KHO: Sääʹmteʹǧǧvaal feʹrttje ââʹnned oʹđđest – Saaǥǥjååʹđteeʹjj Näkkäläjärvi teäddad Sääʹmteeʹǧǧ juõʹǩǩpeivvsa toiʹmmjummuž juätkkjemvuõđ oʹđđest ââʹnnem vaali räjja

Ââʹlmõs vaaldšemvuõiǥâs uuʹdi räʹtǩǩummšes Sääʹmteeʹǧǧ eeʹjj 2023 vaalid kuõskki aaʹššin. Tuʹmmstõǥǥineez KHO mieʹrrii miõrkkât määŋgaid oummuid Sääʹmteeʹǧǧ eeʹjj 2023 vaal-loǥstõʹǩǩe da ââʹnned oʹđđest Sääʹmteʹǧǧvaalid.

Sääʹmteeʹǧǧ saaǥǥjååʹđteeʹjj Pirita Näkkäläjärvi särnn, što vueʹǩǩ lij tuõđâs. Sääʹmteeʹǧǧ halltõs ǩiõttʼtââll KHO tuʹmmstõõǥǥid leiʹǧǧ äššan såbbreʹstes 27.3.2024.

– Tobdstõõttâp ââʹlmõs vaaldšemvuõiggâz tuʹmmstõõǥǥid tääʹrǩeld. Oʹđđest ââʹnnem vaali räjja lij vääžnai ainsmâʹtted, što Sääʹmteeʹǧǧ juõʹǩǩpeivvsaž toiʹmmjummuš vuäitt juätkkjed nooʹrmeld. Meeʹst liâ jiânnai tuâj puki kooum Lääʹddjânnmest jiõʹlli sääʹmǩiõl, sääʹmkulttuur da puki sääʹm äʹrbbvuõđlaž jieʹllemvuõʹjji ouʹdde, teäddad saaǥǥjååʹđteeʹjj Näkkäläjärvi.

Saaǥǥjååʹđteeʹjj Näkkäläjärvi muuʹštʼtat Sääʹmteeʹǧǧ tuâǥǥmõs miârktõõzzâst. Tõt õhttan ouddâl puki kooum Lääʹddjânnmest jiõʹlli sääʹmǩiõl da sääʹmkulttuur tuõʹllʼjummša da ooudâsviikkmõʹšše di alggmeervuõiggâdvuõđi da säʹmmlai jiõččmieʹrreemvuõiggâdvuõʹtte.

– Sääʹmteʹǧǧ tueʹjjad juõʹǩǩpeeiʹv tuâj puki kooum Lääʹddjânnmest jiõʹlli sääʹmǩiõl serddmõššân puõʹtti sooǥǥbeäʹlid veeʹzz jânnmest. Tõt lij pukin vääžnmõs, tõt lij puk juõʹǩǩ sââʹjest. Päärna da nuõr taarbše mättmateriaalid. Kulttuurõhttõõzz da -tuâjjla taarbše tuärjjõõzz. Puk säʹmmlai äʹrbbvuõđlaž jieʹllemvueʹjj taarbše raavummuž. Tät tuâjj ij vuäǯǯ heärršõõvvâd ni måkam määinast, Näkkäläjärvi särnn.

Sääʹmteʹǧǧlääʹjj teevvmõš räʹtǩǩeʹči vueʹjj

Saaǥǥjååʹđteeʹjj Näkkäläjärvi tuäivv, što sääʹmteʹǧǧlääʹǩǩeʹtǩǩõõzz ǩiõttʼtõõllmõš eeʹttiǩ-kååʹddest juätkkai plaaneemnalla, ǥu lääʹjj teevvmõš vuäitt räʹtǩǩeed vueʹjj. Viõǥǥâst åårrai sääʹmteʹǧǧlääʹǩǩ lij puärsmam, tõt lij šõõddtam jiânnai toʹlǩǩeemristireeidaid da viikkâm ânnʼjõž pannčiõlgg vuâkka.

