Škooulkõʹllʼjeeiooccmõš lij ååʹn äävai – Ooʒʒõõđ mieʹldd!

Sääʹmteeʹǧǧ nuõrisuåvtõõzz da Nuõri Akatemia Dihtosis- haʹŋǩǩõõzzâst taʹrjjeet pââibužškooulid škooulkõʹllʼjummšid sääʹmteeʹm pirr. Ooccâp ååʹn ođđ, älššai 18 eeʹǩǩed teâuddam sääʹmnuõrid pirr Lääʹddjânnam škooulkõʹllʼjeeʹjen lookkâmeeʹjj 2019-2020 ääiʹj kõʹllʼjummšid.

Škooulkõʹllʼjeei tuâjjan lij tuõʹllʼjed podd sääʹmkulttuur pirr pââibužškooulâst kõʹllʼjeeʹl. Kõʹllʼjummuš šâdd sääʹmkulttuur čuäʹjtõõllmõõžžâst di tuåimmsallaš tuâjjpaaʹjin. Tuâjjpaaʹji mieʹrren lij jueʹǩǩed teâđ säʹmmlai da sääʹmkulttuur pirr väʹlddnarood nuõrid. Kõʹllʼjummuš peštt tääuʹjmõssân 75- 90 minuuttâd, ååreeʹl ǩidd tõʹst, mõõn kuuʹǩǩ mättstroiʹttel čiâss lie. Kõʹllʼjeeʹjid ooʒʒât pirr Lääʹddjânnam, jeeʹrab tarbb ođđ kõʹllʼjeeʹjin lij väʹlddgååradvuuʹd di Turku da Tampere vuuʹdin. Škooulkõʹllʼjummšid viiǥǥât čõõđ vuõss-sââʹjest škooulpeeiʹvi äiʹǧǧen 17.9.2019-31.5.2020 kõõskâst.

Škooulkõʹllʼjummšin määuʹset 54€ päʹlǩǩ/kõʹllʼjummuš di maaʹtǩid kõʹllʼjempäikka. Škooulkõʹllʼjummši mieʹrr lij ǩidd tiʹllʼjõõzzin da kõʹllʼjeei jiiʹjjes õsttmõõžžâst.

Škooulkõʹllʼjeeʹjid lij škooultõs Heʹlssnest Nuõri Akatemiast vuõssaarǥ 16.9.2019. Škooultõʹsse vuässõõttmõš lij õudldõssân škooulkõʹlljeeʹjen tuåimmjummša. Škooultõõzzâst jeäʹt mahssu pääʹlǩ, leša vueiʹtlvaž mäʹtǩǩ- da instemkuulid koʹrvveet.

Vueʹrddep škooulkõʹllʼjeeʹjin sääʹmkulttuur tobddmõõžž, älššai miõl da šiõttõõttmõõžž tääʹvted škooulkõʹllʼjem ǩieʹssma di šiõǥǥ vuârrvaaiktemtääidaid.

Tuåimmat luõvâld ǩeeʹrjtum ooccmõššad 30.8.2019 čiâss 16.00. mõõneeʹst addrõʹsse: minna.lehtola(at)samediggi.fi

Lââʹssteâđ:

Minna Lehtola

Projeʹktt-tuâjjlaž

Teʹl: 010 839 3132 | +358 40 650 3620

minna.lehtola(a)samediggi.fi