Uccjooǥǥ kåʹdd da Sääʹmteʹǧǧ saǥstâʹlle mättʼtõsminister Adlercreutzin sääʹmǩiõli ougglõsõhttvuõđid äuʹǩǩeei mättʼtõõzz põõžžtummšest
Uccjooǥǥ kåʹdd da Sääʹmteʹǧǧ eʹtǩǩee mättʼtõsminister Adlercreutz:e põõšši teäggtõõzz miõttmõõžž ougglõsõhttvuõđid äuʹǩǩeei mättʼtõʹsse da mättʼtõõzz rätkkmõõžž tiuddeei mättʼtõõzz kuõskki šiõttõõzzin. Juätkast mättʼtõõzz taʹrjjeʹžet jieʹnnǩiõl da ǩeerjlažvuõđ di kuʹǩes da vuäʹnkõs veeʹres ǩiõl mättmieʹrin, mâʹte säʹmmlai dommvuuʹdest.
Sääʹmǩiõli ougglõsõhttvuõđid äuʹǩǩeei mättʼtõõzz pilotthaʹŋǩǩõõzz tuâjjla noorõʹtte påʹrǧǧmannust plaanâd pueʹtti lookkâmeeʹjj Sajoʹsse. Snimldõk: Sääʹmǩiõli ougglõsõhttvuõđid äuʹǩǩeei mättʼtõõzz piʹlotthaʹŋǩǩõs
Mättʼtõs- da kulttuurministeria teäggtem čâhčča 2018 jåttjam haʹŋǩǩõʹsse lij miõttum teäggtõs ǩiđđlookkâmpââʹj 2026 räjja. Seärad 27.11. tuõʹllʼjum saǥstõõllmõõžži jurddjen-i lij saǥstõõllâd mättʼtõsminister Adlercreutzin tõʹst, mââʹđen ougglõsõhttvuõđid äuʹǩǩeei sääʹm mättʼtõõzz puõʹttiäiʹǧǧ kuâsttai.
Haʹŋǩǩõõzz čiiččad lookkâmpââʹj ougglõsõhttvuõđid äuʹǩǩeei mättʼtõõzzâst mättʼtâʹtte pâʹjjel 210 õudd- da vuâđđmättʼtõõzz škooulneʹǩǩed da lookkjiškooulmättʹtõõttjed. Haʹŋǩǩõõzz ääiʹj mättʼtõõttimieʹrr lij šorrnam neelljǩeârddsen.
– Škooulneǩ- da mättʼtõõttimeäʹr šorrnummuš miârkkšââvv tõn, što ougglõsõhttvuõđid äuʹǩǩeei mättʼtõʹsse lij jõnn tarbb säʹmmlai dommvuuʹd åålǥpeäʹlnn. Toʹben veʹt jälste juʹn pâʹjjel 70 % Lääʹddjânnam sääʹmpäärnain da -nuõrin. Ärvvtõõllâp, što meeʹst mättʼtõõttimieʹrr šâdd ââʹldmõs iiʹjji ääiʹj pâjjned 300 mättʼtõõttja, särnn haʹŋǩǩõsjååʹđteei Hanna Helander.
Säʹmmlai dommvuuʹd åålǥpeäʹlnn sääʹm mättʼtõõzzâst vaʹǯǯtõõzzid šõõddat tõt, što mättʼtõs mâânn vuâđđmättʼtõõzz da lookkjiškooulmättʼtõõzz tiuddeei mättʼtõsplaan mieʹldd.
– Tiuddeei sääʹm mättʼtõõzz mättʼtõsplaan mušttat jieʹnnǩiõl mättʼtõsplaan. Jäänmõs säʹmmlai dommvuuʹd åålǥpeäʹlnn jälsteei päärnain da nuõrin ij ââʹn sääʹm jieʹnnǩiõllnes. Tõn diõtt taarbšep mättʼtõsplaan, koon vueʹlǧǧemsââʹjjen lij, što mättʼtõõtti ij veâl silttâd sääʹm, särnn haʹŋǩǩõõzzâst tâʹvvsääʹm mättʼteei Máren-Elle Länsman.
– Sääʹmvuuʹd åålǥpeäʹlnn jälsteei sääʹmpäärnai da -nuõri vuäǯǯmõš sääʹmǩiõli mättʼtõõzz sizz lij kaallšõs äʹšš puki Lääʹddjânnmest mainstum sääʹmǩiõli jeälltem da pueʹttiääiʹj juuʹrdeeʹl. Tiuddeei mättʼtõõzz kuullmõš vuâđđmättʼtõslääʹjj leʹbe lookkjiškooul-lääʹjj sizz lij pannčiõlǥâs, da tõn kuõskki meärrõõzz tuõʹllʼje pannaainâsvuõđ mättʼtõõzz juätkkjummšest, kommentâstt škooultõspiisar Bigga-Helena Magga.
Lââʹssteâđ:
Hanna Helander, haʹŋǩǩõsjååʹđteei, +358407012094, hanna.helander@edu.utsjoki.fi, Uccjooǥǥ kåʹdd
Anne Olli, haʹŋǩǩõskoordinaattor, +358406875989, anne.olli@samediggi.fi, Sääʹmteʹǧǧ
Liiŋk:
