Sääʹmteeʹǧǧ stipeʹndd mieʹđtum kuuđ õllškooulmättʼtõõttja

Oula Järvensivu, Paula Rauhala, Minna Länsman, Rauna Saijets, Ida Maria Helander da Jonna Kesti vuäǯǯa tän eeʹjj Sääʹmteeʹǧǧ õllškooulmättʼtõõttjid õõlǥtum stipeeʹnd. Sääʹmteʹǧǧ piiji ooccâmnalla rõõǥǥâdmannu 12. peeiʹv õhttsiʹžže kutt 500 eeuʹr stipeeʹnd, kookk leʹjje õõlǥtum sääʹmǩiõl da/leʹbe sääʹmkulttuur väʹlddaaunâs- da čårraaunâsmättʼtõõttjid da sääʹmǩiõllsaž tuejj-jieʹllma valmštõtti õlltääʹzz škooultõõzzâst leʹddjid.

Stipeʹnddooccmõõžž puõʹtte õhttsiʹžže 8. Stipeeʹndi ooccâmäiʹǧǧ puuđi skamm-mannu 11 peeiʹv. Škooultõs- da mättmateriaal-luʹvddkååʹdd mieʹrrii stipeeʹnd vuäǯǯjin såbbreʹstes 25.11.

Oula Järvensivu lookk Oulu universiteeʹttest väʹlddaunnsen tâʹvvsääʹmǩiõll. Paula Rauhala mättʼtââtt Taarr Aarktlaž universiteeʹttest Tromssast Indigenous Studies-mättobbvuõđ. Minna Länsman väʹlddaunnsen Oulu universiteeʹttest lij säʹmmlaž kulttuur da čårraunnsen tâʹvvsääʹmǩiõll da museologia. Rauna Saijets lookk tâʹvvsääʹmǩiõl da sääʹm ǩeerjlažvuõđ Taarr Kautokeino õllškooulâst. Ida Maria Helander mättʼtââtt sääʹm kulttuur da tâʹvvsääʹmǩiõl Oulu universiteeʹttest. Jonna Kesti spraavâd sosionomimäättaid Kemist Lappi ämmatõllškooulâst.

Sääʹmteʹǧǧ späʹssbââšš pukid stipeeʹnd ooccjid da tuäivat juâkksiʹžže leekk da pueʹr õuddnummuš nuʹt määttain ǥo puõʹttivuõđ tuejj-jieʹllmest še!