Saǥstõõllâmräidd nuõrttsääʹmǩiõl vueʹjjest: Ǩiõlltoobdâlm
Sääʹmteʹǧǧ kåčč saǥstõõllâd nuõrttsääʹmǩiõl vueʹjj da õõuʹdeem diõtt. Saǥstõõllmõõžži täävtõsân lij noorrâd jeeʹres toiʹmmjeeʹjid õʹhtte smiõttâd čåuddmõõžžid, koivuiʹm ǩiõl vueʹjj vuäitči pueʹreed õhttsažtuâj da ânnʼjõž resuursi veäkka. Saǥstõõllmõõžžin täävtõsân lij ǩiõččâd õõudårra čåuddmõš miõlâst. Taarb mieʹldd ääʹšš ǩiõttʼtõõllmõõžž altteet ânnʼjõž vueʹjj kaartʼtummšin.
Snimldõk: Tarmo Lehtosalo / Sääʹmkulttuurfondd.
4. Ǩiõlltoobdâlm
4.9.2025 18–20 Âʹlddkaaunõõttmõš Čeʹvetjääuʹrest.
Lââʹssteâđaid da iʹlmmtõõttâmliiŋk lââʹzztet mâʹŋŋlõbân.
Ääʹšš pirr jäʹrjstet še nuuʹbb âʹlddkaaunõõttmõõžž čõhččmannu äiʹǧǧen, ääiʹj da pääiʹǩ iʹlmmtet mâʹŋŋlõbân.
Looǥǥ lââʹzz: Sääʹmteʹǧǧ jääʹrjast saǥstõõllâmrääid nuõrttsääʹmǩiõl vueʹjjest
Saǥstõõllmõõžžid tuäivat mieʹldd toiʹmmjeeʹjid, ǩeäin miõll ǩeäss õõuʹdeed nuõrttsääʹmǩiõl vueʹjj leʹbe tuejjee ǩiõʹlle kuulli aaʹššivuiʹm. Nuõrttsääʹmǩiõllsai kääzzkõõzzi õõʹnni, ǩiõllmainsteei da takaioummu lie še tiõrvpuättam.
Saǥstõõllâmräidd lij vueʹssen Sääʹmteeʹǧǧ ǩiõllpoliittlaž toiʹmmjem- da õõuʹdeemprograammâst iiʹjjid 2025–2027. Sääʹmteeʹǧǧ tiuddsååbbar lij piijjâm vaalpââʹj kuʹǩes äiʹǧǧkõõsk tåimman nuõrttsääʹm jeälltummuž, raavummuž da õõudummuž. Sääʹmteeʹǧǧ vuäinnmõõžž mieʹldd nuõrttsääʹm vueʹǩǩ čårran aanar- da tâʹvvsääʹm vueʹjjest da õõlǥat jeeʹrab tååimaid tõn jeälltem õuʹdde. Vaʹǯǯtõsân lij tobdstum tõt, što nuõrttsääʹmǩiõl jälltummuž leʹbe veiddsõbân ǩiõllplaanmõõžž ij koordinââʹst ni kååʹtt vueʹsspieʹll systemaattlânji. Tõndiõtt Sääʹmteʹǧǧ haaʹlad ååʹn kåččad jeeʹres toiʹmmjeeʹjid saǥstõõllâd, mäʹhtt nalla nuõrttsääʹm jälltemtuâjast vuäitčet õuddned. Saǥstõõllmõõžžin noorât mošttsid, kooi vuâđald nuõrttsääʹmǩiõl õõuʹdeemtuâj jueʹtǩet Sääʹmteeʹǧǧest.
Saǥstõõllmõõžžid jäʹrjstet õhttsažtuâjast Saaʹmi siidsåbbrin da Sääʹmkulttuurfoondin.
Lââʹssteâđ:
Anne Kirste Aikio, ǩiõllstaanpiisar
anne-kirste.aikio@samediggi.fi
Marko Marjomaa, ǩiõllaaʹššipiisar
marko.marjomaa@samediggi.fi
Niina Aikio-Siltala, ǩiõllpieʹssohjjeei
niina.aikio-siltala@samediggi.fi
