Sääʹmteʹǧǧ ååcc haʹŋǩǩõsplaaneeʹj Sámi Handicraft Academy 2027 -haʹŋǩǩõʹsse

Sámi Handicraft Academy 2027 -haʹŋǩǩõõzz väʹlddtäävtõssân lij tuejjeed põõššjen, âʹlnn ââʹnned da oouʹdeed sääʹm ǩiõtt-tuâjjtääidaid da – silttummuž sääʹmõhttsažkååʹddest. Haʹŋǩǩõs jääʹrjast tuâjjpaaʹjid da seminaarid äʹrbbvuõđlaž teâđ juâkkmõʹšše puõlvvõõǥǥi kõõskâst jeäʹrben Jeänõõǥǥâst, Kautokeinost Taarrâst di Ruõcc beäʹlnn Kaaresuvantost. Täk tuâjjpääʹj da seminaar taʹrjjee ǩiõtt-tuâjjlaid, õhttõõzzid da organisaatioid vueiʹtlvažvuõđid vueʹǩǩâʹtted ǩiõtt-tuâjjtääidaid, vaajted jurddjid da saǥstõõllâd sääʹmǩiõtt-tuâj pueʹttiääiʹjest. Haʹŋǩǩõõzz täävtõssân lij še pueʹreed säʹmmlai ǩiõtt-tuâjjtääidai vuäǯǯamvuõđ digitaalʼlaž tuâjjneävvai da interneʹttmättjummuž veäkka.

Haʹŋǩǩõõzzâst raaveet ǩiõtt-tuâj kaʹnnteeʹjen da ǩeâllʼjeeʹjen tällõõzzlaž jieʹllemvueʹǩǩen pueʹreeʹl ǩiõtt-tuâjjniiʹǩǩi jäärnaǩtåimmamsilttummuž, markknâʹsttemstrategiaid da piâssmõõžž markknid di tuõrvât säʹmmlai äʹrbbvuõđlaž teâtt plaaneeʹl čuâǥǥaskartt eettlaž vuäppõõzzi raajjmõššân kulttuurääʹrb ciʹsttjeeʹl da puästtad âânnmõõžž cõõggeeʹl. Haʹŋǩǩõs lij Lääʹdd da Taarr sääʹmteeʹǧǧ õhttsažhaʹŋǩǩõs, koʹst Lääʹdd sääʹmteeʹǧǧest lij vasttõs haʹŋǩǩõõzz vaaldšmest, tällõõzzâst di raportâsttmõõžžâst.

Haʹŋǩǩõsplaaneeʹj tuâjjan lij jåttʼted Sámi Handicraft Academy 2027 –haʹŋǩǩõs plaan meâldlânji, viikkâd čõõđ plaanuum tååimaid, ââʹnned huõl raportâsttmõõžžâst, seuʹrrjed projeeʹkt tällõõzz teâuddjummuž di ââʹnned huõl haʹŋǩǩõõzz vaaldšummšest aalǥâst loopp räjja. Tuâjj õõlǥat aktiivlaž vuârrvaaiktõõzz da veiddsõs õhttsažtuâj čõõnâsjoukk-ǩeeʹddest di pueʹr muttsi vaaldâšmoodd.

Kääzzkõskõskkvuõđ teâđ

Tuâjj äälǥči suåppmõõžž mieʹldd påʹrǧǧmannust 2025 da tõt peštt eeʹjj 2027 loʹppe. Tuâjj sâjjdâtt Sääʹmteeʹǧǧ takaikonttâr vuâlažvuõʹtte.

Sääʹmteeʹǧǧ tåimmpäiʹǩǩ lij sääʹmkulttuurkõõskõs Sajoozzâst, Aanrest, leša tuâj lij vueiʹtlvaž tuejjeed ougglõstuâjjan.

Ooccjest vueʹrddep

Ââʹntem-mäinnan lij tuâj õõlǥtem suåppi škooultõs da sääʹmǩiõlltäidd (asetõs 1727/95). Vueʹrddep toobdâlm projeʹkttvaaldšmest, oodd vaaldšed projeʹktt-tuejjummuš plaanummšest operatiivlaž čõõđ viikkmõʹšše, pueʹrr õhttsažtuâjj- da organisâʹsttemtääidaid di čiõlgg ǩeerjlaž saakkeemtääid. Tuâj oʹnnsteeʹjes håiddmõš õõlǥat pueʹrr äʹrbbvuõđlaž sääʹmǩiõtt-tuâj, ǩiõtt-tuâj, sääʹmkulttuur da jieʹllemvuõʹjji tobddmõõžž di oodd meeraikõskksaž õhttsažtuõjju sääʹmvuuʹdest.

Päʹlǩǩ

Päʹlǩǩ meäʹrtââvv Sääʹmteeʹǧǧ päʹlǩǩ-klassriâžldõõǥǥ väʹǯǯelvuõtt-tääʹzz IV/III mieʹldd (vuâđđpäʹlǩǩ obbtuâjjaaiʹjin 2931,34 euʹrred/mp). Vuâđđpääʹlǩ lââʹssen määuʹset sääʹmvuuʹdest tuâj tuejjeen 24 % sääʹmvuuʹd lââʹss da tuâjjǩiõččlâsttmõõžž mieʹldd meäʹrtõõvi ǩiõččlâʹsttemlõõʹzzid.

Ooccmõš

Ooccâmlomakk, di jiijjâs maall meâldlaž ooccâmǩeʹrjj di vueiʹtlvaž tuâjjpäiʹǩǩloǥstõk da jeeʹres meâlddõõzz âʹlǧǧe tååimted Sääʹmteeʹǧǧ piisarkådda 5.8.2025 mõõneeʹst tän liâdǥlaž ooccâmlomaakk pääiʹǩ (ävvan ođđ ikkna). Ooccâmlomakk

Sääʹmteʹǧǧ lij vuäǯǯam Sámi Handicraft Academy 2027 -haʹŋǩǩõʹsse Interreg Aurora teäggtõõzz.

Lââʹssteâđaid tuâjast oudd 14.-25.7.2025 poodd tuâjjlažkåʹddjååʹđteeʹjj Ida Pirttijärvi, ida.pirttijarvi@samediggi.fi, teʹl. 040 660 77 22

Sääʹmteeʹǧǧ tåimmjummša vuäitt tobdstõõttâd neʹttaddrõõzzâst www.samediggi.fi.

Aanrest 11.7.2025
Sääʹmteʹǧǧ