– Sääʹmteʹǧǧlääʹjj oođummuš vuäitt puʹhtted räʹtǩǩummuž tääzz kuʹǩesäiggsaž, säʹmmlai jiõččmieʹrreemvuõiggâdvuõđ kuõskki reidda. Säʹmmlai veerǥlaž eeʹttǩeeʹjj Sääʹmteʹǧǧ da kueʹhtt ǩeäččlõõžž jânnam halltõõzz liâ priimmâm saǥstõõllâmpuäđõõzz ođđ sääʹmteʹǧǧlääʹǩǩen. Sääʹmteeʹǧǧ tiuddsåbbar tuʹmmstõk tuärjjeed sääʹmteʹǧǧlääʹǩǩeʹtǩǩõõzz tueʹjjeeš juʹn mõõnni pââʹjest. Sääʹmteʹǧǧlääʹǩǩeʹtǩǩõs räʹtǩǩeʹči še ÕM orgaani tuõttâm, puârast vaiddlemnallšem meeraikõskksaž ooumažvuõiggâdvuõttsuåppmõõžži neuʹrrummšid, saaǥǥjååʹđteeʹjj Näkkäläjärvi särnn.

Sääʹmteʹǧǧlääʹǩǩeʹtǩǩõs lij väʹlddminister Orpo (kok) halltõsprograammâst da õõutverddsažvuõtt-teâđouddmõõžžâst. Halltõõzz eʹtǩǩõs uʹvddeš õõutmiõllsânji eeʹttiǩ-kådda jooulmannust 2023. Lääʹǩǩeʹtǩǩõs lij parlameeʹnt välljkooʹddi ǩiõttʼtõõllmõõžžâst. Lääʹjj eʹtǩǩuum lääʹjjviõʹǩǩešõddâmpeiʹvv lij 1.7.2024.

– Sääʹmteʹǧǧlääʹǩǩeʹtǩǩõs pooutči čiõlǥ sääʹmteʹǧǧlääʹjj suåvvtummša. Tõt oođeʹči muuttâsooccmõõžž vaal-loǥstõʹǩǩe persoon vuõiggâdvuõtt-tuõrv pueʹreeʹl. Tõt še raaveʹči sääʹm demokratia ainsmâʹtteeʹl õõutverddsa vueiʹtlvažvuõđ jiõnsted kuʹǩes kõõski sääʹmvuuʹdest. Lij vääžnai ââʹnned ǩidd eʹtǩǩuum lääʹjjviõʹǩǩešõddâmpeeiʹvest 1.7.2024. Ååskam, što mij puk haaʹleʹčep piâssâd ooudårra ǩeâškkai vueʹjjest da kaunnâd räʹtǩǩummuž, saaǥǥjååʹđteeʹjj Näkkäläjärvi särnn.

Saaǥǥjååʹđteeʹjj tuäivv ääʹšš meâldlaž saǥstõõllmõõžž

Looppâst saaǥǥjååʹđteeʹjj Näkkäläjärvi tuäivv ääʹšš meâldlaž saǥstõõllmõõžž Sääʹmteeʹǧǧest.

– Sääʹmteʹǧǧ lij raajji viõkk õhttsažkååʹddest. Sääʹmteʹǧǧ kâdd puk kooum Lääʹddjânnmest jiõʹlli sääʹmǩiõl da sääʹmkulttuur. Sääʹmteʹǧǧ tuärjjad pukid säʹmmlai äʹrbbvuõđlaž jieʹllemvuõʹjjid. Sääʹmteʹǧǧ haaʹlad raaveed säʹmmlai dommvuuʹd jieʹllemvueʹjj da tueʹjjeed vaiddsânji õhttsažtuâj jeeʹres toimmjeeʹjivuiʹm, Näkkäläjärvi särnn.

Lââʹssteâđ:

Pirita Näkkäläjärvi
Saaǥǥjååʹđteeʹjj
044 7533 766
pirita.nakkalajarvi@samediggi.fi