Sääʹmteʹǧǧ kåčč tobdstõõttâd tuåimmses saaʹmi meersažpeiʹvven
Sääʹmteʹǧǧ reäšš ääv uusi peeiʹv Aanar Sajoozzâst saaʹmi meersažpeiʹvven 6.2.2019 č 10-15. Peeiʹv mieʹrren lij puʹhtted Sääʹmteeʹǧǧ tuåimmjummuž tobddsen. Puk lie tiõrv pueʹttmen peivva!
Saaʹmi meersažpeeiʹv prääʹzkjet juõʹǩǩ eeʹjj täʹlvvmannu 6. peeiʹv. Prääʹzniǩvuõđid riâššât teʹl ääʹrbvuâlželd pirr Sääʹmjânnam da tääʹl Sääʹmjânnam åålǥbeäʹlnn še. – Taʹnni haaʹleep jeäʹrben puʹhtted Sääʹmteeʹǧǧ tuåimmjummuž tobddsen da kåččap-i pukid ǩeäiʹd miõl ǩeäss, vuässõõttâd ääv uusi peivva Aanar Sajoʹsse, rämmaš Tiina Sanila-Aikio.
– Peeiʹv ääiʹj tobdstõõđât Sääʹmteeʹǧǧ tuåimmeeʹjj ääiʹjpoddsaž teeʹmid, mâʹte meeraikõskksaž alggmeerai ǩiõli teeʹmmekka. Puki Lääʹddjânnmest mainstum sääʹmǩiõli vueʹǩǩ lij sträššjeei da tuejj mõõn tuejjeet sääʹmǩiõli ouʹdde lij samai vääžnai, juätkk Sanila-Aikio.
Ääv uusi peiʹvven prograammâst lij tobdstõõttmõš Sääʹmteeʹǧǧ konttrid da poliittlaž vaikktummuž vuäittmõõžžid. Sääʹmteʹǧǧ taʹrjjad pukid kuõʹssid kaaʹf da Sajoozz poorrâmpäiʹǩǩ Čaijust vuäitt vuäʹstted meersažpeeiʹv peiʹvvporrmõõžž. Peivva vuässõõttji kõõsk vuârbat fanimateriaal da sizzpiâssâmliipp eeʹjj 2019 Iinnteʹmes Inn -festivaaʹle.
Saaʹmi meersažpeiʹvv lij õhtt saaʹmi liiʹpptempeeiʹvin. Prääʹzniǩpeiʹvven meersažpeiʹvv lij õinn nuõrr, läʹddlaž kaʹlndaaʹre tõn mieʹrǩǩeeš eman eeʹjjest 2004. Meersažpeeiʹvest tuʹmmješ kuuitâǥ juʹn eeʹjjest 1992, da prääʹzniǩpeeiʹv preddan lie pâʹjjel čueʹtt eeʹǩǩed mââiåʹrnn, eeʹjjest 1917. Teʹl Taarrjânnam Trondheimist rieʹššeš vuõssmõs tâʹvvjânnmallaš sääʹmsåbbar, koon mieʹrren leäi smiõttâd saaʹmi jieʹllemvuäittmõõžžid da väʹldded beäʹl saaʹmid kuõskki kõõččmõõžžid.
Teâtt saaʹmi pirr mättjummša da jeärrsid ǩeäiʹd miõl ǩeäss: www.oktavuohta.com.
