Sääʹmvuuʹd toiʹmmjeei sääʹm ǩiõll-lääʹjj veäʹǩǩvuõđ peäʹlest

Sääʹmteʹǧǧ, säʹmmlai dommvuuʹd kååʹdd (Aanar, Uccjokk, Jeänõk da Suäʹđjel), Lappi pueʹrrvââjjamvuʹvdd, Sääʹm-museo Siida da Sääʹmvuuʹd škooultemkõõskõs lie raajjâm õhttsaž auʹǯǯjõõzz sääʹm ǩiõll-lääʹjj meâldlaž veäʹǩǩvuõđid jurddum čuõppmõõžži da tõi vaaiktõõzzin sääʹmǩiõllsaid kääzzkõõzzid.

– Nuäjjõõttâp eeʹttiǩ-kådda, što tõt maaccteʹče sääʹm ǩiõll-lääʹjj meâldlaž veäʹǩǩvuõđ 250 000 eeuʹr tässa. Riikksuåvtõs eʹtǩǩad veäʹǩǩvuõʹtte eeʹjj 2025 budjeeʹttest 130 000 eeuʹr čuõppmõõžž, särnn Sääʹmteeʹǧǧ saaǥǥjååʹđteei Pirita Näkkäläjärvi.

Eʹtǩǩuum summ ij kääʹtt veʹrǧǧniiʹǩǩi taarbid

Riikksuåvtõõzz budjeʹtteʹtǩǩõõzzâst eʹtǩǩuum summ ij riʹjtte käʹtted veʹrǧǧniiʹǩǩi sääʹm ǩiõll-lääʹjj tåimmapiijjma kuulli taarbid.

Sääʹm ǩiõll-lääʹjj meâldlaž veäʹǩǩvuõđi mieʹrren lij õõuʹdeed sääʹm ǩiõll-lääʹjj teâuddjummuž da veäʹǩǩvuõđ vueiʹtet ââʹnned lääʹjj suåvldummšest šõddi koolai kättmõʹšše.

Veäʹǩǩvuõtt lij õnnum jäänmõsân tuʹlǩǩeem- da jåårǥlâʹttemkääzzkõõzzi vuäʹsttma, di sääʹmǩiõl škooultõʹsse vuässõõttmõõžžâst šõddi sâjjsažvuõttkoolaid. Plaanum čuõppmõõžž vaaikteʹče auǯǯjõõzz mieʹldd miârkteeinalla sääʹmǩiõllsa tuâjjlažkååʹdd vuäǯǯamvuõʹtte da sääʹmǩiõli jieʹllemviõkkvuõʹtte Lääʹddjânnmest.

Veäʹǩǩvuõđin vuäǯǯat jiânnai äigga

Sääʹm ǩiõll-lääʹjj meâldlaž veäʹǩǩvuõtt lij očndõõttâm õhttân pukin viõusmõs neävvan lââʹzzted sääʹmǩiõllsai ämmat-tuâjjlai meäʹr.

Veäʹǩǩvuõđ veäkka lij vuõittum miõttâd eeǥǥlanji päälklaž veʹrǧǧluõvâsääiʹj jeeʹres suõʹrji ämmatniiʹǩǩid sääʹmǩiõli mättʼtõõttâm vääras.  Jeeʹresnallšem čiõlǥtõõzz čuäʹjte, što juʹn õhtt sääʹmǩiõltäiddsaž ämmatneǩ vuäitt miârkteeinalla pueʹreed õõlmâs kääzzkõõzzi vuäǯǯamvuõđ. Vääʹnn lij aainâs aanar- da nuõrttsääʹmǩiõllsain siltteeʹjin.

Halltõõzz tuʹmmstõk vuõrâs-škooultõstuärjjõõzz jaukkummšest hueʹnad tuâjj-jieʹllmest åårrji vueiʹttemvuõđid mättʼtõõttâd sääʹmǩiõl, da tõndiõtt sääʹm ǩiõll-lääʹjj meâldlaž veäʹǩǩvuõđ miârktõs lij šorrnam ääiʹjbest.

