Saaʹmi meersažpeeiʹv juuʹhlʼjet õõutsââʹjest virtuaal’lânji
Taʹnni Saaʹmi meersažpeeiʹv juuʹhljet virtuaal’lânji. Sääʹmteeʹǧǧ saaǥǥjååʹđteei Tuomas Aslak Juuso kåčč pukid juuʹhlʼjet Saaʹmi meersažpeeiʹv sueʹvet täʹlvvmannu 6. peeiʹv čiâss 18 ääʹljeeʹl vuõigg vuõlttõʹsse.
– Tät peiʹvv lij kaallšõs säʹmmlaid. Normaal vueʹjjest noorõõđčim õʹhtte nuʹtt Sääʹmjânnmest ko tõn åålǥbeäʹlnn juuʹhlʼjâʹtted mij meer. Ååʹn čoʹrstemvueʹjj ääiʹj jeäʹp vueiʹt noorõõttâd fyyslânji, leša tuäivam, što virtuaalšõddmõõžž mieʹldd ooʹnnstep puʹhtted jiiʹjjen beäʹlest juuʹhlpåʹreâd puki säʹmmlai årra, särnn saaǥǥjååʹđteei Tuomas Aslak Juuso šõddmõõžž pirr.
Šõddmõõžžâst vueiʹnet saaǥǥjååʹđteei meersažpeeiʹv tiõrvtõõzz, sääʹmpäärnai tiõrvʼvuõđid da kuulât kuõʹssi jurddjid meersažpeeiʹv pirr. Jeäʹǩǩää piâzzât še naaudčed musiikkâst da vuäʹnkõsjieʹllikaartin. Meersažpeeiʹv šõddmõõžž piâzzak seuʹrrjed addrõõzzâst www.sajos.fi/live. Vuõlttõs älgg čiâss 18.
Vuässõõđ šõddmõʹšše vuõltteeʹl meersažpeeiʹv tiõrvʼvuõđääd nââmra +358 40 663 4493 teʹksttsaaǥǥin leʹbe Whatsapp mieʹldd. Vuäitak še kueʹđđed tiõrvʼvuõđääd Twitterist tiõttin #SaaʹmiMeersažpeiʹvv.
Sääʹmkulttuurkõõskõs Sajoozz restrantt Čaiju lij äävai čiâss 14–21.30. Meersažpeeiʹv restraant porrmõšliistâst lie kumppâz di pääiʹǩ âʹlnn pašttum njääʹljes leeiba, jm. pâʹsslašttâmniizu. Čaijust jääʹǩǩtet koronavirusvueʹjjest poorrâmpäiʹǩǩtoimmjummša uvddum siâzztõõzzid da vuäppõõzzid.
Saaʹmi meersažpeiʹvv lij šiõǥǥ äiʹǧǧ puʹhtted õuʹdde sääʹm meer mainnâz
– Meersažpeiʹvv lij vuõss-sâjjsânji juʹhllpeiʹvv sääʹm meeru, leša seämmast tõt lij peiʹvv, kuäʹss vueiʹttep kollektiivlânji puʹhtted õuʹdde mij meer mainnâz še väʹlddnarood kõskkvuõđâst. Tät peiʹvv lij samai pueʹrr peiʹvv muʹštted da mušttʼted, što sääʹm meer maainâs aaʹlji juʹn jânnamâkksaž aaiʹjin, tõt juätkkai õinn da tät maainâs puätt juätkkjed še puäʹđlvest, ceälkk Juuso.
Sääʹmteʹǧǧ älšmâtt väʹldded lokku saaʹmi meersažpeeiʹv. Sääʹmteeʹǧǧ nuõrisuåvtõõzz da Nuõri Akatemia Dihtosis-haʹŋǩǩõs juâkk sääʹmteâđ da taʹrjjad toimmsallaš tuâjjpaaʹjid mättstroiʹttlid. Tiʹllʼjemnalla lie veâl speâll da sääʹmkulttuur ǩiõttʼtõõlli teâttǩeâlbb-tueʹlesäävummuš.
- Tääiǥ vuäitak tiʹllʼjed speâllaid da škooulkõʹllʼjummšid
- Tääiǥ vuäitak laađđâd tueʹlesäävummuž meersažpeeiʹv vääras
Oktavuohta.com -seiddõs taʹrjjad aunstõõzzid sääʹmteâđ mättʼtõʹsse škooulin. Seiddõʹsse lie tooimtum jeeʹres škooul- da klasstaaʹzzid plaanum, äʹššvuuʹdi mieʹldd juâǥǥtõllum vuäzzaid da tuõjuid.
Saaʹmi meersažpeiʹvv
Saaʹmi meersažpeeiʹv juuʹhlʼjet juõʹǩǩ eeʹjj täʹlvvmannu 6. peeiʹv. Juuʹhlvuõđid riâššât teʹl pirr Sääʹmjânnam da tääʹl Sääʹmjânnam åålǥbeäʹlnn še.
Saaʹmi meersažpeiʹvv lij õhtt saaʹmi liiʹpptempeeiʹvin. Juʹhllpeiʹvven meersažpeiʹvv lij õinn nuõrr, lääʹdd kaʹlndaaʹre tõn mieʹrǩǩeeš eman eeʹjjest 2004. Meersažpeeiʹvest tuʹmmeeš kuuitâǥ juʹn eeʹjjest 1992, da juʹhllpeeiʹv preddan lie pâʹjjel čueʹtt eeʹǩǩed mââiåʹrnn, eeʹjjest 1917. Teʹl Taarrjânnam Trondheimist rieʹššeš vuõssmõs tâʹvvjânnmallaš sääʹmsåbbar, koon mieʹrren leäi smiõttâd saaʹmi jieʹllemvuäittmõõžžid da väʹldded beäʹl saaʹmid kuõskki kõõččmõõžžid.
Lââʹssteâđ
Saaǥǥjååʹđteei Tuomas Aslak Juuso teʹl. 040 687 3394 / 010 839 3101, tuomas.juuso(at)samediggi.fi
Saaǥǥtempiisar Johanna Alatorvinen teʹl. 010 839 3140 / 040 663 4493, johanna.alatorvinen(at)samediggi.fi
Restrantt Čaiju, teʹl. 040 588 4062, caiju(at)samediggi.fi
