii, što Sääʹmteʹǧǧ vuässââtt riikksuåvtõõzz Me puhumme teoin -kampaʹnjje rasiism vuâsttlâʹsttem diõtt da õõutverddsažvuõđ õõuʹdeem diõtt.

Rasiism vuâsttsaž kampanjj lij vueʹssen påʹrǧǧmannust 2023 uvddum riikksuåvtõõzz õõutverddsažvuõtt-teâttanouddmõõžžâst.

– Õõutverddsažvuõtt-teâttanouddmõõžžâst lie mieʹldd halltõõzz eʹtǩǩõs sääʹmteʹǧǧlääʹjjest di tuõttvuõtt- da suåvâdvuõttkomissio tuâjj. Täk lie säʹmmlaid positiivlaž ǩeeʹrjõõzz. Lââʹssen Sääʹmteeʹǧǧ halltõs âânn täʹrǩǩen vuässõõttâd rasiism vuâsttsaž kampaʹnjje, särnn saaǥǥjååʹđteei Näkkäläjärvi.

Nõõmummuž jeeʹres tåimmorgaanid

Såbbreʹstes Sääʹmteeʹǧǧ halltõs nõõmii eeʹttkõʹstti Puäʒʒhååid puuʹtʼtemvuõđ da kaʹnntemvuõđ pueʹrummuš puäʒʒhåiddmõõntõõllmid di puäʒʒjânnmi âânnmõõžž da staanmõõžž õõudâsviiǥǥeeʹl (Poronhoidon tuottavuuden ja kannattavuuden parantaminen poronhoitomenetelmiä sekä laidunten käyttöä ja turvaamista kehittämällä, Petraus) -haʹŋǩǩõõzz ohjjeemjouʹǩǩe. Halltõs nõõmii ohjjeemjouʹǩǩe eeʹttkõʹsttjen Leo Aikio Aanrest da väärreeʹttkõsʹttjen Tauno Ljetoff Aanrest.

Tâʹvv-Lääʹdd sosiaalsueʹrj siltteemkõõskõõzz jååʹđtemjouʹǩǩe da saǥstõõllâmkådda Sääʹmteeʹǧǧ eeʹttkõʹsttjen halltõs nõõmii sosiaal- da tiõrvâsvuõttluʹvddkååʹdd saaǥǥjååʹđteei Leena Niittyvuopio-Jämsä Uccjooǥǥâst da väärrneʹǩǩen sosiaal- da tiõrvâsvuõttluʹvddkååʹdd väärrsaaǥǥjååʹđteei Ulla-Maarit Magga Jeänõõǥǥâst.

Teän kueʹllšeeʹllemsuåppmõõžž pääiklaž praavâmjouʹǩǩe vuäzzliʹžžen nõõmeeš Nilla Tapiola Uccjooǥǥâst da väärrneʹǩǩen Asko Länsman Uccjooǥǥâst.

Sääʹm parlamentaarlaž suåvtõõzz (SPN) nuõrisuåvtõʹsse vuäzzliʹžžen nõõmeeš Rosa-Máren Juuso Jeänõõǥǥâst da Mihku Näkkäläjärvi Aanrest da suännaid jiiʹjjes-i väärrneʹǩǩen Helmi Ljetoff Heʹlssnest da Hánsa Ravna-Pieski Uccjooǥǥâst.

Lââʹssteâđ:

Pirita Näkkäläjärvi
Saaǥǥjååʹđteei
044 7533 766
pirita.nakkalajarvi@samediggi.fi