Suäʹđjel kåʹdd da Sääʹmteʹǧǧ vuõinnlõʹtte juõʹǩǩeeʹjj šõddi õhttsažtuâjjpeeiʹv miârkin
Suäʹđjel kååʹdd da Sääʹmteeʹǧǧ eeʹttǩeeʹj vuõinnlõʹtte 15. čõhččmannust 2025 õhttsaž ouddõsvuåppmõõžž da õhttsažtuâj miârkin. Vuõinnlõõttmõõžž täävtõssân leäi nââneed vuârrsaakkummuž di toobdsted õhttsaž ouddõsvuåppmõõžž paaiʹǩid. Õhttsažtuâjjpeeiʹvid lij miârktõs juäʹtǩǩed juõʹǩǩeeʹjj.
Snimmõk: Ville Fofonoff/Sääʹmteʹǧǧ
Vuõinnlõttmõõžžâst toobdstes õhttsaž ouddõsvuåppi sââʹjjen sääʹmǩiõllsaž ouddpeâmm da mättʼtõõzz teäggtõõzz staanmõš. Lââʹssen saǥstõʹlleš määŋgain Suäʹđjel kådda da Sääʹmtegga vääžnai da ääiʹjpoddsaž aaʹššin, mâta:
- pueʹrr narodkõskkvuõđi ooudâsviikkmõš,
- sääʹm päärnaikulttuurkõõskõs Mánnu tåimmjummuš,
- mäddâânnmõʹšše da jieʹllemvueʹjjid õhttneei kõõččmõõžž, da
- sääʹmǩiõlid, škooultõʹsse, puârastvââjjmõʹšše da nuõrroummuid õhttneei teeʹm.
Sääʹmteeʹǧǧ saaǥǥjååʹđteeʹj sâjjsaž Tuomas Aslak Juuso teäʹddad õhttsažtuâjjpeeiʹvi miârktõõzz.
–Säʹmmlai dommvuuʹd kooʹddivuiʹm jäʹrjstum õhttsažtuâjjpeeiʹv liâ čuäʹjtõõttâm pueʹrr kanaalân vaajted ääiʹjpoddsaž kuullmõõžžid da saǥstõõllâd õhttsaž ouddõsvuåppmõõžž paaiʹǩin, särnn Sääʹmteeʹǧǧ saaǥǥjååʹđteeʹj sâjjsaž Tuomas Aslak Juuso.
–Meeʹst leäi pueʹrr õhttsažtuâjjvuõinnlõõttmõš Sääʹmtiiʹǧǧin. Saǥstõõllmõš leʹjje äävas da raajji, da ǩiõttʼtõõlim vääžnai aaʹššid, mâta pueʹrrvââjjam- da čuõvtõskääzzkõõzzi õõudâsviikkmõõžž, jieʹllemviõǥǥ di õhttsaž ouddõõzzid sääʹmvuuʹd kooʹddi kõõskâst. Tän õhttsažtuâj lij vääžnai juäʹtǩǩed õhttsaž täävtõõzzi õsttmõõžžâst, särnn Suäʹđjel kåʹddjååʹđteeʹjj Jari Rantapelkonen.
Tän eeʹjj vuõinnlõõttmõõžž jäʹrjsteš ougglõsõhttvuõđin. Såbbra vuässõʹtte Suäʹđjel kååʹddest kåʹddjååʹđteeʹjj Jari Rantapelkonen da pueʹrrvââjjam- da čuõvtõsjååʹđteeʹjj Antti Palomaa. Sääʹmteeʹǧǧest såbbra vuässõʹtte saaǥǥjååʹđteeʹj sâjjsaž Tuomas Aslak Juuso da vaaldâšmjååʹđteeʹjj Pia Ruotsala-Kangasniemi di jeeʹres tåimmsueʹrj veʹrǧǧoummuin škooultõspiisar Bigga-Helena Magga, ǩiõllstaanpiisar Anne Kirste Aikio, ǩiõllpieʹssvuäʹpsteeʹjj Niina Aikio-Siltala, sääʹm päärnaikulttuurkõõskõõzz tåimmamvuäʹpsteeʹjj Petra Biret Magga-Vars, lääʹǩǩpiisar Kalle Varis, jieʹllemvueʹǩǩ- da pirrõslääʹǩǩpiisar Sarita Kämäräinen, vs. pirrõspiisar Leena Niska, jieʹllemvueʹǩǩpiisar Laura Olsén-Ljetoff, vs. sosiaal- da tiõrvâsvuõttpiisar Anni Koivisto, vs. Nuõripiisar Saana Aikio da saaǥǥtempiisar Johanna Alatorvinen.
Sääʹmteeʹǧǧ da Suäʹđjel kååʹdd õhttsažtuâjjvuõinnlõõttmõš lij pieʹǩǩ eeǥǥlaž kåʹddõhttsažtuâjjvuõinnlõõttmõõžž. Vaʹstteei vuõinnlõõttmõõžž Uccjooǥǥ da Aanar kooʹddivuiʹm juʹn jäʹrjstum kuulli eeʹjj poodd. Jeänõõǥǥ kooʹddin vuõinnlõõttmõš lij tuâj vueʹlnn.
Lââʹssteâđaid:
Tuomas Aslak Juuso
Saaǥǥjååʹđteeʹj sâjjsaž
040 687 3394
tuomas.juuso@samediggi.fi
Jari Rantapelkonen
Suäʹđjel kåʹddjååʹđteeʹjj
040 615 9880
jari.rantapelkonen@sodankyla.fi
