Sääʹmteeʹǧǧ vaali jiõnnlaʹsǩǩummuš

Jiõnilaʹsǩǩummuž altteet ääʹveeʹl puk pååʹšt mieʹldd mieʹrrääiʹjest puättam da vaal-luʹvddkååʹdd konttra maacctum maacctõskuõrid. Vaal-luʹvddkåʹdd mieʹrǩǩad pukid jiõnstam oummuid sättǩeeʹrj meâldlânji vaal-loǥstõʹǩǩe.

1. jõs jiõnstam oummu jeät leäkku mieʹrǩǩääm vaal-loǥstõʹǩǩe jiõnnvuõiggâdvuõttneʹǩǩen leʹbe jõs puätt õlmmsa, što son lij jäämmam õuʹddel vaaltååimtõõzz alttummuž;
2. jõs sättǩeʹrjj lij nuʹt vännai, što jeät aainâs vueiʹt tuõttâd, ǩii ooumaž lij jiõnstam; leʹbe
3. jõs vaalkuõʹrre lij tuejjuum jiõnsteei leʹbe võboršeeʹǩǩ kuõskki leʹbe jeeʹres ääʹšštem mieʹrǩǩummuž.

Ǥu puk jiõnstam oummu lie mieʹrǩǩuum vaal-loǥstõʹǩǩe da jiõnstummšest lokku vääʹldǩâni kuõđđum vaalkuõr sättkuõrines lie ratkkum meädda primmum kuõrin, piijât primmum vaalkuõrid ääʹveeǩâni vaalčokka.

Ǥu puk primmum vaalkuõr lie vaalčuuʹǩǩest, ääʹveet puk vaalčuuʹǩǩid da vaalkuõrid.

Jiõni laʹsǩǩeem vääras jiõnstemliippid jueʹjjet jooukid nuʹt, što juõʹǩǩ võboršeeʹǩǩ pueʹrren uvddum jiõn lie jiiʹjjes joukkân. Kuddteʹmes jiõnstemliippid rääʹtǩet jiiʹjjes joukkân. Juõʹǩǩ jooukâst åårrai jiõnstemliippi lååkkmeäʹr laʹsǩǩeet. Jiõnnlaʹsǩǩummšest tuõʹllʼjet jeeʹrab påʹrddǩeeʹrj.

Jiõnstemlipp lij kuddtem:

1. jõs vaalkuõr seʹst lij mieʹldd mii-ne jeeʹres ǥu õhtt jiõnstemlipp;
2. jõs jiõnstummuš lij kuõđđum lokku vääʹldǩâni 35 §:st šiõttuum vuâđald;
3. jõs jiõnstemlippân lij õnnum jeeʹres ǥu vaal-luʹvddkååʹdd teäddtem leiʹmmjum jiõnstemlipp;
4. jõs võboršeeʹǩǩ nââmar lij mieʹrǩǩuum nuʹt, što čiõlggsânji ij õlmman ǩeäzz jiõnn lij jurddum; da
5. jõs jiõnstemliʹppe lij ǩeeʹrjtum jiõnsteei nõmm leʹbe tõõzz lij tuejjuum jiiʹjjesnallšem tobddmiârkk leʹbe jeeʹres ääʹššteʹmes mieʹrǩǩummuš; ääʹššteʹmen jeät õnnu mieʹrǩǩummuž, kååʹtt tåʹlǩ čiõlǥâd, ǩeän võboršeeʹǩǩ jiõnsteei lij tättam jiõnsted.

Teâttkäivv: Lääʹǩǩ sääʹmteeʹǧǧest 17.7.1995/974