Ǩiõll-lääʹjj veäʹǩǩvuõđ tääʹzz lij leämmaž pâʹjjel 200 000 euʹrred

Sääʹm ǩiõll-lääʹjj meâldlaž veäʹǩǩvuõtt lij leämmaž ââʹlmõsân eeʹjjest 2023 kuäʹss tõn miõʹtteš õhttsiʹžže 290 000 euʹrred, ǥu Lappi pueʹrrvââjjamvuuʹd lââʹzzteš sääʹm ǩiõll-lääʹjj suåvldemvoudda. Eeʹjj 2024 veäʹǩǩvuõđ mieʹrr lij leämmaž 250 000 euʹrred, koʹst tõn plaanât ooʹcceed 120 000 eurra.

Plaanum čuõppmõš vaaikat jeäʹrben Aanar kååʹdd da Lappi pueʹrrvââjjamvuuʹd vueiʹttemvuõđid puuʹtʼted veʹrǧǧneǩ-kääzzkõõzzid koolm sääʹmǩiõʹlle. Lââʹssen veäʹǩǩvuõđ årra šâdd pueʹtti eeʹjj aalǥâst ođđ teädd, ǥu TJ-oođõs pohtt kooʹddid lââʹzz tuâjaid da TJ-kääzzkõõzz âʹlǧǧe leeʹd taʹrjjuum säʹmmlai dommvuuʹdest sääʹmǩiõlivuiʹm. Tät teäggtõstarbb ij leäkku valddum lokku TJ-oođõõzz teäggtõõzzâst.

Sääʹmǩiõllsa tuâjjlažkååʹdd vuäǯǯamvuõʹtte taarbšet riikk tuärjjõõzz

Õhttsaž auǯǯjõõzzâst tuõđât, što säʹmmlai dommvuuʹd veʹrǧǧniiʹǩǩin da jeeʹres toiʹmmjeeʹjin lij väʹǯǯel õhttu jiiʹjjes teäʹǧǧresuursivuiʹm čåuʹdded vaiggâdvuõđ sääʹmǩiõllsa tuâjjlažkååʹdd vuäǯǯmõõžžâst, tõn sâjja tõõzz taarbšet riikk tuärjjõõzz.

Auʹǯǯjõõzzâst eʹtǩǩeet, što riikkväʹldd õõlǥči toiʹmmjed ǩiõrggânji, što juätkast še säʹmmlaid vueiʹtet taʹrjjeed sääʹm ǩiõll-lääʹjj meâldlaž kääzzkõõzzid da sääʹmǩiõl pâʹšše jieʹllemviõkksaž ǩiõllân. Veäʹǩǩvuõtt õõlǥči uuʹccmõsân väʹstteed teeimja tääʹzz, mii leäi 250 000 euʹrred.

Auǯǯjõõzz vuâllaǩeeʹrjteei:

Jeänõõǥǥ kåʹdd

Aanar kåʹdd

Suäʹđjel kåʹdd

Uccjooǥǥ kåʹdd

Lappi pueʹrrvââjjamvuʹvdd, sääʹmǩiõllsa da kulttuurmeâldlaž kääzzkõõzz

Sääʹmteʹǧǧ

Sääʹm-museo Siida

Sääʹmvuuʹd škooultemkõõskõs

Looǥǥ auǯǯjõõzz obbnes tääiǥ (lääddas): Vetoomus saamen kielilain mukaisen avustuksen puolesta

Lââʹssteâđaid ouʹdde:

Sääʹmteeʹǧǧ saaǥǥjååʹđteei Pirita Näkkäläjärvi, 044 753 3766, pirita.nakkalajarvi@samediggi.fi

Sääʹmteeʹǧǧ ǩiõllstaanpiisar Anne Kirste Aikio, 010 839 3124, anne-kirste.aikio@samediggi.fi.

Teâtt sääʹm ǩiõll-lääʹjj meâldlaž veäʹǩǩvuõđi pirr:

Sääʹm ǩiõll-lääʹjj meâldlaž veäʹǩǩvuõđ – Vuõiggâdvuõttministeria (oikeusministerio.fi) (lääddas)

Sääʹmvuuʹd toiʹmmjeei nuäjjâʹtte ministeeʹrid vuõrâs-škooultõstuärjjõõzz koʹrvveem peäʹlest | Sääʹmteʹǧǧ (samediggi.fi)