Algâaalmugij elleekovekuávdáš Skábma

Algâaalmugij juávhust mediast já eromâšávt elleekooveest láá maaŋgah tooimah. Elleekoveh pyehtih išediđ láppoo kielâ já kulttuur iäláskitmist, pyehtiđ oovdân ohtsâškodálijd vááijuvvuođâid, čäittiđ puástu munejurduid algâaalmugijn já huksiđ siärvuslâšvuođâ sierâ algâaalmugij kooskâ.

Elleekovekuávdáš Skábma uárnee elleekovesyergi tábáhtusâid, tego kuursâid, luvâlduvâid já elleekovečáittusijd já taha návt sämielleekove tobdosin. Skábma tuárju sämmilij elleekuuvij já av-pyevtittâsâi vuávám, ovdedem já pyevtittem ei. ravviimáin já pyereedmáin mättim. Kuávdáš oovded elleekove- já mediašoddâdem já viggá pyerediđ párnái já nuorâi sämikielâlii elleekovefalâlduv ei. dubbim vievâst.

Elleekovekuávdáá toimâ pyereed elleekovetaiđuu rähtim máhđulâšvuođâid sämikuávlust já liäkká máhđulâšvuođâid sämielleekove aalmugijkoskâsâžžân tohâmân já kulttuurtuálvumân. Elleekove koskâuámmin fáálá ärbivyevi aldasii modern máhđulâšvuođâ jieijâs kulttuurlii tiäđu vuorkkiimân já sirdemân sehe uđđâ mainâsij rähtimân, já tienuuvt iššeed sämikulttuur siäiluđ ellen já kilelin. Sämikielâliih elleekoveh pyeredeh meid kielâlii täsiáárvu olášume sehe ovdedeh sämikielâi iäláskittem.

Algâaalmugij elleekovekuávdáš lii mieldi orniimin já oovdedmin Skammâkoveh –elleekovefestivaal. Skammâkoveh-festivaal lii tehálâš foorum sämmiláid elleekoverähteid já maaŋgâi sämielleekuuvij vuosâeehidsaje. Párnái já nuorâi festivaalijn láá fálusist elleekovečáittuseh sehe mediapargopáájáh. Eenâb festivaalist: www.skabmagovat.fi.

Skábma uárnee elleekovečáittusijd Säämi kulttuurkuávdáš Saijoos auditoriost Anarist sehe pirrâ sämikuávlu oovtâst páihálij tuáimeiguin. Elleekovekuávdáš juáhá tiäđu sämmilijn já algâaalmugij elleekuuvijn aalmugijkoskâsáid elleekovefestivaaláid, tábáhtusuárnejeijeid já jyehheid sehe uárnee čáittusijd meid sierâlágán tábáhtussáid.

Elleekovekuávdáá tooimâ ruttâd máttááttâs- já kulttuurministeriö sämmilii taiđuu já kulttuur oovdedmân uáivildum meriruuđáin.