Sääʹmǩiõli ougglõsmättʼtõshaʹŋǩǩõs valmštââll tuåim põõššjen piijjmõõžž
Sääʹmǩiõli ougglõsmättʼtõshaʹŋǩǩõs valmštââtt tuåimas põõššjen piijjmõʹšše. Haʹŋǩǩõs aaʹlji čâhčča 2018 da tõt poott eeʹjj 2020 looppâst. Õõudbeäʹlnn haʹŋǩǩõõzz puuttam tuåimmjeei âʹlǧǧe raajjâd mättʼtõs- da kulttuurministerian eʹtǩǩõõzz sääʹmǩiõli ougglõsmättʼtõõzz põõššjen piijjmõõžž dommvuuʹd kooʹddi ååuǥbeäʹlnn. Nuʹt 70 % vuâđđmättʼtõsâkksaž sääʹmpäärnain jeälste da jåʹtte škooul säʹmmlai dommvuuʹd kooʹddi ååuǥbeäʹlnn.
Snimmõõǥǥâst sääʹmǩiõli ougglõsmättʼtõshaʹŋǩǩõõzz koordinaattor Arla Magga Sääʹmteeʹǧǧest da projeʹkttjååʹđteei Eila Tapiola Uʹccjooǥǥ kååʹddest.
Vuõssmõs tuåimmeeʹjj haʹŋǩǩõs uuʹdi sääʹmǩiõli ougglõsmättʼtõõzz õhttsiʹžže 16 nuõrttsääʹm-, 18 aanarsääʹm- da 19 tâʹvvsääʹmǩiõl škooulnekka. Haʹŋǩǩõõzzâst leʹjje mieʹldd õhttsiʹžže 21 kåʹdded da 39 škooulad. Pueʹtti čõõuč mättʼtõõttimeäʹr lâssne da haʹŋǩǩõʹsse puäʹtte mieʹldd čiččâm ođđ škooultõõzz jäʹrjsteeʹjed.
Škoouleeʹjj looppâst leämmaž maacctõs kõõjjõõzz puåđõõzz leʹjje älšmõʹtti. – Mättʼtõõtti di sij peâmmi lie sääʹmǩiõl mättjemvueiʹttemvuõđ diõtt kuärǥast da späʹssballaž, mušttle haʹŋǩǩõõzz tuejjla Eila Tapiola da Arla Magga.
Sääʹmǩiõli ougglõsmättʼtõshaʹŋǩǩõs leäi saakkân Mättʼtõshalltõõzzâst 12.6. õnnum Säʹmmlai škooultõsaaʹšši õhttsažtuejjorgaan såbbrest. Såbbra vuässõõđi õllʼjummõs šurr Olli-Pekka Heinonen, kååʹtt vuõiʹni ougglõsmättʼtõshaʹŋǩǩõõzz puuttmõõžž kõõsk škoouleeʹjj čuõlmm äʹššen. Såbbar õhttsaž huõllân leäi, mäʹhtt õlgg staanâd sääʹmǩiõli mättʼtõs säʹmmlai dommvuuʹd ååuǥbeäʹlnn eeʹjj 2021 aalǥâst õõudårra, ǥo haʹŋǩǩõs poott.
Såbbra vuässõʹtte Sääʹmteeʹǧǧ da Mättʼtõshalltõõzz eeʹttǩi lââʹssen sääʹm-mättʼtõõzz äʹšštobddi Heʹlssen, Ruäʹvnjaarǥ da Oulun gåårdin, Suäʹđjel, Aanar da Uʹccjooǥǥ kooʹddin, Sääʹmvuuʹd škooultõskõõskõõzzâst, Lappi vuʹvddvaaldâšmkonttrest di mättʼtõs- da kulttuurministeriast.
Haʹŋǩǩõõzz tuejjla Eila Tapiola, Arla Magga da Ulla Aikio-Puoskari vuässõʹtte 11.6. ougglõsmättʼtõs-škooul Etäkoulu Kulkuri äävai uusi peivva. (https://www.youtube.com/watch?v=mSTQB3t2u3g). Etäkoulu Kulkuri taʹrjjad lääʹddǩiõl- di lääʹddǩiõllsaž mättʼtõõzz lääʹdd päärnaid, kookk jeälste pirr maaiʹlm.
Peeiʹv prograʹmme kuuli mm. Paneeʹlsaǥstõõllmõš jiijjâs jieʹnnǩiõl miârktõõzzâst. Paneʹlistten leʹjje Etäkoulu Kulkuri rehttor Tuija Tammelander, mättʼtõsduumšeǩ Katri Kuukka di ougglõsmättʼtõõzz projeʹkttjååʹđteei Eila Tapiola, kååʹtt puuʹti saǥstõõllma mieʹldd sääʹmǩiõli vuäinalm. Saǥstõõllmest teäddtõʹvve ǩiõli reeʹǧǧesvuõtt di ǩiõl õhttvuõtt kulttuuʹre, kååʹtt kuõskat seämma nalla ålggjânnmin jeälsteei lääʹddpäärna ǥu Lääʹddest jeälsteei sääʹmpäärna. Paneʹliist da ǩiõčči smiõʹtte še õuddmiârkkan jieʹnnǩiõl mieʹrǩǩeem vueiʹttemvuõđ meer-rekisterteâđaid. Tok ij leäkku ååʹn vueiʹttemvuõtt mieʹrǩǩeet mäŋgg jieʹnnǩiõl. Tän äšša sij tuõivvu muttâz.
Laassteâđ
Projeʹkttjååʹđteei Eila Tapiola, eila.tapiola(at)utsjoki.fi, 040 7012 094
Haʹŋǩǩõskoordinaattor Arla Magga, arla.magga(at)samediggi.fi, 040 1985 033
