Sääʹmteeʹǧǧ vaali puäđõõzz meäʹrtõõvvmõš
Sääʹmteeʹǧǧ vuäzzliʹžžen šâʹdde vaʹlljuum 21 jäänmõsân jiõnid vuäǯǯam võboršeʹǩǩed, oudldeeʹl, što sij jooukâst lie ooʹccmõsân kolmm võboršeeʹǩǩ juõʹǩǩ säʹmmlai dommvuuʹd kååʹddest. Jõs täin kooʹddin koʹst-ne jie tän jooukâst leäkku kolmm võboršeeʹǩǩ, šâʹdde tän kååʹddest åårrai võboršiiʹǩǩin vaʹlljuum jäänmõsân jiõnid vuäǯǯam kolmm võboršeeʹǩǩ.
Väärrvuäzzliʹžžen šâdd vaʹlljuum sääʹmvuuʹd juõʹǩǩ kååʹddest åårrai võboršiiʹǩǩi vaʹlljeem mâŋŋa tõt, kååʹtt lij pueʹttjen jäänmõsân jiõnid vuäǯǯam võboršeǩ.
Jõs jiõnnmeäʹr lie seämma šoora, tuʹmmeed tõi kõskksaž jäʹrjstõõzz vuârbeeʹl.
Vaali puäđõõzz raavummuš
Vaali puäđõõzz raavad vaal-luʹvddkåʹdd kuälmad peiʹvven looǥǥeeʹl jiõnnlaʹsǩǩeem alttummšest vaal-luʹvddkååʹdd såbbrest 3.7.2024 čiâss 18.
Vaali puäđõõzz âlgg tâʹlles iʹlmmted vuõiggâdvuõttministeriaaʹje sääʹmteeʹǧǧ vuäzzlai da väärrniiʹǩǩi tuâjjses puõʹtti tåimmpââjas mieʹrreem diõtt.
Vaali puäđõõzz kuõskki vuõiǥeemkaiʹbbjõs da läittmõš
Jiõnnvuõiggâdvuõttneǩ, kååʹtt ǩeäčč, što vaal-luʹvddkååʹdd tuʹmmstõk vaali puäđõõzz raavummšest leʹbe vaali tååimtummša kuulli jeeʹres tåimm lij lääʹjjvuâsttsaž, vuäitt tuejjeed sääʹmteeʹǧǧ halltõʹsse vuõiǥeemkaiʹbbjõõzz mââimõsân 14. peiʹvven tõn peeiʹvest, kuäʹss vaal-luʹvddkåʹdd lij raavääm vaali puäđõõzz.
Sääʹmteeʹǧǧ halltõs âlgg ǩiõttʼtõõllâd vuõiǥeemkaiʹbbjõõzz ǩirrsânji da mââimõõzzâst õuʹddel vaaleeʹjj puuttmõõžž.
Sääʹmteeʹǧǧ halltõõzz tuʹmmstõʹǩǩe vuäǯǯ ooccâd muttâz lääiteeʹl ââʹlmõs vaaldâšmvuõiggsa mââimõõzzâst 14 peiʹvven tõn peeiʹvest, kååʹđen äʹššvuäzzlaž lij vuäǯǯam teeʹǧǧ halltõõzz tuʹmmstõõǥǥ teâttan. Muuttâsooccmest ââʹnet muđoi, mâiʹd vaaldâšmlääʹjjââʹnnemlääʹjjest šiõtteet.
Jõs vaal-luʹvddkååʹdd 1 momeeʹntest jurddum tuʹmmstõk leʹbe tåimm lij leämmaž lääʹjjvuâsttsaž da tät lij vaaiktam vaali puäđõʹsse, vaali puäđõs âlgg vuõiǥeed da riikksuåvtõs âlgg taarb mieʹldd mieʹrreed sääʹmteeʹǧǧ vuäzzlaid da väärrniiʹǩǩid vaali vuõiǥuum puäđõõzz meâldlânji.
Jõs vaali puäđõs ij leäkku vuõiǥeemnalla, vaalid âlgg mieʹrreed oʹđđest ââʹnnemnalla.
Teâttkäivv: Lääʹǩǩ sääʹmteeʹǧǧest 17.7.1995/974
