Sääʹmǩiõli oouʹdeemtuõjju lââʹssteäggtõs, Sääʹm Ǩiõllkaʹlddi teäggtõõzz še raʹvvje eeǥǥas 2019
Riikkpeeiʹvi riikkvaaʹrivälljkååʹdd eʹtǩǩõõzz mieʹldd leʹčči pueʹttmen lââʹssteäggtõs säʹmmlai kulttuur- da ǩiõllpieʹsstuåimmjummša da Sääʹm ǩiõllikaʹlddi pirrekksaž tuåimmjummuž staanummšen.
Sääʹm Ǩiõllkaʹlddi tuåimmjummuš Lääʹddjânnmest vuäitt juätkkjed plaani mieʹldd pirr eeʹjj 2019. Riikkpeeiʹvi eeʹjj 2019 riikk tällõsarvvlõõzzâst eʹtǩǩeet 184 000 euʹrred ǩiõllõhttsažtuõjju. Tän lââʹssen riikkpeeiʹvi riikkvaaʹrivälljkåʹdd lij eʹtǩǩääm 190 000 euʹrred riikk eeʹjj 2019 budjetta tuejjuum lââʹssmieʹrrtieʹǧǧin leʹbe nuʹtt koččum rosttovsǩiâŋkktieʹǧǧin Sääʹm Ǩiõllkaʹlddi tuåimmjummša. Teäggtõõzz veäkka Sääʹmteʹǧǧ vuäitt päʹlǩǩeed Sääʹm Ǩiõllkaʹlddja tuâjjlaid nuõrtt-, aanar- da tâʹvvsääʹmǩiõlid pirr eeʹjj, kååʹtt vueiʹtlvâstt ǩiõllvuäʹpstummuž juätkkjummuž čõõđ eeʹjj. Sannõs- da noormtemsiâzztõõzzid uʹvddi nuõrtt-, aanar- da tâʹvvsääʹmǩiõli ǩiõlljuâǥǥtõõzz še vuäiʹtte juäʹtǩǩed tuâjeez pirr eeʹjj. Teäggtõõzz veäkka vueiʹtet še päʹlǩǩeed koontârpiisar.
Riikkvaaʹrivälljkåʹdd eʹtǩǩad še nc. rosttovsǩiâŋkktieʹǧǧin Sääʹmteeʹǧǧ eʹtǩǩõõzz meâldlânji 100 000 eeuʹr lââzztõõzz säʹmmlai kulttuur- da ǩiõllpieʹsstuåimmjummša. Lââzztõs kaaggči säʹmmlai kulttuur- da ǩiõllpieʹsstuåimmjummša vaʹrrjum teäggtõõzz eeʹjj 2018 tässa da lij ođđ eʹtǩǩõõzz mieʹldd õhttsiʹžže 1,2 miljoon euʹrred. Lââzztõõzzin pââʹstet staaneed puki ânnʼjõž kulttuur- da ǩiõllpieʹzzi tuåimmjummuž, leâša ooudâsviikkâd tuåimmjummuž še.
Riikkvaaʹrivälljkååʹdd tällõsarvvlõõzz lââzztõõzzid ǩiõttʼtõõlât riikkpeeiʹvin eeʹjj 2019 riikk tällõsarvvlõõzz ǩiõttʼtõõllâm õhttvuõđâst ouddâl rosttov.
Lââʹssteâđ:
Saaǥǥjååʹđteei Tiina Sanila-Aikio teʹl. 050 300 1780, tiina.sanila-aikio(at)samediggi.fi
Ǩiõllstaanpiisar Anne Kirste Aikio teʹl. 010 839 3124, anne-kirste.aikio(at)samediggi.fi
Mä. sääʹm ǩiõllaaʹšši piisar Marko Marjomaa teʹl. 010 839 3183, marko.marjomaa(at)samediggi.fi
