Vuässõõđ Saaʹmi meersažpeivva da ååʹn ij leäkku pääiʹǩest ǩidd
Virtuaalšõddmõš vuõltteet Sajoozzâst pâʹsspeeiʹv 6.2. čiâss 16 ääʹljeeʹl. Sääʹmteeʹǧǧ saaǥǥjååʹđteei Tuomas Aslak Juuso kåčč pukid vieʹttjed Saaʹmi meersažpeeiʹv õõutâst vuõigg vuõlttõõzz pääiʹǩ.
– Saaʹmi meersažpeeiʹv vieʹttjet ååʹn nuuʹbb eeʹjj virtuaalânji. Haaʹleep puʹhtted Sääʹm-meer õõutâst juuhljed tän vääžnai peeiʹv da seämmast kuõʹssjed virtuaalânji odm. tääiʹben mij åʹrnn Sääʹmteeʹǧǧest di jeeʹres sõõʹjin Saaʹmi dommvuuʹd, särnn saaǥǥjååʹđteei Tuomas Aslak Juuso šõddmõõžžâst.
Šõddmõõžž poodd kuulât saaǥǥjååʹđteei meersažpeeiʹv tiõrvvʼvuõtt, sääʹmpäärnai tiõrvvʼvuõđ da piâssâp naaudšed musikkčuäjtõõzzin di še vuäʹniǩjieʹllikaartin. Eiʹdde maaiʹlm vuõssmõõzz livđe bliin õlmstâttam Anna Morottaja juâigg äʹrbbvuõđlaž aanarsääʹm musiikk. Ulla Pirttijärvi & Ulda -bääʹnd Kahdeksan vuodenaikaa -konseʹrtt põhtt ouʹdde tââvas luõttu õhttneei teeʹmaid Ulla Pirttijärvi persoonlaž mooštai mieʹldd da mâânn musiikklaž vuârrmainstem äʹrbbvuõđlaž sääʹmkulttuur da ânnʼjõž maaiʹlm kõõskâst. Lââʹssen vueiʹnet odm. Čeʹvetjääuʹr škooulniiʹǩǩi rap video.
Meersažpeeiʹv šõddmõõžž piâssak seuʹrrjed addrõõzzâst www.sajos.fi/live
Vuäitak vuässõõttâd vuõltteeʹl meersažpeeiʹv tiõrvvʼvuõđääd nââmra +358 40 663 4493 teʹksttsaaǥǥin leʹbe Whatsappi pääiʹǩ. Vuäitak še kueʹđđed tiõrvvʼvuõđääd Twittrest tobddõõǥǥin #SaaʹmiMeersažpeiʹvv.
Vuäǯǯamnalla škooulid da mättstroiʹttlid
Sääʹmteeʹǧǧ nuõrisuåvtõõzz da Nuõri Akatemia Dihtosis-haʹŋǩǩõs veekk ooudâs sääʹmteâđ da taʹrjjad tåimmjemnallšem tuâjjpaaʹjid mättstroiʹttlid. Tuâjjpaaʹjid vuäitt tiʹllʼjed vueʹll-da pââibužškoouʹle di nuuʹbb tääʹzz mättstroiʹttlid. Dihtosis-haʹŋǩǩõs taʹrjjad ođđsen video-mättčiâssid sääʹmteeʹm ǩiõttʼtõõllmõʹšše. Video-mättčiâssin sääʹmnuõr toiʹmmje uʹčteeʹlen jååʹđteeʹl škooulniiʹǩǩid sääʹmkulttuuʹre jeeʹres ǩiõččâmvueʹjjin. Lââʹssen seeidain vuäitt tiʹllʼjed pedagooglaž siõrid sääʹmkulttuurâst leʹbe laaddâd Dihtosis- mõõntõõllâmvuäppaz leʹbe tueʹlesäävummuž.
- Tiʹlle tääiǥ video-mättčiâssid, siõrid da škooulkueʹssreeisaid
- Läädd täʹst mõõntõõllâmvueʹppes da tueʹlesäävummuš meersažpeiʹvven
Tiʹllʼjeeʹl määusteʹmes Dihtosis-materiaalid ääiʹjben õõstak vuäǯǯad älšmõõʹtti, saaʹmi jiijjâs puuʹtʼtem mättmateriaal jiijjad klaʹsse.
Oktavuohta.com seiddõs taʹrjjad aunstõõzzid sääʹmteâđai mättʼtõʹsse škooulin Seiddõʹsse liâ tååimtum jeeʹres škooul-da klass taaʹzzid plaanuum, teeʹmmkruuggi mieʹldd vuâđđõttum vueʹss da tuâj
Saaʹmi meersažpeiʹvv
Saaʹmi meersažpeeiʹv juuʹhlʼjet juõʹǩǩ eeʹjj täʹlvvmannu 6. peeiʹv. Juuʹhlvuõđid riâššât teʹl pirr Sääʹmjânnam da tääʹl Sääʹmjânnam åålǥbeäʹlnn še.
Saaʹmi meersažpeiʹvv lij õhtt saaʹmi liiʹpptempeeiʹvin. Juʹhllpeiʹvven meersažpeiʹvv lij õinn nuõrr, lääʹdd kaʹlndaaʹre tõn mieʹrǩǩeeš eman eeʹjjest 2004. Meersažpeeiʹvest tuʹmmeeš kuuitâǥ juʹn eeʹjjest 1992, da juʹhllpeeiʹv preddan lie pâʹjjel čueʹtt eeʹǩǩed mââiåʹrnn, eeʹjjest 1917. Teʹl Taarrjânnam Trondheimist rieʹššeš vuõssmõs tâʹvvjânnmallaš sääʹmsåbbar, koon mieʹrren leäi smiõttâd saaʹmi jieʹllemvuäittmõõžžid da väʹldded beäʹl saaʹmid kuõskki kõõččmõõžžid.
Lââʹssteâđ
Saaǥǥjååʹđteei Tuomas Aslak Juuso teʹl. 040 687 3394 / 010 839 3101, tuomas.juuso(at)samediggi.fi
Saaǥǥtempiisar Johanna Alatorvinen teʹl. 010 839 3140 / 040 663 4493, johanna.alatorvinen(at)samediggi.fi
