Sääʹmteʹǧǧ jääʹrjast EU-vaalpaneeʹl EU-vaaleeʹttǩeeʹjid 2.6. čiâss 16.00

Sääʹmteʹǧǧ jääʹrjast EU-vaalpaneeʹl europarlameʹnttvaaleeʹttǩeeʹjid Teams pääiʹǩ pâʹsspeeiʹv 2.6. čiâss 16.00.

Panelisttân liâ Katri Kulmuni kõõskõs, Annika Sipola kokoomus, Ari Mönttinen kriistlaždemokratt, Sara Seppänen vuâđđläʹddla, Eva Biaudet rmp, Viivi Järvelä sdp, Minna Minkkinen čiǯǯbieʹll-lett da Krista Mikkonen ruân. Jååʹđteeʹjen pooddâst lij Sääʹmteeʹǧǧ saaǥǥjååʹđteeʹjj Pirita Näkkäläjärvi da mieʹldd liâ Sääʹmteeʹǧǧ halltõõzz vuäzzla täʹst I väärrsaaǥǥjååʹđteeʹjj Leo Aikio Aanrest, II väärrsaaǥǥjååʹđteeʹjj Tuomas Aslak Juuso Jeänõõǥǥâst, Karen-Anni Hetta Vuõccust, Tauno Ljetoff Aanrest, Asko Länsman Uccjooǥǥâst da Inka Musta Heʹlssnest.

Podd lij lääʹddǩiõʹlle, da nääiʹt pooddâst ij leäkku tuʹlǩǩõs. Pooddâst kuâđđai jiõntõs.

Seuʹrre vaalpaneeʹl addrõõzzâst sajos.fi/live leʹbe Sääʹmteeʹǧǧ Youtube-kanaal pääiʹǩ.

Sääʹmteeʹǧǧ koumm EU-täävtõõzz

Sääʹmteeʹǧǧ saaǥǥjååʹđteeʹjj Pirita Näkkäläjärvi kaaggi mainsteen EU aarktlaž fooruumâst da alggmeerai dialoogâst Brysslest 15.5. ouʹdde Sääʹmteeʹǧǧ EU-politiikk koumm väʹlddtäävtõõzz. Täävtõõzz liâ:

• Põõšši rajjâz säʹmmlai vuässõõttmõʹšše EU tuʹmmstõktuõjju di EU-aaʹšši ǩiõttʼtõõllmõõžžâst Lääʹddjânnmest.
• Äimmõsmuttsa šiõttlâʹttemprogramm pukid säʹmmlai äʹrbbvuõđlaž jieʹllemvuõʹjjid da tõõzz riʹjttjeei EU-teäggtõs.
• Loŋŋtõõzz sääʹm põrggivuõđ da sääʹmvuuʹd jieʹllemviõǥǥ ooudâsviikkâm diõtt tõn sâjja, što Sääʹmjânnma puuʹtet pääkk mieʹldd mettkääʹv haʹŋǩǩõõzzid, mâta piõggviõǥǥ.