Sääʹmteʹǧǧ ååcc mieʹrräiggsaž projeʹktt-tuâjjla haʹŋǩǩõʹsse: ”Tâʹvvsääʹm juriidlaž terminologia”
Projeʹktt-tuâjjla tuâjjan lij oouʹdeed tâʹvvsääʹmǩiõllsa juridiikk terminologia, oouʹdeed vaaldâšmsueʹrj laaʹjji jåårǥlõõzzi kvaliteeʹtt da õhttnâʹtted tâʹvvsääʹmǩiõl juridiikk sannõõzz Lääʹddjânnmest da Taarrâst. Haʹŋǩǩõõzzâst čiõlǥtet še sannõõzz noormtummuž vueiʹtlvažvuõđ da haʹŋǩǩõõzz juätkkjemvuõđ. Projeʹktt-tuâjjlaž vaʹsttad haʹŋǩǩõõzz vueʹjj jäʹrjstummšin di čõõđ viikkmõõžžâst da rapoort raajjmõõžžâst.
Tuâjj äälǥči tâʹlles da peštt kueʹhtt määnpââʹj ooudårra alttõsääiʹjest. Tuâj lij vueiʹtlvaž tuejjeed ougglõstuâjjan.
Ââʹntem-mäinnan lij tuâj õõlǥtem suåppi škooultõs da sääʹmǩiõll täidd (asetõs 1727/95). Tuâj oʹnnsteeʹjes håiddmõš õõlǥat vuõiggâdvuõtt-tiõđla silttummuž di ǩiõččlâsttmõõžž terminologia- da jåårǥlâʹttemtuâjast. Ââʹnnep äärvast pâstlvažvuõđ jiõččniʹžže da samai tääʹrǩes tuejjummša, pueʹrr õhttsažtuâjj- da vuârrvaaiktemtääidaid di še ǩiõččlâsttmõõžž projeʹktt-tuâjast.
Päʹlǩǩ meäʹrtââvv Sääʹmteeʹǧǧ paʹlǩǩ-klassriâžldõõǥǥ väʹǯǯelvuõtt-tääʹzz IV/IV mieʹldd (vuâđđpäʹlǩǩ 2810,27 euʹrred/mp). Vuâđđpääʹlǩ lââʹssen määuʹset sääʹmvuuʹdest tuâj tuejjeen 24 % sääʹmvuuʹd lââʹzz da tuâjjǩiõččlâsttmõõžž mieʹldd meäʹrtõõvi ǩiõččlâʹsttemlââʹzz.
Jiijjâs maall meâldlaž ooccâmǩeʹrjj di vueiʹtlvaž tuâjjpäiʹǩǩloǥstõk da jeeʹres meâlddõõzz õõlǥči tååimted Sääʹmteeʹǧǧ piisarkådda 14.5.2024 mõõneeʹst tän ooccâmlomaakk pääiʹǩ (ävvan ođđ ikkna).
Sääʹmteʹǧǧ lij vuäǯǯam haʹŋǩǩõʹsse Interreg Aurora haʹŋǩǩõsteäggtõõzz.
Lââʹssteâđaid tuâjast oudd ǩiõllstaanpiisar Anne Kirste Aikio, anne-kirste.aikio(at)samediggi.fi.
Sääʹmteeʹǧǧ tåimmjummša vuäitt tobdstõõttâd neʹttaddrõõzzâst www.samediggi.fi
Aanrest 30.4.2024
Sääʹmteʹǧǧ
