Suomi.fist teâđ õõlmâs kääzzkõõzzin ååʹn še nuõrtt-, aanar- da tâʹvvsääʹmǩiõʹlle
Suomi.fi-neʹttkääzzkõʹsse liâ norrum teâđ õõlmâsvaaldâšm kääzzkõõzzin nuõrtt-, aanar- da tâʹvvsääʹmǩiõʹlle. Suomi.fi ohjjad še taʹrjjeemnalla åårrai sääʹmǩiõllsaž õõlmâs kääzzkõõzzi årra, mii tuärjj äʹššummuž jiijjâs ǩiõlin. Lââʹssen Suomi.fi-saaǥǥ tåimma juätkast kooumin sääʹmǩiõlin.
Suomi.fist vuäǯǯak teâđaid še kääzzkõõzzin jeeʹres sääʹmǩiõlin
Suomi.fist käunnʼje sääʹmǩiõʹlle teâđ juʹn nuʹt 180 õõlmâs kääzzkõõzzin. Lââʹssen Digi- da meerteâttkonttâr, Jieʹllemviõkk-kõõskõõzz, Kela da Lappi pueʹrrvââjjamvuuʹd sääʹmǩiõlin taʹrjjeem kääzzkõõzzin.
Täävtõssân lij vuäǯǯad jäänab organisaatioid mieʹldd õlmstââʹttet teâđaid kääzzkõõzzin Suomi.fist sääʹmǩiõlin, što tõk käunnʼje juätkast veiddsânji seämma pääiʹǩest. Lââʹssen miârktõs lij noorrâd õʹhtte jeeʹres sääʹmǩiõlin taʹrjjeem kääzzkõõzzid, što sääʹmǩiõllsa äʹššneeʹǩǩ käuʹnne hiâlpben kääzzkõõzzid jiijjâs ǩiõlin.
Suomi.fi-saaǥǥ še ââʹnnemnalla sääʹmǩiõʹlle
Nuõrtt-, aanar- da tâʹvvsääʹmǩiõllsa vuäppõõzz Suomi.fi-saaǥǥi âânnmõʹšše liâ leämmaž vuäǯǯamnalla juʹn õõut eeʹjj ääiʹj. Ååʹn Suomi.fi-saaǥǥid vuäitt ââʹnned še sääʹmǩiõlin.
– Suomi.fi-saaǥǥi âânnmõš nuõrtt-, aanar- da tâʹvvsääʹmǩiõlin oʹnnast aalǥâst tåʹlǩ Suomi.fi-neʹttkääzzkõõzz pääiʹǩ. Mâʹŋŋlubust lij jorddmõš õlmstâʹtted Suomi.fi-mobiilsuåvldõs sääʹmǩiõlin di taʹrjjeed vueiʹtlvažvuõtt vuâsttaväʹldded Suomi.fi-saaǥǥin puõʹtti neʹttpååʹštiʹlmmtõõzzid sääʹmǩiõlin, särnn Suomi.fi-saaǥǥi kääzzkõsvuäʹmsteeʹjj Maria Juka-Lahdenperä Digi- da meerteâttkonttrest.
Veʹrǧǧniiʹǩǩin lij še vueiʹtlvažvuõtt vuõltteed Suomi.fi-saaǥǥid sääʹmǩiõlin.
Õhttsažtuâjj tuärjj sääʹmǩiõllsaž kääzzkõõzzi ooudâsviikkmõõžž
Sääʹmǩiõllsa kääzzkõsooʒʒtõõǥǥ puuʹtʼtummuž leät oouduum Digi da meerteâttkonttâr, Sääʹmteeʹǧǧ da Mii ovttas -säimmõõzzin. Tõn täävtõssân lij hiâlpted sääʹmǩiõllsaž kääzzkõõzzi käunnʼjummuž di sääʹmǩiõllsaž äʹššniiʹǩǩi vueiʹtlvažvuõđ vuäǯǯad teâđaid õõlmâs kääzzkõõzzin sääʹmǩiõlin.
– Leäʹp Sääʹmteeʹǧǧest rämmas Digi- da meerteâttkonttrin altteem õhttsažtuâjast. Õhttsažtuâjj raavad sääʹmǩiõllsaž kääzzkõõzzi kuâsttjemvuõđ da põhtt konkreettlânji ođđ sääʹmǩiõllsaž digikääzzkõõzzid, särnn Sääʹmteeʹǧǧ saaǥǥjååʹđteeʹj sâjjsaž Tuomas Aslak Juuso.
Suomi.fi lij Digi- da meerteâttkonttâr âʹlnn ââʹnnem kääzzkõs, kååʹtt vieʹǩǩat da vuäʹppast meerlaid da põrggsid aarǥ aaʹšši håiddmõõžžâst veʹrǧǧniiʹǩǩi da takai ääuʹǩ uʹvddi organisaatioivuiʹm.
– Suomi.fi lij pueʹrr päiʹǩǩ sääʹmǩiõllsaž äʹššniiʹǩǩid kaunnâd õõlmâs kääzzkõõzzid jiijjâs ǩiõlin. Smeʹllkâʹttep pukid veʹrǧǧniiʹǩǩid õlmstââʹttet juʹn åårrmõõžžâst åårrai, še õõuti mieʹldd åårrai sääʹmǩiõllsaž kääzzkõõzzâs Suomi.fist. Teâđast tuäivvap še, što veʹrǧǧneeʹǩǩ tuejjeʹče lââʹzz kääzzkõõzzid jieʹlli sääʹmǩiõlid, särnn äʹšštobddi Nina West Digi- da meerteâttkonttrest.
Lââʹssteâđaid
Mii lij Suomi.fi-saaǥǥ?
Digi- da meerteâttkonttâr oouʹdad õhttsažkååʹdd digitalisaatio, tuârvv teâđai vuäǯǯamvuõđ da taʹrjjad kääzzkõõzzid äʹššniiʹǩǩi jieʹllemšõddmõõžžid. Tõt âânn huõl õhttsažkååʹdd vuâđđan åårrai meerteâttriâžldõõǥǥ âʹlnn âânnmõõžžâst. Konttra suåvldet sääʹm ǩiõll-lääʹjj da säʹmmlain lij vuõiggâdvuõtt ââʹnned sääʹmǩiõl äʹššeem poodd.
Sääʹmteʹǧǧ lij säʹmmlai veerǥlaž eeʹttkõʹstti. Tõt pohtt ouʹdde säʹmmlai veerǥlaž vuäinnmõõžž da saǥstââll veʹrǧǧniiʹǩǩivuiʹm. Sääʹmteʹǧǧ tuõʹllai da veekk ooudårra pukid Lääʹddjânnmest mainstem kolmm jieʹlli sääʹmǩiõl, pukid säʹmmlai äʹrbbvuõđlaž jieʹllemvuõʹjjid di sääʹmkulttuur da jieʹllemnääʹl.
