Sääʹmteeʹǧǧ halltõʹsse tuejjuum vuõiǥeemkaiʹbbjõõzzid ǩiõttʼtõõlât 1.–2.8.2023

Sääʹmteeʹǧǧ halltõs noorââtt ǩiõttʼtõõllâd vaal-luʹvddkååʹdd tuʹmmstõõǥǥi ǩeeʹjjest tuejjuum vuõiǥeemkaiʹbbjõõzzid 1.–2.8.2023.

Sääʹmteeʹǧǧest uvddum lääʹjj 26 § 2 momeeʹnt meâldlânji vaal-luʹvddkååʹdd tuʹmmstõõǥǥ ǩeeʹjjest tååđtem vuäitt tuejjeed Sääʹmteeʹǧǧ halltõʹsse vuõiǥeemkaiʹbbjõõzz, jos vuäinn, što son lij vuõiggâdvuõđtää kuõđđum meädda vaal-loǥstõõǥǥâst leʹbe što suu kuõskki mieʹrǩǩummuš vaal-loǥstõõǥǥâst lij puästtad. Vuõiǥeemkaiʹbbjõõzzid Sääʹmteeʹǧǧin halltõʹsse lij õlggâm tuejjeed 14 peeiʹv seʹst Sääʹmteeʹǧǧ vaal-luʹvddkååʹdd tuʹmmstõõǥǥ teâttanvuäǯǯampeeiʹvest.

Sääʹmteeʹǧǧ halltõs ǩiõttʼtââll tõõzz čuäʹjtum vuõiǥeemkaiʹbbjõõzzid såbbreʹstes, koonn tuõʹllʼjet 1.–2.8.2023 Aanrest. Vuõiǥeemkaiʹbbjõõzz tuejjeeʹjid vuõltteet tuʹmmstõõǥǥ pååʹšt mieʹldd tuõđštõõzzlaž teâttanouddmõšân sõõrǥmõõzz mieʹldd såbbar mâŋŋa, ko såbbar påʹrddǩeʹrjj lij taʹrǩstum.

Lââʹssteâđ:
Tuʹmmstõktuâj kuõskeeʹl:
Anni Koivisto
I väärrsaaǥǥjååʹđteei
040 415 5969
anni.koivisto(a)samediggi.fi

Vaaldâšm kuõskeeʹl:
Pia Ruotsala-Kangasniemi
Vaaldâšmjååʹđteei
010 839 3106 / 040 726 2688
pia.ruotsala(a)samediggi.fi