Sääʹmteʹǧǧ iʹlmmat ooccâmnalla mieʹrräiggsaž Ijahis idja -festivaal päärnaipeeiʹv projeʹktt-tuâjjla tuâj

Tuâjj älgg suåppmõõžž mieʹldd vueʹssmannu aalǥâst da peštt 23.8.2024 räjja.

Projeʹktt-tuâjjla tuâjjan lij väʹstteed Ijahis idja -alggmeeri musikkfestivaal päärnai- da nuõri peeiʹv plaanummšest, riâššmõõžžin, õhttvuõđâânnmõõžžâst šõddmõõžž vuässõõđji da jäʹrjsteeʹji kõõsk, teâđtummšest, jeeʹres ooudbeäʹlnn valmštõõllmõõžžâst. Ijahis idja -festivaal jäʹrjstet 16.‒17.8.2024 Aanrest, Sajoozzâst.

Ââʹntemkaiʹbbjõsân lij tuâj õudldem šiõttlõs škooultõs da sääʹmǩiõlltäidd (asetõs 1727/95). Tuâj oʹnnsteeʹjes håiddmõõžž ooudâsvieʹǩǩat ǩiõččlâsttmõš šõddmõšjäʹrjstummšest, pueʹr õhttsažtuâjj- da vuârrvaaiktemtääid di odd jiõččniʹžže da samai täärǩes tuõjju.

Projeʹktt-tuâjjla päʹlǩǩ meäʹrtââvv Lääʹdd Sääʹmteeʹǧǧ päʹlǩǩriâžldõõǥǥ väʹǯǯlõsvuõtt-tääʹzz V/II mieʹldd (vuâđđpäʹlǩǩ 2432,19 euʹrred/mp). Vuâđđpääʹlǩ lââʹssen määuʹset 24 % sääʹmvuuʹd lââʹzz da tuõjju härjjnem mieʹldd meäʹrtõõvvi ǩiõččlâʹsttemlõõʹzzid.

Projeʹktt-tuâjjla tuâjjäiʹǧǧ lij vueʹss-ǩieʹssmannust 50 % obbtuâjjääiʹjest da sueiʹnn-påʹrǧǧmannust 100 % obbtuâjjääiʹjest. Projeʹktt-tuâjjla tåimmpäiʹǩǩ lij sääʹmkulttuurkõõskõs Sajoozzâst.

Ooccâmǩeʹrjj di vueiʹtlvaž tuâjjpäiʹǩǩloǥstõk da jeeʹres meâlddõõzz âʹlǧǧe maaccted Sääʹmteeʹǧǧ piisarkådda 14.4.2024 mõõneeʹst tän ooccâmlomaakk pääiʹǩ (ävvan ođđ ikkna).

Lââʹssteâđaid tuâjast õudd sääʹmʼmusikk-kõõskõõzz plaaneei Oula Guttorm teʹl. 040 667 4545, oula.guttorm(at)samediggi.fi

Sääʹmteeʹǧǧ tåimmjummša vuäitt tobdstõõttâd addrõõzzâst www.samediggi.fi da Ijahis idja -alggmeerai musikkšõddmõʹšše addrõõzzâst: www.ijahisidja.fi

Aanrest 28.3.2024
Sääʹmteʹǧǧ