Sääʹmteʹǧǧ vueiʹnnlõõđi Etyj minoriteʹttväldduumniiʹǩǩin Aanrest
Etyj minoriteʹttväldduumneǩ Kairat Abdrakhmanov kuõʹssji Aanrest 15.-16.2.2023. Kueʹssreeis poodd minoriteʹttväldduumneǩ vueiʹnnlõõđi Sääʹmteeʹǧǧ saaǥǥjååʹđteeʹj Tuomas Aslak Juusoin da nuuʹbb väärrsaaǥǥjååʹđteeʹj Leo Aikioin. Lââʹssen Sääʹmteeʹǧǧ tåimmorgaanin aanarsääʹmaaʹšši saǥstõõllâmkåʹdd da nuõrisuåvtõs vueiʹnnlõʹtte minoriteʹttväldduumniiʹǩǩin.
Etyj minoriteʹttväldduumneǩ Kairat Abdrakhmanov da Sääʹmteeʹǧǧ saaǥǥjååʹđteeʹjj Tuomas Aslak Juuso. Snimldõk: Sääʹmteʹǧǧ / Johanna Alatorvinen.
– Späʹssbõõššâm minoriteʹttväldduumneeʹǩǩ tääʹrǩes kueʹssreeisast. Saǥstõõlim säʹmmlaid ääiʹjpoddsaž aaʹššin, mâʹte sääʹmteʹǧǧlääʹjj oođeem šõõddtem aalmilaž vuõʹjjest da tõn puʹhttem tiâddõõzzin. Lââʹssen minoriteʹttväldduumneǩ leäi älšmam jm. äimmõsmuttâz vaikktõõzzâst säʹmmlai äʹrbbvuõđlaž jieʹllemvuõʹjjid da kulttuuʹre, di Sääʹmteeʹǧǧ vueiʹtlvažvuõđin vaaikted tuʹmmstõktuõjju, särnn Sääʹmteeʹǧǧ saaǥǥjååʹđteeʹjj Tuomas Aslak Juuso.
Aanar kueʹssreeis poodd minoriteʹttväldduumneǩ vuõiʹni še säʹmmlai dommvuuʹd kooʹddi eeʹttǩeeʹjid, tuõttvuõtt- da suåvâdvuõttkomissio eeʹttǩeeʹjid da sääʹmorganisaatioid, di kuuli säʹmmlai äʹrbbvuõđlaž jieʹllemvueʹjji ääiʹjpoddsaž vueʹjjest.
Vueiʹnnlõõttmõõžži lââʹssen minoriteʹttväldduumneǩ kuõʹssji Yle Sápmi tååimtõõzzâst da aanarsääʹmǩiõllsaž ǩiõllpieʹzzest. Lââʹssen minoriteʹttväldduumneǩ kuõʹssji väärrsaaǥǥjååʹđteeʹjj Leo Aikio åʹrnn da tobdstõõđi pueʹrben puäʒʒhoiʹddjummša.
Väärrsaaǥǥjååʹđteeʹjj Leo Aikio maainast puäʒʒhoiddjummšest kuõʹssid. Snimldõõǥǥâst Aikio lââʹssen čiʹǯsbeäʹlnn minoriteʹttväldduumneǩ Kairat Abdrakhmanov, di minoriteʹttväldduumneeʹǩǩ konttrest Zhazira Kul-Mukhammed, Mitra Jalali da Anton Thomsen. Snimldõk: Sääʹmteʹǧǧ / Johanna Alatorvinen.
Etyj minoriteʹttväldduumneǩ ǩiččal cõggâd da lääiʹveed tiâddõõzzid, kook õhttne meersaž minoriteeʹttid Etyj vuuʹdest. Tuâjast teäddai jõskk diplomatia da jeeʹres vuäʹssbeäʹl kõskksaž õhttsažtuâj tueʹrjjummuš.
Lââʹssteâđaid:
Tuomas Aslak Juuso
Saaǥǥjååʹđteeʹjj
040 687 3394
tuomas.juuso@samediggi.fi
Leo Aikio
II saaǥǥjååʹđteeʹjj
040 621 6 505
leo.aikio@samediggi.fi
Inka-Saara Arttijeff
meeraikõskksaž aaʹšši piisar
010 839 3 198 / 050 574 7 629
inka-saara.arttijeff@samediggi.fi
